Atonu o nisi nei o māfuaaga e te faapea mai ai, e te lē fia alu i le aʻoga: E sauā faiaʻoga, o faaosoosoga mai i tamaiti, e faigatā suʻega, ma le tele o meaaʻoga e tatau ona fai. a Ua faapea mai se talavou e igoa iā Rachel: b

 “E sili atu loʻu iai i se isi nofoaga nai lo o loʻu iai i le aʻoga. E sili atu loʻu alu e tafao i le matafaga, faifaimea faatasi ma aʻu uō, pe fesoasoani foʻi i oʻu mātua i feʻau i le fale!”

 Afai o ou faalogona foʻi na, e foliga mai la o lou auai i le aʻoga e tai pei o loo tuli lou faasalaga i le falepuipui, lea e manaʻomia ona e onosaia seʻiloga e te faauu ona tatala mai lea o oe i tua. Faamata e iai se isi auala e te maua ai le vaaiga saʻo i le auai i le aʻoga?

 E te silafia? Pe a iai iā te oe se vaaiga saʻo, o le a e vaai ai i le alu i le aʻoga o se mea e te manaʻo e fai ae e lē o se mea e tau lava ina fai. Pe a e mafaufau faapena, o le a avea le auai i le aʻoga o se meafaigaluega aogā e fesoasoani iā te oe e atiaʻe ma faaleleia ai tomai e te manaʻomia pe a avea oe ma tagata matua.

 Ina ia maua se vaaiga saʻo i le auai i le aʻoga, taumafai e uaʻi i vala nei:

 O mea e te aʻoaʻoina. Pe a tele mea e te aʻoaʻoina, o le a lelei le auala e te taulimaina ai faafitauli pe a e faigaluega ma i isi vala o le olaga, nai lo o le faalagolago pea i isi. Ia fesili ifo, ‘E ui e iai mea ou te lē fiafia ai i le aʻoga, ae o ā aogā e maua mai i mea o loo oʻu aʻoaʻoina?’

 Mataupu silisili o le Tusi Paia: “Ia e leoleo i le atamai aogā ma le mafaufau lelei.”—Faataoto 3:21.

 O au masaniga. O masaniga lelei e te aʻoaʻoina mai i le aʻoga, o le a e iloa ai faaaogā tatau le taimi, faaalia le amio pulea, ma iloa le tāua o le galue mamafa, o ni uiga e te manaʻomia pe a avea oe ma tagata matua. Ia fesili ifo: ‘E faapefea i masaniga lelei ou te aʻoaʻoina mai i le aʻoga ona fesoasoani iā te aʻu e avea ai o sē e amio pulea ma sē e galue mamafa? E faapefea ona ou faaleleia nei vala?’

 Mataupu silisili o le Tusi Paia: “E iai aogā o so o se ituaiga o galuega mamafa.”—Faataoto 14:23.

 O auala e te feutagaʻi ai ma isi. O le auala e tou te feutagaʻi ai ma tamaiti e tou te aʻoʻoga faatasi, e mafai ona fesoasoani iā te oe e faaalia ai le tigā alofa ma le faaaloalo i isi. Ua faapea mai se tama talavou e igoa iā Joshua: “O le aʻoaʻoina o le auala e feutagaʻi ai ma isi, e taitutusa lona tāua ma le aʻoaʻoina o mataupu e faatatau i le talafaasolopito ma le faasaienisi. O se tomai e te manaʻomia i lou olaga atoa.” Ia fesili ifo, ‘O ā ni lesona ua ou aʻoaʻoina mai i le aʻoga e faatatau i le mauaina o ni faiā lelei ma isi, e tusa pe eseese o matou talaaga po o talitonuga?’

 Mataupu silisili o le Tusi Paia: “Ia outou tausisi i le filemu ma tagata uma.”—Eperu 12:14.

 O lou lumanaʻi. E fesoasoani mea e te aʻoaʻoina mai i le aʻoga ina ia e iloa ai ou tomai ma faatutū sini e talafeagai ma na tomai. Ua faapea mai se teine talavou e igoa iā Brooke: “Atonu o le a e maua toleniga e patino i se matātā e pei o aʻu, ma o le a faigofie ai ona maua sau galuega pe a e faauu.” Ia fesili ifo: ‘O le a faapefea ona ou tausia aʻu lava pe a uma aʻu aʻoga? E faapefea ona ou faamautinoa ou te aʻoaʻoina tomai e manaʻomia mo lenā ituaiga o galuega?’

 Mataupu silisili o le Tusi Paia: “Ia iloa le ala o loo e agaʻi atu i ai.”—Faataoto 4:26, Contemporary English Version.