E masani ona taʻua i le Tusi Paia Iesu “o le Alo o le Atua.” (Ioane 1:49) O le faaupuga o le “Alo o le Atua” ua faailoa mai ai, o le Atua na Foafoaina mea uma ma o le Puna o le ola, lea e aofia ai ma le foafoaina o Iesu. (Salamo 36:9; Faaaliga 4:11) E lē o faapea mai le Tusi Paia na fanaua e le Atua Iesu, e pei ona fanaua e tagata o a latou fanau.

 O loo taʻua foʻi i le Tusi Paia agelu o “atalii o le Atua moni.” (Iopu 1:6) O loo faapea mai foʻi le Tusi Paia o le uluaʻi tagata o Atamu, o le “atalii o le Atua.” (Luka 3:38) Ae talu ai o Iesu o le uluaʻi foafoaga a le Atua ma na ia foafoaina tuusaʻo, ua taʻua ai o ia i le Tusi Paia o le Alo o le Atua.

•  Pe na soifua Iesu i le lagi a o leʻi fanau mai i le lalolagi?

•  O le ā na faia e Iesu a o leʻi afio mai i le lalolagi?

 Ioe. Na avea Iesu o se foafoaga agaga i le lagi a o leʻi fanau mai i le lalolagi o se tagata. Na ia faapea mai: “Na ou sau mai i le lagi.”—Ioane 6:38; 8:23.

 Na foafoaina e le Atua Iesu a o leʻi foafoaina isi mea uma. Ua faapea mai le Tusi Paia e faatatau iā Iesu:

•   “O ia . . . o le ulumatua o foafoaga uma.”—Kolose 1:15.

•   O ia “o le amataga o foafoaga a le Atua.”—Faaaliga 3:14.

 Na faataunuuina e Iesu le valoaga e faatatau i “lē e mai anamuā lona tupuaga, e mai i aso lava ua leva.”—Mika 5:2; Mataio 2:4-6.

 Na iai o ia i se tulaga maualuga i le lagi. Na taʻua e Iesu lenei tulaga ina ua ia tatalo: “Loʻu Tamā e, ia e faamamaluina aʻu . . . i le mamalu na ou maua ina o ta faatasi, a o leʻi faia tagata i le lalolagi.”—Ioane 17:5.

 Na ia fesoasoani i lona Tamā i le foafoaina o isi mea uma. Na galulue faatasi Iesu ma le Atua “o se tufuga poto.” (Faataoto 8:30) Ua faapea mai le Tusi Paia e faatatau iā Iesu: “Na foafoaina isi mea uma e ala iā te ia ma na foafoaina foʻi mo ia.”—Kolose 1:16.

 Na foafoaina e le Atua isi mea uma e ala iā Iesu. E aofia ai isi foafoaga agaga uma ma le lalolagi paneta. (Faaaliga 5:11) E pei le auala na galulue faatasi ai le Atua ma Iesu, o le auala e galulue faatasi ai se tusiata ma se kamuta faufale. E tusia e le tusiata le ata o le fausaga o le fale, ae fausia e le kamuta.

 Na avea o ia ma Upu. Pe a talanoa i le olaga o Iesu a o leʻi avea ma tagata, e taʻua o ia o “le Upu.” (Ioane 1:1) O lona uiga, na faaaogā e le Atua lona Alo e faailoa atu feʻau ma faatonuga i isi foafoaga agaga.

 E foliga mai na avea foʻi Iesu ma Fofoga Fetalai a le Atua i tagata i le lalolagi. Atonu na fetalai mai le Atua e ala iā Iesu po o le upu ina ua ia aumaia faatonuga iā Atamu ma Eva i le faatoʻaga o Etena. (Kenese 2:16, 17) Atonu foʻi o Iesu le agelu lea na taʻitaʻia tagata Isaraelu i le vaomatua, ma o lona leo lea na faatonuina le nuu ia matuā usiusitaʻi i ai.—Esoto 23:20-23. a