E mafai ona aafia so o se tasi i tulaga e mafatia ai. Ua taʻua i le Tusi Paia: “E lē manumalo pea i le tausinioga o ē e saosaoa, pe e manumalo ē e malolosi i le taua, . . . e tutupu faafuaseʻi mea iā i latou uma i le taimi e leʻi faatalitalia.” (Failauga 9:11) E aofia ai nisi o talavou na latou fesagaʻia tulaga e mafatia ai. Na faapefea ona latou feagai ma na tulaga? Seʻi o tatou iloiloina ni faaaʻoaʻoga se lua.

•  REBEKAH

•  CORDELL

 Na tatala le faaipoipoga a oʻu mātua i le 14 o oʻu tausaga.

 Na ou manatu e lē taitai lava tatalaina le faaipoipoga a oʻu mātua, e na o sina taimi lava o loo manaʻomia e loʻu tamā e toe mafaufau ai i le tulaga o mea. E alofa o ia i loʻu tinā. Aiseā la o le a ia tuua ai o ia? Aiseā o le a ia tuua ai aʻu?

 Sa matuā faigatā ona ou talanoa i se isi i le mea ua tupu. Ou te leʻi fia mafaufau foʻi i ai. Na ou ita ae ou te leʻi iloaina o oʻu faalogona na. Na amata ona iai oʻu faalogona popole, ma na lē lelei ai saʻu moe.

 Na maliu loʻu tinā i le kanesa ina ua 19 oʻu tausaga. O ia o laʻu uō e sili ona ou māfana i ai.

 Afai na faateʻia aʻu ina ua tatala le faaipoipoga a oʻu mātua, na sili atu la ona ou matuā faanoanoa ina ua maliu loʻu tinā. O loo iai pea na faalogona i le taimi nei. Ua atili ona lē lelei ai saʻu moe ma o loo iai pea oʻu faalogona popole.

 I lenā taimi, e tele mea na fesoasoani iā te aʻu. O se faataʻitaʻiga, o loo lapataʻia i tatou i le Faataoto 18:1 e ʻalofia le faaesea o i tatou lava, o lea na ou taumafai ai e utagia lenā fautuaga.

 E lē gata i lea, ona o aʻu o se Molimau a Ieova na ou taumafai ai e faitau i a tatou lomiga faalaeiau faale-Tusi Paia. O se tasi o lomiga sa sili ona fesoasoani iā te aʻu ina ua tatala le faaipoipoga a oʻu mātua, o le tusi Questions Young People Ask​—Answers That Work. Aemaise lava i le Tusi lona 2 i le mataupu ua faamatuaina, “Pe e Mafai Ona Ou Fiafia i se Aiga e Toʻatasi le Matua?”

 O se tasi o mau ou te fiafia i ai mo le taulimaina o loʻu popole o le Mataio 6:​25-34. I le fuaiupu e 27 na fesili ai Iesu: “O ai ea se tasi o outou e mafai e lona popole ona toe faaopoopo ni nai aso i lona olaga?”

 E tutupu mea leaga iā i tatou uma, ae na ou aʻoaʻoina mai i le faaaʻoaʻoga a loʻu tinā, e tāua le auala e tatou te feagai ai ma na tulaga faigatā. E tele mea na ia faafesagaʻia, e pei o le tatala o le faaipoipoga ma se maʻi faaumiumi lea na iʻu lava ina maumau ai lona soifua, ae e ui lava i na tulaga, na ia faatumau pea se vaaiga saʻo ma faamalosia lona faatuatua i le Atua seʻia oo ina maliu. E lē galo mea na ia aʻoaʻoina ai au e faatatau iā Ieova.

 Ia mafaufau i ai: E faapefea ona fesoasoani le faitauina o le Tusi Paia ma lomiga faale-Tusi Paia iā te oe, e feagai ai ma tulaga e mafatia ai?​—Salamo 94:19.

 O le 17 o oʻu tausaga na maliu ai loʻu tamā. O lona maliu o le mea sili lea ona faigatā na tupu i loʻu olaga. Na ou matuā mafatia lava.

 Na ou manatu e leʻi oti loʻu tamā, ma e lē o ia lea e faaʻafu lona tino i ie. Na ou faapea ifo, ‘O le a toe ala mai i le taeao.’ Na ou lagona le leai o se aogā ma le lē mautonu.

 E Molimau a Ieova lo matou aiga, ma na lagolagosua malosi mai la matou faapotopotoga ina ua maliu loʻu tamā. Na latou aumaia meaʻai, lotomalilie e matou te nonofo faatasi ma e latou te leʻi tuulafoaʻia i matou. Na umi se taimi o o latou faia faapea. O la latou lagolagosua, na ou mautinoa ai o Molimau a Ieova o Kerisiano moni.​—Ioane 13:35.

 O se tasi o mau na sili ona faalaeiauina ai aʻu o le 2 Korinito 4:​17, 18. O loo faapea mai: “E ui lava e puupuu ma māmā puapuaga, ae e iʻu ai ina maua e i tatou le mamalu, o le mamalu e sili atu ma e faavavau; a o taulaʻi atu la tatou vaai i mea e lē vaaia ae e lē o mea e vaaia. Auā o mea ua vaaia e lē tumau ia, a o mea e lē o vaaia e faavavau ia.”

 Na matuā pāʻia loʻu loto i le fuaiupu mulimuli o le mau. E lē tumau le tulaga na mafatia ai loʻu tamā, ae o folafolaga a le Atua mo le lumanaʻi e faavavau. O le maliu o loʻu tamā na fesoasoani iā te aʻu e mafaufau ai i le auala na faaaogā ai loʻu olaga, ma fetuunaʻi ai oʻu sini.

 Ia mafaufau i ai: E faapefea i se mea na e mafatia ai ona fesoasoani e toe fetuunaʻi ai ou sini i le olaga?​—1 Ioane 2:17.