O le upu o loo faaliliuina i le “toetū” i le Tusi Paia, e sau mai le upu Eleni a·naʹsta·sis, lea e uiga atu i le “faatulaʻi” po o le “toe tū i luga.” O se tagata ua toetū, ua toe faatūina mai i le oti ma toe maua le ola sa iā te ia muamua.—1 Korinito 15:12, 13.

 E ui e lē o iai le upu “toetū” i Tusitusiga Paia Eperu lea e masani ona taʻua o le Feagaiga Tuai, ae o loo iai le aʻoaʻoga e faatatau i le toetū. Mo se faataʻitaʻiga, na folafola mai e le Atua e ala mai i le perofeta o Hosea: “Ou te laveaʻi i latou mai i le Tuugamau; ou te toe faatauina i latou mai i le oti.”—Hosea 13:14; Iopu 14:13-15; Isaia 26:19; Tanielu 12:2, 13.

 O fea o le a toetutū aʻe ai tagata? O nisi o le a toetutū aʻe i le lagi ma pule o ni tupu faatasi ma Keriso. (2 Korinito 5:1; Faaaliga 5:9, 10) O loo taʻua i le Tusi Paia lenā toetū o le “uluaʻi toetū,” e faailoa mai ai e iai se isi toetū e mulimuli mai. (Faaaliga 20:6; Filipi 3:11) O lenei toetū mulimuli o le toetū i luga o le lalolagi, lea o le a olioli ai le toʻatele o i latou o le a toe faatutūina aʻe ai.—Salamo 37:29.

 O le a faapefea ona toetutū aʻe tagata? Ua tuu atu e le Atua iā Iesu le mana e faatutū ai ē ua maliliu. (Ioane 11:25) O le a toe faatutūina e Iesu “i latou uma o loo i tuugamau,” ma toe faafoʻisia o latou uiga ma manatunatuga. (Ioane 5:28, 29) O i latou e toetutū aʻe i le lagi e latou te maua ni tino agaga, ae o le a maua e i latou e toetutū aʻe i le lalolagi ni tino faaletino mālōlōina lelei ma lelei atoatoa.—Isaia 33:24; 35:5, 6; 1 Korinito 15:42-44, 50.

 O ai o le a toetutū mai? Ua taʻua i le Tusi Paia “e toetutū mai tagata amiotonu ma tagata amiolētonu.” (Galuega 24:15) O tagata amiotonu e aofia ai tagata faatuatua e pei o Noa, Sara, ma Aperaamo. (Kenese 6:9; Eperu 11:11; Iakopo 2:21) O tagata amiolētonu, e aofia ai i latou e leʻi ola e ōgatusa ma tapulaa a le Atua, ae leʻi maua se avanoa e aʻoaʻoina ma ola ai i na tapulaa.

 Peitaʻi, o tagata amioleaga e lē mafai ona suia o latou ala, e lē toetutū mai. Pe a feoti i latou na, o le a faaumatia e faavavau, e leai se faamoemoe e toetutū mai.—Mataio 23:33; Eperu 10:26, 27.

 O afea o le a toetutū mai ai? Ua faailoa mai le Tusi Paia, o le a faatutūina i latou e toetutū i le lagi i le vaitaimi o le faatasi mai o Keriso, lea na amata i le 1914. (1 Korinito 15:21-23) O le a faatutūina i latou e toetutū i le lalolagi a o faagasolo le Afe Tausaga o le Pulega a Iesu Keriso, pe a avea le lalolagi ma parataiso.—Luka 23:43; Faaaliga 20:6, 12, 13.

 Aiseā e talafeagai ai ona talitonu i le toetū? O loo i le Tusi Paia ni tala e faatatau i ni toetū e iva na molimauina e tagata. (1 Tupu 17:17-24; 2 Tupu 4:32-37; 13:20, 21; Luka 7:11-17; 8:40-56; Ioane 11:38-44; Galuega 9:36-42; Galuega 20:7-12; 1 Korinito 15:3-6) O le faatūina e Iesu o Lasalo o se tala mataʻina, auā e fā aso talu ona oti Lasalo, ma na faia e Iesu le vavega i luma o se motu o tagata e toʻatele. (Ioane 11:39, 42) E oo lava iā i latou na tetee iā Iesu, na latou iloa le moni o lena vavega, ma latou taupulepule ai e fasiotia Iesu ma Lasalo.—Ioane 11:47, 53; 12:9-11.

 Ua faailoa mai i le Tusi Paia e mafai e le Atua ona faatūina ē ua oti, ma e naunau o ia e faia faapea. E na te manatua pea i latou o le a ia faatutūina e ala i lona malosi galue. (Iopu 37:23; Mataio 10:30; Luka 20:37, 38) E mafai e le Atua ona toe faafoʻisia le ola, ma e finagalo o ia e faia faapea! Ua faamatalaina i le Tusi Paia le toetū e faapea: “Ua e matuā naunau i le galuega a ou aao.”—Iopu 14:15.

Manatu sesē e faatatau i le toetū

 Tala Fatu: O le toetū e toe tuufaatasia ai le agaga ma le tino.

 Mea moni: Ua aʻoaʻo mai e le Tusi Paia, o le agaga e faasino atu i le tagata ola, ae lē o se vaega o le tagata e ola pea pe a oti. (Kenese 2:7; Esekielu 18:4) Pe a toetū se tasi, e lē uiga atu ua toe faatasi ma lona agaga, ae ua toe faatūina o ia o se tagata ola.

 Tala fatu: O nisi tagata e toetutū mai ma toe faaumatiaina i le taimi lava lenā.

 Mea moni: Ua faapea mai le Tusi Paia “o ē na faia mea leaga” o le a “toetutū i le faamasinoga.” (Ioane 5:29) Peitaʻi, o lenei faamasinoga e faavae mai i mea na latou faia ina ua uma ona toe faatutūina, ae lē o mea na faia a o leʻi toetutū mai. Na faapea mai Iesu: ʻE faalogo ē ua oti i le leo o le Atalii o le Atua, ma o i latou e faalogo i ai e maua le ola.’ (Ioane 5:25) O i latou e “faalogo” pe usiusitaʻi i mea latou te aʻoaʻoina pe a uma ona toe faatutūina mai, o le a faamauina o latou igoa i le “tusi tāʻai o le ola.”—Faaaliga 20:12, 13.

 Tala fatu: E toetū mai le tagata i lona tino na iai a o leʻi oti.

 Mea moni: Pe a oti le tagata, o le a pala lona tino ma toe foʻi i le efuefu.—Failauga 3:19, 20.