•  Tali a le Tusi Paia

•  E faapefea ona fanau se taupou?

•  O le ā le fuafuaga na fanaua ai e le taupou se tama?

•  Pe na avea pea Maria ma taupou?

•  Pe na aafia Maria i le agasala tuufaasolo a o iai i le manava o lona tinā?

•  O le ā le tatou vaaiga iā Maria?

 Ua taʻua i le Tusi Paia, na maua e Maria le tinā o Iesu se faaeaga mataʻina o le fanauina o Iesu a o avea pea ma taupou. Na valoia i le tusi a le perofeta o Isaia lenā vavega, ma o loo taʻua lona faataunuuga i tusi a Evagelia a Mataio ma Luka.

 Na valoia e Isaia le fanau mai o le Mesia e faapea: “Faauta! O le a tō le tamaʻitaʻi ma fanau mai se tama tama.” (Isaia 7:​14) Na faailoa atu e le agaga o le Atua i le tusitala o Mataio, o le faataunuuga o le valoaga a Isaia e faatatau atu i le taimi na tō ai Maria iā Iesu. Ina ua uma ona taʻua e Mataio le tō faavavega o Maria, na ia faapea mai ai: “Ua oo nei mea uma ina ia taunuu ai le afioga a Ieova, e ala i lana perofeta e faapea: ‘Faauta! O le a tō le taupou a ma fanau mai ai se tama tama, ma latou te faaigoa iā te ia o Emanuelu,’ o lona uiga pe a faaliliuina ‘Ua iā i Tatou le Atua.’”​—Mataio 1:​22, 23.

 Na taʻua foʻi e le Faievagelia o Luka le tō faavavega o Maria. Na ia tusi na auina mai e le Atua le agelu o Kaperielu “i se taupou o le a faaipoipo atu i se tane e igoa iā Iosefa mai le aiga o Tavita; ma o Maria le igoa o le taupou.” (Luka 1:​26, 27) Na faamautinoa mai e Maria o ia o se taupou. Ina ua uma ona taʻu atu e le agelu o le a avea o ia ma tinā o Iesu le Mesia, na fesili atu Maria: “E faapefea ona tupu o lenei mea, ae e ma te leʻi momoe ma se tamāloa?”​—Luka 1:​34.

 Na tō Maria i le agaga paia. (Mataio 1:​18) Na taʻu atu e le agelu iā Maria: “E iā te oe le agaga paia, ma e faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.” b (Luka 1:​35) Na tuuina faavavega e le Atua le ola o lona atalii i le manava o Maria, lea na māfua ai ona tō o ia.

 Na faaaogā e le Atua le taupou e fanaua Iesu i se tino lelei atoatoa, ina ia faasaoina ai tagata mai i le agasala ma le oti. (Ioane 3:​16; Eperu 10:5) Na tuuina e le Atua le ola o Iesu i le manava o Maria, ma na puipuia e le agaga paia o le Atua le afuafua aʻe o le pepe i totonu o le manava o Maria ina ia aua lava neʻi aafia i se tulaga lē lelei atoatoa.​—Luka 1:​35.

 O lea la, na mafai ai ona fanau Iesu o se tagata lelei atoatoa e tutusa lelei ma Atamu a o leʻi agasala. Ua faapea mai le Tusi Paia e uiga iā Iesu: “E leʻi faia e ia se agasala.” (1 Peteru 2:​22) Talu ai o Iesu o se tagata lelei atoatoa, ua mafai la ona ia totogia le togiola ina ia faasaʻoloto ai tagata mai i le agasala ma le oti.​—1 Korinito 15:21, 22; 1 Timoteo 2:​5, 6.

 E lē o aʻoaʻoina i le Tusi Paia na avea Maria ma taupou i lona olaga atoa. O loo taʻua i le Tusi Paia na iai foʻi isi fanau a Maria.​—Mataio 12:46; Mareko 6:3; Luka 2:7; Ioane 7:5.

 Leai. E tusa ai ma le New Catholic Encyclopedia, “e leʻi aafia le taupou o Maria i le AGASALA TUUFAASOLO ina ua fanau mai pe a o iai i le manava o lona tinā. O tagata uma ua aafia i le agasala tuufaasolo . . . Peitaʻi, o Maria ona o le ALOFA TUNOA, na puipuia ai o ia mai i le aafia i le agasala tuufaasolo.” c

 Peitaʻi, e lē o aʻoaʻoina e le Tusi Paia e faapea e leʻi aafia Maria i le agasala tuufaasolo. (Salamo 51:5; Roma 5:​12) O le mea moni, na faailoa mai e Maria lona tulaga agasala ina ua ia avatuina le taulaga mo agasala na manaʻomia ona avatu e tinā e tusa ai ma le Tulafono a Mose. (Levitiko 12:​2-8; Luka 2:​21-​24) Ua faapea mai le New Catholic Encyclopedia: “O le aʻoaʻoga e leʻi aafia le taupou o Maria i le agasala tuufaasolo, e lē o manino lona aʻoaʻoina i le Tusi Paia . . . O se aʻoaʻoga a le Lotu.”

 Na faataatia e Maria se faaaʻoaʻoga mataʻina o le faatuatua, usiusitaʻi, lotomaulalo ma le alofa i le Atua. O ia o se tasi o tagata faamaoni e tatou te faaaʻoaʻo i ai.​—Eperu 6:​12.

 Peitaʻi, e ui i lona tulaga mataʻina o le avea ma tinā o Iesu, ae e lē o aʻoaʻoina i le Tusi Paia e tatau ona tatou tapuaʻi ma tatalo iā Maria. E leʻi faamamaluina e Iesu lona tinā i se auala faapitoa, ma e na te leʻi faatonuina foʻi ona soo e faia faapea. O le mea moni, e na o tusi a Evagelia ma le taimi e tasi i le tusi o Galuega o loo taʻua ai Maria, ae e lē o taʻua i isi tusi e 22 o le Feagaiga Fou.​—Galuega 1:​14.

 E leai ni faamaoniga i le Tusi Paia na faamamaluina faapitoa Maria. E leʻi faatāuaina foʻi Maria i se auala faapitoa e Kerisiano i le uluaʻi senituri. Ua aʻoaʻoina e le Tusi Paia Kerisiano ina ia tapuaʻi tau lava o le Atua.​—Mataio 4:​10.