Ioe e mafai! O le Tusi Paia e mai i le “Atua o lē na te faamāfanafanaina ē ua lotomafatia.” (2 Korinito 7:6) E ui lava o le Tusi Paia e lē o se tusi o mataupu tau i le mafaufau, ae e mafai ona fesoasoani e foʻia so o se mafaufauga fia pule i le ola. O loo iai fautuaga aogā e fesoasoani iā te oe.

•  O le ā se fautuaga aogā ua aumaia i le Tusi Paia?

•  Pe o taʻua i le Tusi Paia tagata o ē na mananaʻo e feoti?

•  O le ā se mau e fesoasoani iā te oe e teena ai mafaufauga o le fia pule i le ola?

•  Ae a pe a fai mai sau uō, “ua ou fia oti”?

•  Ae a pe afai na ou taumafai muamua e pule i le ola?

• ● Faamatala atu ou faalogona.

   Manatu o le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

   Le uiga: Tatou te manaʻomia le lagolagosua a isi pe a tatou mafatia.

   Pe a e lē faamatalaina atu i se isi ou faalogona, o le a avea o se avega mamafa ma lofitūina ai oe. Ae a faamatala atu i isi ou faalogona, e pei ua faamatuu atu se avega, ma o le a e maua ai se vaaiga saʻo.

   Faataʻitaʻi: Talanoa i se isi i le taimi lenei, atonu o se tagata o le aiga po o se uō maufaatuatuaina. a E te ono faailoa atu foʻi ou faalogona e ala i le tusia i se api.

• ● Saʻili se fesoasoani faafomaʻi.

   Manatu o le Tusi Paia: “E lē manaʻomia e tagata malolosi se fomaʻi, ae na o ē mamaʻi.”—Mataio 9:12.

   Le Uiga: E tatau ona saʻilia se fesoasoani faafomaʻi pe a tatou mamaʻi.

   O mafaufauga fia pule i le ola, atonu o se faailoga lenā o se maʻi i le mafaufau pe taufaalogona. Pe a e maʻi, e leai se māfuaaga e te mā ai fua. E mafai ona togafitia le maʻi o le mafaufau ma taufaalogona.

   Faataʻitaʻi: Saʻili se fesoasoani mai se fomaʻi tomai i le vave e mafai ai.

• ● Ia manatua o loo manatu mai le Atua.

   Manatu o le Tusi Paia: “Pe e lē faatauina atu ea ni tamaʻi manulele se lima i tupe iti e lua? Ae e lē galo i le Atua se tasi o na tamaʻi manulele.  . . Aua neʻi outou fefefe; e sili atu ona tāua outou nai lo tamaʻi manulele e tele.”—Luka 12:6, 7.

   Le Uiga: E tāua oe i le Atua.

   E te ono lagona ua lē toe alofagia oe, ae o loo silafia e le Atua mea o loo e fesagaʻia. E manatu mamafa mai iā te oe tusa lava po ua e lagona ua e lē fia ola. Ua faapea mai le Salamo 51:17, “Le Atua e, e te lē inosia le loto momomo ma le nutimomoia.” E finagalo le Atua ia e ola auā e alofa iā te oe.

   Faataʻitaʻi: Iloilo faamaoniga mai le Tusi Paia e alofa le Atua iā te oe. Mo se faataʻitaʻiga, tagaʻi i le mataupu 24 o le tusi Faalatalata Atu iā Ieova.

• ● Tatalo i le Atua.

   Manatu o le Tusi Paia: “Ia taʻu atu o outou popolega uma iā te ia [le Atua], auā o loo manatu mamafa mai o ia iā te outou.”—1 Peteru 5:7.

   Le Uiga: O loo valaaulia oe e le Atua e taʻu atu ma le faamaoni iā te ia mea o loo mamafa i lou mafaufau.

   E na te avatua iā te oe le filemu o le mafaufau ma le malosi e tumau ai. (Filipi 4:6, 7, 13) I lenei auala, ua ia faatumauina ai i latou e valaau atu iā te ia mo se fesoasoani.—Salamo 55:22.

   Faataʻitaʻi: Ia tatalo nei loa i le Atua. Faaaogā lona suafa, o Ieova, ma taʻu atu iā te ia ou faalogona. (Salamo 83:18) Ōle atu iā te ia mo le fesoasoani e te tumau ai.

• ● Manatunatu i le faamoemoe o loo i le Tusi Paia mo le lumanaʻi.

   Manatu o le Tusi Paia: “O lenei faamoemoe ua iā i tatou, ua avea o se taula i o tatou ola, e mautinoa ma mausalī.”—Eperu 6:19.

   Le Uiga: E ono lē mautonu ou faalogona e pei ona fesouaʻiina o se vaa i se matagi, ae o le faamoemoe o loo i le Tusi Paia e faatumauina ai oe.

   O le faamoemoe e lē na o ni moomooga faivavale, ae e faavae i le folafolaga a le Atua e na te aveesea māfuaaga o tatou tigā.—Faaaliga 21:4.

   Faataʻitaʻi: Ia aʻoaʻo atili i le faamoemoe mai le Tusi Paia e ala i le faitauina o le lesona 5, i le polosiua Tala Lelei Mai i le Atua!

• ● Fai ni mea e te maua ai le fiafia.

   Manatu o le Tusi Paia: “O le loto e fiafia e aogā auā e mālōlō ai.”—Faataoto 17:22.

   Le uiga: Pe a tatou faia mea e maua ai le fiafia, o le a fesoasoani i o tatou mafaufau ma faaleleia ai tatou faalogona.

   Faataʻitaʻi: Fai mea e masani ona e fiafia e fai. O se faaaʻoaʻoga, faalogologo i musika, faitau se mea e faalaeiau ai oe po o se mea e masani ona e faia. E atili foʻi ona e fiafia pe a e faia ni mea e fesoasoani ai i isi, tusa lava po o ni mea laiti.—Galuega 20:35.

• ● Tausia lelei lou soifua mālōlōina.

   Manatu o le Tusi Paia: “Auā e aogā le faamalositino.”—1 Timoteo 4:8.

   Le Uiga: E tatou te maua aogā pe a faamalositino, lava le moe ma ʻai meaʻai paleni.

   Faataʻitaʻi: Savali topetope mo se 15 minute.

• ● Manatua e iai suiga i faalogona ma isi mea i le olaga.

   Manatu o le Tusi Paia: “E tou te lē iloa le mea o le a tupu iā te outou a taeao.”—Iakopo 4:14.

   Le Uiga: O se faafitauli faigatā, e oo lava i se faafitauli ua lē mafai ona e foʻia, atonu e iai mo na o sina taimi.

   E tusa lava pe foliga mai e faigatā lou tulaga i le asō, ae e mafai ona suia taeao. Ia saʻili ni auala e foʻia ai. (2 Korinito 4:8) E mafai lava ona faaleleia lou tulaga mafatia o loo iai, ae lē mafai ona faaleleia pe afai e te pule i le ola.

   Faataʻitaʻi: Faitau i tala o loo i le Tusi Paia e faatatau i tagata na mafatia ma mananaʻo e feoti, ma iloa ai le auala na suia ai o latou olaga i le lelei—e masani a o auala e latou te leʻi faatalitalia. Iloilo nisi o na faaaʻoaʻoga.

 Ioe, o loo taʻua i le Tusi Paia nisi o i latou na faapea mai, “Ua ou fia oti.” E leʻi aʻoaʻia i latou e le Atua, ae sa ia fesoasoani iā i latou. E na te faia foʻi faapena iā te oe.

Elia

•  ● O ai o ia? O Elia o se perofeta lototele. Ma na iai taimi na ia lotovaivai ai. Ua taʻua i le Iakopo 5:17: “O Elia o le tagata e pei o i tatou.”

•  ● Aiseā na manaʻo ai o ia e oti? O se tasi o māfuaaga, na lagona e Elia le tuua toʻatasi, fefe ma lagona le lē aogā. O lea na ia ōle atu ai, “Ieova e, ia e aveese loʻu ola.”—1 Tupu 19:4.

•  ● O le ā na fesoasoani iā te ia? Na sasaa atu ona faalogona i le Atua. Na faapefea ona faalaeiau o ia e le Atua? Na faaalia e le Atua lona manatu mamafa ma faaali atu lona mana iā te ia. Na ia faamautinoa foʻi iā Elia, o loo aogā pea o ia ma saunia sē la te toʻalua.

•  ▸ Faitau e faatatau iā Elia: 1 Tupu 19:2-18.

Iopu

•  ● O ai o ia? O Iopu o se tagata mauʻoa o lē na tapuaʻi ma le faamaoni i le Atua.

•  ● Aiseā na manaʻo ai o ia e oti? Na faafuaseʻi ona suia i le leaga le tulaga o Iopu. Na leiloloa uma ana meatotino. Na maliliu uma lana fanau i se mala. Na maua o ia i se maʻi leaga. Ma mulimuli ane, tuuaʻia sesē o ia i le māfuaaga o ona lava faafitauli. Na taʻua e Iopu: “Ua ou teena lea mea; ou te lē fia ola i aso uma.”—Iopu 7:16.

•  ● O le ā na fesoasoani iā te ia? Na tatalo Iopu i le Atua ma talanoa atu i isi. (Iopu 10:1-3) Na faalaeiauina o ia e se uō alofa, o Eliu, o lē na fesoasoani atu iā te ia e sui lana vaai e faatatau i lona tulaga. Ae sili ai, na talia e Iopu fautuaga ma le fesoasoani a le Atua.

•  ▸ Faitau e faatatau iā Iopu: Iopu 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● O ai o ia? O Mose na avea ma taʻitaʻi o le nuu o Isaraelu ma o se perofeta faamaoni.

•  ● Aiseā na manaʻo ai o ia e oti? Na telē le tiute tauave a Mose, ma masani ona faitioina o ia e isi ma lagona ai le lotovaivai. Na ia alaga atu i le Atua: “Faamolemole ia e fasiotia lava aʻu.”—Numera 11:11, 15.

•  ● O le ā na fesoasoani iā te ia? Na taʻu atu e Mose ona faalogona i le Atua. Na fesoasoani mai le Atua e faamamā le avega a Mose ma faaitiitia lona popole.

•  ▸ Faitau e faatatau iā Mose: Numera 11:4-6, 10-17.