E Faapefea Ona Puipuia Aʻu Lava Mai Gaoioiga Faatosina Matagā i Faiga Taufeusuaʻiga?

PLAY

Tali a le Tusi Paia

Iloilo fautuaga aogā nei e faavae mai i le atamai o loo i le Tusi Paia:

Tausia se faiā lelei ma isi. Ia tausaafia ma faaaloalo i tagata e tou te faigaluega faatasi. Peitaʻi, ia ʻalofia le soona māfana iā i latou ma atagia atu ai e pei o loo e fiafia i o latou faanaunauga faaleituaiga.—Mataio 10:16; Kolose 4:6.
Laʻei talafeagai. O le ofuina o ofu faatosina, e ono sesē ai manatu o isi e uiga iā te oe. Ua fautua mai le Tusi Paia ia laʻei i ofu “onomea ma ia mafaufau lelei.”—1 Timoteo 2:9.
Filifili ma le atamai au uō. Afai e te faifaimea ma i latou e fiafia i faiga tau feusuaʻiga ma pe a faatafai mai i ai isi, o le a manatu la isi e te taliaina foʻi na faiga.—Faataoto 13:20.
ʻAlofia talanoaga lē mamā. Afai ua oo atu se talanoaga i ni “tala valea, tala lē mamā, po o tausuaga i mea valea,” e tatau loa ona e tuumuli ese.—Efeso 5:4, God’s Word Bible.
ʻAlofia tulaga e ono faaosoosoina ai. O se faaaʻoaʻoga, ia faaeteete pe a valaaulia oe e te nofo i le galuega pe a mānava, e aunoa ma se māfuaaga talafeagai.—Faataoto 22:3.
Ia maumauaʻi ma tautala saʻo. Afai e fai atu iā te oe e se tasi ni gaoioiga faatosina matagā i faiga taufeusuaʻiga, ia fai atu saʻo i ai e te lē fiafia i ana amioga. (1 Korinito 14:9) O se faataʻitaʻiga, e te ono faapea atu: “Ou te lē fiafia i lou paʻi soo mai. Aua neʻi toe faia lau amio lenā.” E te ono tusia foʻi se tusi iā te ia e faamatala i ai le mea na tupu, o ou faalogona, ma le mea e te lē manaʻo e toe tupu. Ia faailoa manino atu iā te ia o lau filifiliga, e faavae mai i au tapulaa tau amio ma ou talitonuga faaletapuaʻiga.—1 Tesalonia 4:3-5.
Saʻili se fesoasoani. Pe afai e faaauau pea gaoioiga faatosina matagā i faiga taufeusuaʻiga, ia talanoa atu i se uō maufaatuatuaina, se tauaiga, se isi e te lua faigaluega faatasi po o se tasi ua masani ona fesoasoani i nisi na aafia foʻi i nei faiga. (Faataoto 27:9) O le toʻatele o i latou na aafia i gaoioiga faatosina matagā i faiga taufeusuaʻiga, ua latou maua se fesoasoani e ala i le tatalo. E tusa pe e te leʻi tatalo muamua, ae aua e te manatu māmā i le fesoasoani e te maua mai iā Ieova, “le Atua o faamāfanafanaga uma.”—2 Korinito 1:3.

O gaoioiga faatosina matagā i faiga taufeusuaʻiga, ua aafia ai le siʻomaga i le galuega mo le faitau miliona o tagata, ae e mafai ona fesoasoani mai le Tusi Paia.