Ua tumu tala fou i faamatalaga faatigā, o solitulafono ona o le feitagaʻi, o sauāga i le vā o ituaiga, ma taua.

•   “Ua matuā taatele i le social media faamatalaga faatigā ona o le fetauaʻiga i le vā o Isaraelu ma Kasa, faapea faiga a tagata faatupu faalavelave.”​—The New York Times, Novema 15, 2023.

•   “Talu mai Oketopa 7, ua faatupulaʻia faamatalaga faatigā ma faiga sauā ona o le faailoga tagata.”​—Dennis Francis, le peresitene o le Fono Sili a Malo Aufaatasi, Novema 3, 2023.

 Ua leva ona iai faafitauli e pei o faamatalaga faatigā, o faiga sauā, ma taua. Ua faamatala i le Tusi Paia nisi o tagata i aso anamua o ē na “taʻi a latou upu oona e pei o aū,” ma naunau i taua ma faiga sauā. (Salamo 64:3; 120:7; 140:1) Peitaʻi, ua taʻua i le Tusi Paia ua sili atu ona mataʻutia le feitagaʻi lea ua tatou vaaia i aso nei.

 E lua māfuaaga o loo taʻua i le Tusi Paia ua taatele ai le feitagaʻi i aso nei.

1.  1. O loo valoia ai se vaitaimi “o le a maalili [ai] le alofa o le toʻatele.” (Mataio 24:12) Nai lo o le faaalia o le alofa, ua faaalia e tagata uiga e faatupu ai le feitagaʻi.​—2 Timoteo 3:1-5.

2.  2. O le mataʻutia o le feitagaʻi o tagata i aso nei, ua atagia mai ai taaʻiga leaga ma sauā a Satani le Tiapolo. Ua faapea mai le Tusi Paia: “O le lalolagi atoa o loo nofo toʻilalo i le pule a lē o loo leaga.”—1 Ioane 5:19; Faaaliga 12:9, 12.

 E ui i lea, ua faailoa mai foʻi e le Tusi Paia ua toeitiiti ona aveesea e le Atua mea o loo faapogaia le feitagaʻi. E lē gata i lea, o le a ia foʻia faalogona tigā na māfua mai i le feitagaʻi. Ua folafola mai e le Tusi Paia:

•   ʻE soloiesea e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’—Faaaliga 21:4.