O faiga faapolotiki ua māfua ai ona fevaevaeaʻi tagata o atunuu i le lalolagi aoao. E tusa ai ma se suʻesuʻega a le Pew Research Center i le 2022, “o le 65% o tagata na auai i lenei suʻesuʻega i atunuu e 19 ua latou faapea mai, ua fevaevaeaʻi pe matuā fevaevaeaʻi tagata i o latou atunuu o ē o loo lagolagoina vaega faaupufai eseese.”

 Po ua e mātauina le faateteleina o fevaevaeaʻiga i lou vaipanoa ona o faiga faapolotiki? O le ā le māfuaaga? Pe e iai se vaifofō? Ia iloilo manatu o le Tusi Paia.

 Na valoia i le Tusi Paia, o le a faaalia e le toʻatele o tagata uiga o le a faafaigatā ai ona maua le autasi i o tatou aso, lea e taʻua o “aso e gata ai.”

•   “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, . . . o ē e mumusu i maliega.”—2 Timoteo 3:1-3.

 E ui i taumafaiga lelei a le toʻatele o tagata, ae e lē o taulau lava faigāmalo. Ua faigatā po ua lē mafai ona galulue faatasi tagata o ē feteenaʻi o latou manatu ina ia taumafai e foʻia faafitauli. Ua faamaonia ai le saʻo o faamatalaga a le Tusi Paia ua leva ona faamauina.

•   ʻUa pule le tagata i le isi tagata ma ua matuā afāina ai o ia.’—Failauga 8:9.

 Peitaʻi, ua faamatilatila i le Tusi Paia le vaifofō—o se faigāmalo e taʻitaʻia e se tasi e mafai ona tafiesea faafitauli o loo pagatia ai tagata i aso nei.

 O loo taʻua i le Tusi Paia se taʻitaʻi e agavaa e foʻia faafitauli o tagata, o Iesu Keriso lea. E iā Iesu le mana, le pule, ma le faanaunauga e autasia ma aumai ai le filemu i tagata uma.

•   “O lana nofoaiga, e tupu olaola ai lē e amiotonu, e tele foʻi le filemu.”—Salamo 72:7.

•   “E auauna foʻi atunuu uma iā te ia.”—Salamo 72:11.

 Ua fetaui lelei le avea o Iesu ma taʻitaʻi, auā e manatu mamafa i tagata ma e manaʻo e fesoasoani iā i latou, aemaise ē o loo feagai ma faiga lē tonu.

•   “E laveaʻi e ia le tagata mativa o loo alaga mo se fesoasoani, atoa foʻi ma lē e faatauvaa ma lē ua leai sona fesoasoani. E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva. E laveaʻiina e ia i latou mai i le pule sauā ma faiga sauā.”—Salamo 72:12-14.

 Ia aʻoaʻo atili e faatatau i le Malo o le Atua, o le faigāmalo i le lagi o loo taʻitaʻia e Iesu. O le a e iloa ai faamanuiaga e te mauaina mai i lenā pulega, ma auala e te lagolagoina ai le pulega a Iesu.

•   Maimoa i le vitiō O le ā le Malo o le Atua?

•   Faitau i le mataupu “Malo o le Atua—O se Malo e Lē Iai ni Faiga Piʻopiʻo.”