IA FAAAUAU ONA MATAALA!
2022: Se Tausaga o Faafitauli—O le ā se Manatu o le Tusi Paia?
I le tausaga 2022, na tele ina tatou faalogo ma faitau ai i tala o taua, faafitauli tau tamaoaiga, ma mala e faaleagaina ai le siʻosiʻomaga. E na o le Tusi Paia e mafai ona faamatalaina le māfuaaga moni o nei mea o loo tutupu.
Le māfuaaga moni o mea na tutupu i le 2022
O mea na tutupu i le tausaga ua teʻa, ua atili faamaonia ai o loo tatou ola i le vaitaimi o loo taʻua i le Tusi Paia “o aso e gata ai.” (2 Timoteo 3:1) Na amata mai lenā vaitaimi i le tausaga 1914. Mātau le fesootaʻiga o mea na tutupu talu ai nei, ma mea na valoia i le Tusi Paia e tutupu i o tatou aso:
“Taua.”—Mataio 24:6.
“O le Tausaga 2022 na Toe Pagatia ai Europa i Taua.” a
Tagaʻi i le mataupu “Osofaʻia e Rusia le Atunuu o Ukraine.”
“Oge.”—Mataio 24:7.
“2022: Se Tausaga o le Matuā Matelāina.” b
Tagaʻi i le mataupu “Matuā Utiuti Meaʻai i le Lalolagi Aoao Ona o le Taua i Ukraine.”
“Faamaʻi.”—Luka 21:11.
“O le toe foʻi mai o le faamaʻi pipili, o le faateteleina o le faamaʻi o le monkeypox, ma le faaauau ona iai o aafiaga o le KOVITI-19, ua iloa ai le mataʻutia o faamaʻi pipisi, ma le faigofie ona maua ai o tagata.” c
Tagaʻi i le mataupu “Ua 6 Miliona Tagata Maliliu i le KOVITI.”
“Vaaiga e matataʻu ai.”—Luka 21:11.
“O le matuā vevela, o lāmala, o mū tetele ma lologa. O le a manatuaina pea le tau māfanafana o le 2022, ona o mea mataʻutia na tutupu ai ona o suiga o le tau, lea na faaleagaina ai le tele o mea, maliliu ai le faitau afe o tagata, ma faaleagaina ai fale o le faitau miliona i le lalolagi aoao.” d
Tagaʻi i le mataupu “Faateteleina le Vevela i le Lalolagi Aoao.”
“Fouvalega.”—Luka 21:9.
“O le matuā feita o tagata i faafitauli tau tamaoaiga, aemaise lava le taugatā o le soifuaga, na māfua ai le tele o solo tetee faasaga i faigāmalo i le 2022.” e
Tagaʻi i le mataupu “Taugatā le Soifuaga i le Lalolagi Aoao.”
O ā ni mea o le a tutupu i le tausaga fou?
E leai se tasi o i tatou e mafai ona valoia mai mea o le a tutupu i le tausaga 2023. E pau le mea e tatou te iloa, e lē o toe umi ona faalaa mai lea o le Malo o le Atua, o se pulega i le lagi, ina ia aumaia le tele o suiga i le lalolagi. (Tanielu 2:44) O le a tafiesea e lenā malo le pogai o mafatiaga o tagata, ma faamautinoa e faataunuuina le finagalo o le Atua i le lalolagi.—Mataio 6:9, 10.
E matou te faalaeiau oe e mulimuli i le fautuaga a Iesu Keriso, ina “ia faaauau ona mataala” i le auala o loo faataunuu ai e mea o loo tutupu i le lalolagi valoaga a le Tusi Paia. (Mareko 13:37) Faamolemole faafesootaʻi mai i matou pe a e fia iloa atili le auala e fesoasoani ai le Tusi Paia iā te oe i le taimi lenei, ma pe e faapefea ona e maua ma lou aiga se faamoemoe mo se lumanaʻi e sili atu ona lelei.
a AP News, “O le Tausaga 2022 na Toe Pagatia ai Europa i Taua,” tusia e Jill Lawless, Tesema 8, 2022.
b World Food Programme, “Utiuti Mea Taumafa i le Lalolagi Aoao.”
c JAMA Health Forum, “Soifuaga i le Vaitau o Faamaʻi—KOVITI-19, Monkeypox, Faamaʻi Pipili, ma Isi Faamaʻi,” tusia e Lawrence O. Gostin, JD, Setema 22, 2022.
d Earth.Org, “O le ā le Māfuaaga o Suiga Mataʻutia o le Tau i le 2022?” tusia e Martina Igini, Oketopa 24, 2022.
e Carnegie Endowment for International Peace, “Faapogaia e Faafitauli Tau Tamaoaiga le Tele o Solo Tetee i le Lalolagi Aoao i le 2022,” tusia e Thomas Carothers ma Benjamin Feldman, Tesema 8, 2022.