IA FAAAUAU ONA MATAALA!

Aiseā ua Lē Mafai ai e Tagata Ona Maua le Filemu?—O le ā le Manatu o le Tusi Paia?

PLAY

Ua lē mafai e taʻitaʻi o le lalolagi ma faalapotopotoga faavaomalo ona aumaia le filemu. Ua sili atu ona leaga taua i aso nei, pe a fua i isi taua na tutupu talu mai le Taua Lona Lua a le Lalolagi. E pe ā ma le lua piliona tagata o loo nonofo i atunuu o loo fetauaʻi, e tusa lea o le kuata o le aofaʻiga o tagata i le lalolagi aoao.

Aiseā ua lē mafai ai e tagata ona aumaia le filemu? O le ā le Manatu o le Tusi Paia?

E tolu māfuaaga e lē mafai ai e tagata ona aumaia le filemu

1. Ua faaalia e tagata uiga e faigatā ai ona faatupu le filemu. O le valoaga lea a le Tusi Paia e faatatau i o tatou aso: “E avea tagata ma ē e alolofa iā i latou lava, o ē e mananaʻo tele i tupe, o ē e gugutu, o ē e faamaualuluga, . . . o ē e lē faamaoni, . . . o ē e mumusu i maliega, . . . o ē e lē amio pulea, o ē e sauā, . . . o ē e faaulumalō, o ē ua faafefeteina i le faamaualuga.”—2 Timoteo 3:2-4.
2. E lē mafai e tagata ona foʻia o latou faafitauli e aunoa ma le fesoasoani a Lē na foafoaina i latou, o Ieova a le Atua. Ua faailoa mai i le Tusi Paia, “e lē o i le tagata . . . e savali ona faatonuina le mea e ui ai o ia.”—Ieremia 10:23.
3. O loo pulea le lalolagi e Satani le Tiapolo, o se agaga malosi ma leaga, “o lē ua faasesēina le lalolagi atoa.” (Faaaliga 12:9) A o ʻnofo toʻilalo le lalolagi atoa i le pule a lē o loo leaga,’ o le a faaauau pea ona iai taua ma fevesiaʻiga.—1 Ioane 5:19.

O ai e mafai ona aumaia le filemu?

Ua faamautinoa mai i le Tusi Paia, o le a aumaia e le Atua le filemu ae lē o tagata.

“ʻAuā ua ou iloa lelei manatu ua ou manatu ai iā te outou,’ ua fetalai mai ai Ieova, ʻo manatu o le filemu ae e lē o le malaia, ina ia avatu iā te outou se lumanaʻi ma se faamoemoe.’”—Ieremia 29:11.

E faapefea ona faataunuu e le Atua lenā folafolaga? ʻO le a tuʻimomomoina Satani e le Atua o lē e na te aumaia le filemu.’ (Roma 16:20) Ina ia maua le filemu i le lalolagi aoao, o le a faaaogā e le Atua se pulega i le lagi lea e taʻua i le Tusi Paia o “le Malo o le Atua.” (Luka 4:43) O le a aʻoaʻoina tagata ina ia tausia le filemu i le pulega a Iesu Keriso, le Tupu o lenā Malo.—Isaia 9:6, 7.