O le ā e Uiga i ai le Faaleagaga? Pe e Mafai Ona Avea Aʻu ma Tagata Faaleagaga e Aunoa ma le Auai i se Lotu?

PLAY

Tali a le Tusi Paia

I le Tusi Paia, e mafai ona faamatalaina le faaleagaga i se faanaunauga ma le lotomalie e faafiafia le Atua ma iloa lona finagalo. O se tagata faaleagaga, e naunau e ola e ōgatusa ma tapulaa a le Atua ma mulimuli i le taʻitaʻiga a Lona agaga paia. a—Roma 8:5; Efeso 5:1.

E masani ona faaaogā e le Tusi Paia ni faaeseesega e faamatala ai le faaleagaga. Mo se faataʻitaʻiga, e ese mai i le tagata faaleagaga, “e lē taliaina e le tagata faaletino mea ua faaalia mai e le agaga o le Atua,” po o aʻoaʻoga a le Atua. (1 Korinito 2:14-16) O se isi eseesega mai i tagata faaleagaga, e ono faaalia e tagata faaletino le “lotoleaga ma le femisaaʻi” nai lo o le limafoaʻi ma le filemu. (1 Korinito 3:1-3) O i latou foʻi e faia tala taufaaleaga ma faatupuina fevaevaeaʻiga, ua taʻua o ē “e amio faamanu, ua lē ano i mea faaleagaga.”—Iuta 19; Faataoto 16:28. b

I lenei mataupu

O fea e pogai mai ai le faaleagaga?

E mafai ona tatou atiaʻe le itu faaleagaga ona ua faia i tatou i le faatusa o le Atua. (Kenese 1:27) E lē o se mea la e faateʻia ai ona e toʻatele e faatāua ma naunau i mea e lē mafai ona latou vāai pe paʻi i ai.

Na tatou fananau mai ma le tomai e faaalia ai uiga o Ieova c le Atua, e pei o le filemu, alofa mutimutivale ma le lē faailoga tagata. (Iakopo 3:17) E lē gata i lea, e foaʻi e le Atua lona agaga paia iā i latou e naunau e usiusitaʻi i ana faatonuga.—Galuega 5:32.

Aiseā e tāua ai le faaleagaga?

O le faaleagaga e iʻu ai i le “ola ma le filemu.” (Roma 8:6) E lē mafaatusalia na meaalofa mai i le Atua.

Ola: Ua folafola mai e le Atua le ola e faavavau mo tagata faaleagaga.—Ioane 17:3; Kalatia 6:8.
Filemu: E faasino atu i le filemu ma le Atua. O i latou e taulaʻi atu tau lava i o latou manaʻoga faaletino, e fai ma fili o le Atua. (Roma 8:7) E tauia e le Atua i latou e atiaʻeina le itu faaleagaga i le “filemu mai i le Atua, e silisili i mea uma lava e manatu i ai.” (Filipi 4:6, 7) E fesoasoani lenā filemu iā i latou e maua ai le fiafia i le olaga.—Mataio 5:3.

E faapefea ona ou atiaʻe le itu faaleagaga?

Ia iloa ma usiusitaʻi i faatonuga a le Atua. E mafai ona e faia faapea e ala i le faitau i le Tusi Paia, lea o loo iai manatu o le Atua e pei ona faamauina e tane o ē na taʻitaʻia e le agaga paia. (2 Peteru 1:21) O mea ua e aʻoaʻoina o le a fesoasoani iā te oe e tapuaʻi ai i le Atua “i le agaga ma le upu moni,” lea e taʻitaʻia e le agaga paia ma e ōgatusa ma le finagalo o le Atua.—Ioane 4:24.
Ia tatalo mo le fesoasoani a le Atua. (Luka 11:13) O le a fesoasoani le Atua iā te oe e faaalia uiga lea e mātaulia ai se tagata faaleagaga. (Kalatia 5:22, 23) E te maua ai foʻi le atamai e feagai ai ma luʻi o le olaga.—Iakopo 1:5.
Ia faatasitasi ma tagata faaleagaga. O le a latou faalaeiauina oe e atiaʻe lou itu faaleagaga. (Roma 1:11, 12) I se faaeseesega, o le faatasitasi ma tagata e feteenaʻi o latou manatu ma manatu o le Atua, e faavaivaia ai lou itu faaleagaga.—Iakopo 4:4.

Pe e manaʻomia ona ou auai i se lotu ina ia avea ai o se tagata faaleagaga?

O le tau ina auai i se lotu, e lē avea ai se tasi ma tagata faaleagaga. Ua faapea mai le Tusi Paia: “Afai e manatu se tasi iā te ia lava o sē e toʻaga i le tapuaʻiga ae lē pulea lona laulaufaiva, ua faasesēina e ia lona lava loto, ua lē aogā la lana tapuaʻiga.”—Iakopo 1:26.

E ui i lea, ua faailoa mai e le Tusi Paia o tagata faaleagaga e tapuaʻi i le Atua i le auala e na te faafinagaloina. E latou te amanaʻia e na o le ʻtasi le agaga,’ o le agaga paia lea o le Atua. E uunaʻia e lenā agaga i latou e tapuaʻi i le Atua o se tino e tasi, o se vaega o tagata ua faamaopoopoina ma tausia “le autasi i le agaga i le fusi o le filemu.”—Efeso 4:1-4.

Faamatalaga sesē e uiga i le faaleagaga

Faamatalaga sesē: O le faaleagaga e aofia ai so o se auala e ola ai, lea e fesoasoani i se tasi e maua ai le faamalieina pe fesoasoani foʻi ia avea o se tagata lelei i le mea e sili e na te mafaia.

Mea moni: I le Tusi Paia, e faasino atu le faaleagaga i le ola i se auala e taʻitaʻia e le finagalo o le Atua. E lē o faasino atu i taumafaiga a le tagata lava ia e avea ai o se tagata lelei e aunoa ma le fesoasoani a le Atua. E maua e tagata faaleagaga le faamalieina i le amanaʻia o Ieova o Lē na foafoaina i latou ma ola e ōgatusa ma lona finagalo.—Salamo 100:3.

Faamatalaga sesē: E mafai ona atiaʻe e se tasi le itu faaleagaga e ala i le faafitia atoatoa o ona faanaunauga pe faia mea e faatigā ai iā te ia lava.

Mea moni: O se tasi e faatigā i lona lava tino “e tapuaʻi e tusa ma ona lava manatu” ma faaalia ai manatu faaletino. (Kolose 2:18, 23) Ua taʻua i le Tusi Paia, o se olaga faaleagaga e maua ai le olioli, ae e lē o tigā.—Faataoto 10:22.

Faamatalaga sesē: O so o se mea e fesootaʻi atu i le nofoaga o agaga lea e aofia ai faiga faaagaga, e faaauiluma ai le itu faaleagaga.

Mea moni: O se tasi o vala o faiga faaagaga, o le talitonu lea e mafai ona fesootaʻi mai tagata ua feoti i ē o loo ola. Peitaʻi, ua aʻoaʻoina e le Tusi Paia, o tagata ua feoti, e latou te lē iloa se mea. (Failauga 9:5) O le mea moni, o faiga faaagaga o fesootaʻiga ia ma foafoaga agaga e tetee i le Atua. E inosia e le Atua faiga faaagaga ia e taofia ai se tasi mai i le avea ma tagata faaleagaga.—Levitiko 20:6; Teuteronome 18:11, 12.

Faamatalaga sesē: E iai le itu faaleagaga o foafoaga uma.

Mea moni: E faamamaluina le Atua i mea uma na ia foafoaina. (Salamo 145:10; Roma 1:20) Peitaʻi, e na o foafoaga atamamai e mafai ona atiaʻe le itu faaleagaga. I se faaeseesega, e gaoioi manu e tusa ma o latou manaʻoga faaletino ma e lē mafai ona latou atiaʻe se faiā ma le Atua. (2 Peteru 2:12) O lea, e faaeseese e le Tusi Paia le faaleagaga mai i amioga ma mafaufauga faamanu.—Iakopo 3:15; Iuta 19.

a I le Tusi Paia, o upu mai i le uluaʻi gagana ua faaliliuina i le “agaga” e uiga atu i le “mānava.” E mafai foʻi ona faasino atu i se mea e lē vaaia ae o loo gaoioi. O loo faamatalaina e le Tusi Paia le Atua, o le Agaga Silisili Ese. E filifili le tagata faaleagaga e taʻitaʻia o ia e le finagalo o le Atua ma Lona agaga paia.

b I le Tusi Paia, pe a faaaogā le faaupuga “faaletino” i tagata, e faasino atu iā i latou e tele ina faavae a latou manatu ma gaoioiga i manaʻoga faaletino, ae e itiiti pe e leai foʻi se faaaloalo i tapulaa a le Atua.

c I le Tusi Paia, o Ieova o le suafa lea o le Atua.—Salamo 83:18.