“O aʻu uō o loo iai, e na o le pau na o tagata ou te vavalalata i ai. Ma e faigatā ona ou faauō atu i isi.”​—Alan.

 “E toʻalaiti aʻu uō, ma ou te fiafia ai a. Ou te lē fiafia e talanoa i tagata ou te lē masani ai.”​—Sara.

 Pe e pei ou lagona o Alan ma Sara? Pe e iai ni au uō ua e vavalalata i ai, ma e lē manaʻo ai e fai nisi au uō fou?

 Pe afai o le tulaga lenā, e fetaui la le mataupu lea iā te oe!

•  Itu e lē lelei ai lou tausisi na o au uō vavalalata

•  Mea e mafai ona e faia

•  Tala a isi talavou

 E lē sesē le iai o ni uō e te vavalalata i ai. O le iai o ni uō e te vavalalata i ai e te lagona ai le alofagia, ma iloa o loo iai nisi e talia le ituaiga tagata e iai oe, e ui i ou masei.

 “E lelei ou faalogona pe a amanaʻia oe e nisi ma avea ma vaega o se faigāuō. A o e talavou, e te manaʻo e fiafia mai isi iā oe.”​—Karen, 19.

 E te silafia? E toʻatele uō a Iesu, lea na aofia ai ma ona aposetolo e toʻa 12. Ae o le toʻatolu o i latou na, o Peteru, Iakopo ma Ioane, o ana uō vavalalata.​—Mareko 9:2; Luka 8:​51.

 O le mea moni, o lou faifaimea faatasi na o au uō vavalalata lava, ma lē faauō atu i isi, e tutupu ai faafitauli. Mo se faataʻitaʻiga:

•   O le a taofia ai oe mai le mauaina o nisi faauōga lelei.

   “O le tausisi i au uō masani, o le a e lē aʻoaʻoina ai ni mea fou ma ni mea lelei mai isi tagata.”​—Evan, 21.

•   O le a e lē fia masani ai i isi.

   “Pe a e māfana atu na o au uō vavalalata, o le a manatu ai nisi e te lē fia talanoa i isi tagata.”​—Sara, 17.

•   O le a avea ai oe ma se tagata faatupu misa.

   “E tusa pe lē o oe o se tagata faatupu misa, ae afai e faapena au uō, o le a e manatu ai o se mea lelei ma mālie le faatupu misa.”​—James, 17.

•   O le a e oo ai i faafitauli, aemaise pe a e lē manaʻo e suia au uō, po o le ā lava le mea e tupu.

   “E na o le tasi lava se tagata leaga i se faauōga, e mafai ona taaʻina le toʻatele i le faia o mea leaga.”​—Martina, 17.

•   Iloilo au taʻiala.

   Ia fesili ifo iā te oe lava: ʻO ā taʻiala o loo oʻu taumafai e ola ai? Po o faafaigofie po o faafaigatā e aʻu uō, ona ou ola i na taʻiala? Pe o le a ou faamuamua aʻu uō e tusa po o le ā le mea e tupu?’

   Mataupu silisili faale-Tusi Paia: “O aumea leaga e faaleagaina ai mea lelei ua masani ai tagata.”​—1 Korinito 15:33.

   “Pe afai e te faauō i tagata e lē tutusa a outou taʻiala, o le a iʻu atu ai i lou faia o mea e lē tatau ona e faia.”​—Ellen, 14.

•   Iloilo mea e te faamuamua.

   Ia fesili ifo iā te oe lava: ʻPe ua ou vavalalata tele i aʻu uō, ma ou solia ai taʻiala e tatau ona ou ola ai ina ia faafiafia ai i latou? O le ā laʻu mea e fai pe a faia e saʻu uō se mea sesē?’

   Mataupu silisili faale-Tusi Paia: “O ē uma ou te alofa faapelepele i ai, ou te aʻoaʻi . . . iā i latou.”​—Faaaliga 3:​19.

   “Pe afai e tupu se faafitauli i se tasi o au uō ma e lē faamaoni ai, o le a avea o se luʻi le taumafai e faasaʻo i latou.”​—Melanie, 22.

•   Ia faalautele atu lau faauōga.

   Ia fesili ifo iā te oe lava: ʻPe e mafai ona ou maua aogā pe a ou faauō atu i isi ou te lē masani lelei ai?’

   Mataupu silisili faale-Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:4.

   “O tamaiti e lē taʻutaʻua, atonu o loo fesagaʻia ni faafitauli i o latou aiga. Ae o le taimi lava e te faamasani ai iā i latou, o le a e iloa ai o i latou foʻi o ni tagata lelei.”​—Brian, 19.

 O le manatu autū: E lē sesē le iai o ni uō e te vavalalata i ai. Ae i le taimi e tasi, e te maua foʻi aogā i le faalautele atu o lau faauōga i isi. Ua faapea mai le Tusi Paia: “O lē e na te matuā faasūsū isi, o le a matuā faasūsūina o ia.”​—Faataoto 11:25.