E ui e eseese le faauigaina faaletulafono e atunuu o lenei faaupuga “faaleagaina i faiga taufeusuaʻiga”, ae o le faaaogāina masani lava, e fesootaʻi atu i feusuaʻiga e lē manaʻomia, ma i nisi taimi e aofia ai le fai faamalosi. E mafai foʻi ona aofia ai faigaaiga faamalosi i tamaiti po o fanau talavou, faiga faamataifale, toso faamalosi ma le faaaogāsesē e se tasi e te maufaatuatuaina o lona tulaga e fai ai feusuaʻiga, atonu o ia o se fomaʻi, o se faiaʻoga, po o se faifeʻau. O nisi na aafia i le fai i ai o upu malolosi pe e sauāina, ua faamata‘uina pe a o latou ta‘uina o le a tupu se mea leaga iā i latou.

 E tusa ai ma se tasi suʻesuʻega, i tausaga taʻitasi i le Iunaite Setete lava ia, e toetoe o le kuata miliona o tagata, e lipotia mai e aafia i le faaleagaina i faiga taufeusuaʻiga. Pe ā o le ʻafa o i latou e i le va o le 12 i le 18 tausaga.

•   E taʻusala e le Tusi Paia tagata e faaleagaina isi i faiga taufeusuaʻiga. O loo ta‘ua i le Tusi Paia ni tagata na tu‘inanau i feusuaʻiga, na latou taumafai e toso faamalosi ni tamāloloa se to‘alua na asiasi atu i le aai o Sotoma, pe tusa o le 4,000 tausaga ua mavae, ma o lenei mea ua faamatilatila mai ai le māfuaaga na faaumatia ai e Ieova lenā aai. (Kenese 19:4-13) E lē gata i lea, o le Tulafono na tuu atu iā Mose pe ā o le 3,500 tausaga ua mavae, na faasāina ai faiga faamataifale, e aofia ai le faaleagaina o se tagata o se aiga i faiga taufeusuaʻiga.​—Levitiko 18:6.

•   E masani ona fai e se tasi e te masani ai nei faiga matagā. Na taʻua i le tusi Talking Sex With Your Kids “E to‘alua mai i le to‘atolu o ē na toso faamalosi, e latou te masani i tagata na faia nei uiga matagā. E lē o se tagata ese e teʻi lava ua tū faafuase‘i mai.”

•   O le faaleagaina i faiga taufeusuaʻiga e aafia uma ai tama ma teine. I le Iunaite Setete, pe ā o le 10 pasene o ē na aafia, o tama. E pei ona faamatalaina e se faalapotopotoga e ta‘ua o le Rape, Abuse & Incest National Network (RAINN), o tama na faileagaina “atonu e latou te popole ina neʻi avea i latou ma faafāfine ona o na faiga” pe e “manatu foʻi ua ‘leai so latou aogā.’ ”

•   E lē faateʻia i tatou i le faateteleina o le faaleagaina i faiga taufeusuaʻiga. Na valoia e le Tusi Paia “o aso e gata ai,” e toʻatele “e lē lotoaiga” ma e “sauā” ma “e lē amio pulea.” (2 Timoteo 3:1-3) O nei uiga, ua matilatila i tagata e maileia isi i feusuaʻiga.

•   E lē tuuaʻia lē na aafia i le faaleagaina i faiga taufeusuaʻiga. E leai se tasi e tatau ona faaleagaina i faiga taufeusuaʻiga. E tuuaʻia lava le tagata fai mea leaga i ana gaoioiga. Peitaʻi, e iai mea e mafai ona e faia e faaitiitia ai aafiaga i le faaleagaina i faiga taufeusuaʻiga.

•   Ia sauniuni. Ia e mua‘i iloa mea e fai pe a tauanau oe e se tasi o loo oulua tuutala po o se tauaiga fo‘i, e faia ni feusua‘iga. Na fautua mai se talavou e igoa iā Erin, ina ia sauniuni i so o se tulaga e faaosoosoina ai oe, ia e mua‘i mafaufau i ni mea e ono tutupu, ma sauniuni lau gaoioiga e fai. Na ia faapea mai, “Atonu e foliga mai e lē aogā au sauniuniga, ae pe a tupu moni se tulaga faapea, e itiiti la le avanoa e te ono aafia ai.”

   Ua faapea mai le Tusi Paia: “Ia outou matuā faautauta ina ne‘i outou savavali e pei o ē e vālea, ae ia pei o ē e atamamai, . . . auā o aso nei ua leaga.”​—Efeso 5:15, 16.

   Ia fesili ifo iā te oe lava: ‘O le ā ou te faia pe a tago mai se tasi iā te aʻu i se auala ou te lē manaʻo ai?’

•   Fuafua se auala e sola ese ai. Ua fautua mai le RAINN e tatau ona “i ai se upu faailo e faailoa atu ai i au uō po o lou aiga ua lē lelei le tulaga ua e oo i ai. E mafai ona e vili ma talanoa i ai i le mea o loo tupu, e aunoa ma le iloa e le tagata o loo oulua faatasi. E mafai ona ō mai au uō po o lou aiga e piki oe, pe latou te faia se faamolemolega e tou te ō ai.” O le a lē oo ni faafitauli iā te oe , pe a e ‘alofia i le taimi muamua tulaga e te lamatia ai.

   Ua faapea mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”​—Faataoto 22:3.

   Ia fesili ifo iā te oe lava: ‘O le ā se auala ua ou fuafua ou te sola ese ai?’

•  Ia iai ni tapulaa ma pipii i ai. O se faaaʻoaʻoga, afai o loo e tuutala, e tatau ona lua talanoa ma lau uō i amioga talafeagai ma amioga e lē talafeagai. Pe afai e manatu lau uō o loo oulua tuutala, o tapulaa o se mea valea, e tatau loa ona saʻili se isi au uō e faaaloalo i au tapulaa tauamio.

   Ua faapea mai le Tusi Paia: O le “alofa . . . e lē amio valea, e lē sa‘ili mo lona lava lelei.”​—1 Korinito 13:4, 5.

   Ia fesili ifo iā te oe lava: ‘O ā aʻu tapulaa tauamio? O ā amioga e lē talafeagai ma tapulaa tauamio?