Pe e Ō Manu i le Lagi?

PLAY

Tali a le Tusi Paia

Ua faailoa mai i le Tusi Paia, e na o nai tagata lava o le a ō i le lagi, mai i foafoaga uma o loo iai i le lalolagi. (Faaaliga 14:1, 3) E latou te ō i le lagi ina ia pule mai o ni tupu ma ositaulaga faatasi ma Iesu. (Luka 22:28-30; Faaaliga 5:9, 10) O le toʻatele o tagata o le a toe faatutūina aʻe ma ola i le parataiso i le lalolagi.—Salamo 37:11, 29.

E lē o taʻua i le Tusi Paia se lagi mo fagafao po o se lagi mo taʻifau, ona o ni māfuaaga talafeagai. E lē mafai e manu ona uia laasaga ia e manaʻomia ina ia agavaa ai mo “le valaau mo le lagi.” (Eperu 3:1) O nei laasaga e aofia ai le mauaina o le poto, faaalia o le faatuatua, ma le usitaʻia o poloaʻiga a le Atua. (Mataio 19:17; Ioane 3:16; 17:3) E na o tagata na foafoaina ma le faamoemoe e ola e faavavau.—Kenese 2:16, 17; 3:22, 23.

Ina ia mafai ona ō atu i le lagi, e tatau ona toetutū mai foafoaga o loo i le lalolagi. (1 Korinito 15:42) O loo taʻua i le Tusi Paia nisi na toe faatutūina mai. (1 Tupu 17:17-24; 2 Tupu 4:32-37; 13:20, 21; Luka 7:11-15; 8:41, 42, 49-56; Ioane 11:38-44; Galuega 9:36-42; 20:7-12) Peitaʻi, e na o tagata na toetutū mai, ae e leʻi aofia ai ni manu.

O le ā e tupu i se manu pe a mate?

Ua faailoa mai i le Tusi Paia, e aofia uma tagata ma manu i “meaola.” O lea, e tutusa le ola o loo i tagata ma manu. E faia aʻe uma foʻi i ni vaega se lua: o le “efuefu o le eleele” ma le “mānava ola.”—Kenese 1:24; 2:7; Numera 31:28.

O loo taʻua foʻi i le Tusi Paia e mafai ona oti le tagata pe mate le manu. (Esoto 19:13) Pe a oti le tagata pe mate le manu, e toe foʻi uma atu i le efuefu o le eleele. (Failauga 3:19, 20) I nisi faaupuga, o le a lē toe iai.

Pe e agasala manu?

E leai. O le agasala e uiga atu i le mafaufau pe faia se mea e solia ai tapulaa a le Atua. E faatoʻā mafai ona faapea atu ua agasala se tasi, pe a mafai ona ia faia ni filifiliga i amioga tatau, ae e lē iai i manu lenā tomai. E gaoioi se manu e fua i le auala na foafoaina e gaoioi ai, i totonu o le taimi puupuu lea e ola ai. (2 Peteru 2:12) Pe a uma le taimi e mafai ona ola ai, ona mate loa lea, e ui e lē agasala.

Pe e tatau ona faasauā i manu?

E leai. Na tuuina atu e le Atua i tagata le pule i manu, ae e lē o le aiā e faasauā ai i manu. (Kenese 1:28; Salamo 8:6-8) E manatu mamafa le Atua i manu uma, e aofia ai ma tamaʻi manulele. (Iona 4:11; Mataio 10:29) Na ia faatonuina ona tagata tapuaʻi ina ia tausia faapelepele manu.—Esoto 23:12; Teuteronome 25:4; Faataoto 12:10.

Mau o le Tusi Paia e faatatau i manu

Kenese 1:28: “Ona faamanuia lea o le Atua [i uluaʻi tagata] ma ua fetalai atu le Atua iā i laʻua: ʻIa fanafanau ma ia matuā faatoʻateleina, ia tumu ai le lalolagi ma ia galueaʻiina, ia pule i iʻa o le sami ma manufelelei o le lagi ma meaola uma e fetolofi i le laueleele.’”

Uiga: Na tuuina atu e le Atua i le tagata le pule i manu.

Failauga 3:19, 20: “Auā o le iʻuga e oo i le fanau a tagata, o le iʻuga foʻi lea e oo i manu, e tutusa iʻuga e oo iā i latou uma. E pei ona mate o le tasi, e faapena foʻi ona oti o le isi; e tasi le agaga iā i latou uma, e leai se mea e sili ai le tagata i lo o le manu, auā e faatauvaa mea uma. E ō uma i latou i le mea e tasi. O i latou uma e mai i le efuefu, e toe foʻi atu i latou uma i le efuefu.”

Uiga: Pe a oti le tagata pe mate le manu, e toe foʻi uma atu i le efuefu o le eleele.

Faataoto 12:10: “E tausia faapelepele e le tagata amiotonu le ola o lana manu lata.”

Uiga: O tagata lelei e latou te tausia faapelepele manu, e aofia ai ma a latou fagafao.

Mataio 10:29: “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā.”

Uiga: E silasila ma e manatu mamafa mai le Atua i manu, e oo lava i tamaʻi manulele.