O le taua o Amaketo e faasino atu i le taua mulimuli i le va o faigāmalo a tagata ma le Atua. O nei faigāmalo ma ē o loo lagolagoina, o loo tetee pea i le Atua i lo latou lē gauaʻi i lana pule. (Salamo 2:2) O le a faaumatia faigāmalo a tagata i le taua o Amaketo.—Tanielu 2:44.

 E na o le faatasi ona taʻua i le Tusi Paia le upu “Amaketo” i le Faaaliga 16:16. O loo valoia i le Faaaliga o le a faapotopoto “tupu o le lalolagi uma . . . i le taua o le aso tele o le Atua o Lē e ona le malosi uma lava” “i le mea ua igoa i le upu Eperu o Amaketo.”—Faaaliga 16:14.

 O ai o le a tau iā Amaketo? O le a taʻitaʻia e Iesu Keriso se ʻautau faalelagi ma o le a manumalo ai i fili o le Atua. (Faaaliga 19:11-16, 19-21) O nei fili e aofia ai i latou e tetee ma lē faaaloalo i le pule a le Atua.—Esekielu 39:7.

 Po o le a tau moni le taua o Amaketo i Sasaʻe Tutotonu? E leai. E lē tauina le taua o Amaketo i le na o se vaega o le lalolagi, ae o le a aofia ai le lalolagi atoa.—Ieremia 25:32-34; Esekielu 39:17-20.

 O le upu Amaketo e taʻua i nisi taimi o “Har–Magedon” (i le faa Eperu o Har Meghiddohnʹ), o lona uiga o le “Mauga o Mekito.” O Mekito sa avea ma aai i le nofoaga na iai Isaraelu anamua. O loo taʻua i tala faasolopito nisi o taua na tauina i inā, e aofia ai taua o loo faamauina i le Tusi Paia. (Faamasino 5:19, 20; 2 Tupu 9:27; 23:29) Peitaʻi, o Amaketo e lē faasino atu i le nofoaga lea na latalata ane iā Mekito anamua. E leai se mauga telē o iai i inā, ma e oo foʻi i fanua laugatasi uma o Isereelu, e lē mafai ona ofi uma ai i latou o le a tau ma le Atua. O lea, o Amaketo e faasino atu i le taua o le a aofia ai le lalolagi atoa pe a aufaatasi atunuu uma e tetee atu i le pule a le Atua.

 O le a faapefea ona tauina le taua o Amaketo? E ui e tatou te lē iloa tonu le auala o le a faaaogā ai e le Atua lona mana, ae e mafai ona ia faaaogāina mea sa faaaogā i le taimi ua teʻa e pei o ua toʻa, mafuiʻe, lologa, afi ma le teiō, uila ma faamaʻi. (Iopu 38:22, 23; Esekielu 38:19, 22; Sapakuka 3:10, 11; Sakaria 14:12) O le fenuminumiaʻi o fili o le Atua, o le a latou fefasiotiaʻi ai ma iloa mulimuli ane ai, o loo latou tau faasaga i le Atua.—Esekielu 38:21, 23; Sakaria 14:13.

 Po o Amaketo o le iʻuga lenā o le lalolagi? E lē o le iʻuga lenā o le lalolagi paneta, ona o le nofoaga tumau lenā o le tagata. (Salamo 37:29; 96:10; Failauga 1:4) Nai lo o le faaumatiaina uma o tagata iā Amaketo, ae o le a faasaoina mai ai se “motu o tagata e toʻatele” o auauna a le Atua.—Faaaliga 7:9, 14; Salamo 37:34.

 E lē gata e faasino atu le upu lalolagi i le paneta, ae o loo faasino atu foʻi e le Tusi Paia le “lalolagi” i nisi taimi, i tagata amioleaga e tetee i le Atua. (1 Ioane 2:15-17) O lona uiga la, o Amaketo o le a aumaia ai le “gataaga o le lalolagi.”—Mataio 24:3, (Tusi Paia Samoa—Lomiga 1969)

 O afea o le a oo mai ai Amaketo? A o talanoaina le “puapuaga tele” lea e taualuga i le taua o Amaketo, na faapea mai Iesu: “A o lea aso ma lea itula e lē iloa e se tasi, e oo lava i agelu i le lagi po o le Atalii, ua na o le Tamā lava.” (Mataio 24:21, 36) O lea la, o loo faailoa mai i le Tusi Paia, o le a tupu le taua o Amaketo i le vaitaimi o le faatasi mai o Iesu, lea na amata i le 1914.—Mataio 24:37-39.