E tusa ai ma se lipoti a le lalolagi aoao talu ai nei, a e pe ā ma le toʻatasi le tagata mai i tagata e toʻafā e aafia i faalogona tuua toʻatasi.

•   “O le faaesea o tagata mai i isi, e mafai ona tupu i so o se tagata po o le ā lava le matua, ma po o fea foʻi e nofo ai.”​—Chido Mpemba, o se taʻitaʻifono o le Faalapotopotoga o le Soifua Mālōlōina i le Lalolagi i Fesootaʻiga ma Tagata.

 E manatu le toʻatele e na o tagata matutua ma ē e nonofo na o i latou e lagona le tuua toʻatasi. Peitaʻi, e aafia ai foʻi talavou, o ē e malolosi, o ē e lelei le tamaoaiga, ma ulugalii faaipoipo. O le faaesea o tagata mai i isi ma faalogona tuua toʻatasi, e mafai ona matuā aafia ai le soifua mālōlōina ma faalogona o se tasi.

•   Ua faapea mai Dr. Vivek Murthy o le fomaʻi sinia i le matagaluega o le soifua mālōlōina i le Iunaite Setete: “O faalogona tuua toʻatasi, e sili atu ona matuiā nai lo o faalogona lē lelei.” Na ia taʻua foʻi: “E mafai ona lamatia le ola o se tasi i le faaesea o ia mai i isi, e talitutusa ma le lamatia o le ola o se tagata e ulaula i ni sikareti e 15 i aso taʻitasi.”

 E lē finagalo Lē na foafoaina i tatou ina ia faaesea i tatou mai i isi. O lona finagalo mai lava i le amataga ia olioli tagata i ni faauōga lelei ma māfana.

•   Mataupu silisili o le Tusi Paia: “Ua fetalai ane Ieova le Atua: ʻE lē lelei mo le tagata ona ola na o ia.’”​—Kenese 2:18.

 E finagalo le Atua ia tatou atiaʻe se faauōga ma ia. Na ia folafola mai o le a ia mafuta vavalalata mai, pe a fai a tatou taumafaiga e mafuta vavalalata atu iā te ia.​—Iakopo 4:8.

•   Mataupu silisili o le Tusi Paia: “E fiafia o ē e manatu mamafa i o latou manaʻoga faaleagaga, auā e fai mo i latou le Malo o le lagi.”​—Mataio 5:3.

 E finagalo le Atua ia tatou tapuaʻi atu iā te ia faatasi ma isi. O le faia faapea, o le a faaleleia ai o tatou faalogona.

•   Mataupu silisili o le Tusi Paia: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou . . . ae ia fefaalaeiauaʻi.”​—Eperu 10:24, 25.

 Mo nisi faamatalaga i māfuaaga e tāua ai ona foʻia faalogona tuua toʻatasi, ia faitau i le mataupu “Lagona o le Tuua Toʻatasi i se Lalolagi ua Tele ai Fesootaʻiga.”