O le faaupuga “Ierusalema Fou,” e lua taimi o loo taʻua ai i le Tusi Paia. O se aai faafaatusa e faaata mai ai se vaega o soo o Iesu e ō i le lagi, e pule faatasi ma ia i le Malo o le Atua. (Faaaliga 3:​12; 21:2) Ua faailoa mai i le Tusi Paia o lenei vaega e taʻua foʻi o le tamaʻitaʻi faaipoipo a le Keriso.

1.   E i le lagi le Ierusalema Fou. O taimi uma e taʻua ai i le Tusi Paia le Ierusalema Fou ua faapea mai, ua alu ifo mai i le lagi ma ua leoleo e agelu faitotoʻa o le aai. (Faaaliga 3:​12; 21:​2, 10, 12) O le telē tele o le aai e faamaonia ai e lē o faasino atu i se aai i le lalolagi. E faatafafā le fuaina o le aai, “e sefulu afe ma afe e lua o setatio” po o le “falelogi” le telē. I aso nei e pe ā ma le 2,200 kilomita le telē atoa o le aai. a (Faaaliga 21:16; Tusi Paia Samoa—Lomiga 1969) O lea la, o ona itu uma e pe ā ma le 560 kilomita (350 maila) le maualuga, e oo atu la lona maualuga i le vateatea.

2.   E faia aʻe le Ierusalema Fou i se vaega o soo o Iesu, po o le tamaʻitaʻi faaipoipo a le Keriso. E taʻua foʻi le Ierusalema Fou o le “tamaʻitaʻi faaipoipo, o le faletua lea o le Tamaʻi Mamoe.” (Faaaliga 21:​9, 10) O le Tamaʻi Mamoe faafaatusa e faasino atu iā Iesu Keriso. (Ioane 1:​29; Faaaliga 5:​12) ‘O le faletua o le Tamaʻi Mamoe,’ po o le tamaʻitaʻi faaipoipo a le Keriso e faasino atu i Kerisiano, o le a faatasi ma Iesu i le lagi. O loo faamatalaina i le Tusi Paia le faiā a Iesu ma nei Kerisiano, e pei o se tane ma se avā. (2 Korinito 11:2; Efeso 5:​23-​25) E lē gata i lea o maa faavae o le Ierusalema Fou, o loo tusia ai “igoa e sefulu ma le lua o aposetolo e toʻasefulu lua o le Tamaʻi Mamoe.” (Faaaliga 21:14) Ua fesoasoani lenei faamatalaga e tatou te malamalama ai i le uiga o le Ierusalema Fou, ona o Kerisiano ua valaaulia e ola i le lagi ‘ua atiaʻe i latou i luga o le faavae o le ʻauaposetolo ma le ʻauperofeta.’​—Efeso 2:​20.

3.   O le Ierusalema Fou o se vaega o se pulega. O Ierusalema anamua o le laumua o Isaraelu le nofoaga na nofotupu ai i le “nofoālii o Ieova” le tupu o Tavita, lona atalii o Solomona ma ē na tupuga mai iā i laʻua. (1 Nofoaiga a Tupu 29:23) Na taʻua Ierusalema o “le aai paia,” lea na faaata mai ai le pulega a le Atua e ē na tupuga mai iā Tavita. (Neemia 11:1) O loo taʻua foʻi le Ierusalema Fou o “le aai paia,” lea e faia aʻe iā i latou o le a faatasi ma Iesu i le lagi ina ia ‘pule mai o ni tupu i le lalolagi.’​—Faaaliga 5:​9, 10; 21:2.

4.   E aumaia e le Ierusalema Fou faamanuiaga i tagata i le lalolagi. Ua faapea mai le Tusi Paia e uiga i le Ierusalema Fou “ua alu ifo mai i le lagi mai i le Atua,” o lona uiga ua faaaogāina e le Atua ina ia faia lona finagalo i fafo atu o le lagi. (Faaaliga 21:2) O lenei faaupuga ua fesootaʻi atu ai le Ierusalema Fou i le Malo o le Atua, lea e faaaogāina e le Atua e faia lona finagalo “i le lalolagi, e pei ona faia i le lagi.” (Mataio 6:​10) O le finagalo o le Atua mo tagata i le lalolagi e aofia ai faamanuiaga nei:

   •   Aveesea le agasala. O loo tafe mai i le Ierusalema Fou le “vaitafe o le vai o le ola” ma faasūsūina ai “laau o le ola,” lea e “faamālōlōina ai nuu.” (Faaaliga 22:​1, 2) O le a aveesea e lenei faamālōlōga faaletino ma le faaleagaga le agasala, ma maua ai e tagata le ola lelei atoatoa e pei ona muaʻi fuafuaina e le Atua.​—Roma 8:​21.

   •   O le a iai se faiā lelei a le Atua ma tagata. Ua faaesea e le agasala tagata mai le Atua. (Isaia 59:2) O le aveesea o le agasala o le a mafai ai ona faataunuuina atoatoa lenei valoaga: “Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou.”​—Faaaliga 21:3.

   •   Faaiʻuina mafatiaga ma le oti. E ala i le Malo o le Atua o le a ia ‘soloiesea ai loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’​—Faaaliga 21:4.