Ua sasao faaafi faiga sauā faapolotiki i le tele o atunuu.

•   O le tagatavaleina o le toʻa 39 o nisi o sui tauvā i faigāpalota i Mekisikō, atoa ai ma isi faiga sauā, ua matuā faateʻia ai tagata a o faagasolo faigāpalota o le 2023-2024, ma o se mea e leʻi tupu muamua.

•   E leʻi leva atu nei ona aafia Europa i faiga sauā faapolotiki, lea e aofia ai taumafaiga e tagatavaleina le palemia o Slovakia iā Me 15, 2024.

•   Iā Iulai 13, 2024, na taumafai ai nisi e tagatavaleina lē na avea ma peresitene o le Iunaite Setete o Donald Trump, ma o se mea na faateʻia ai tagata.

 Aiseā ua sasao faaafi ai faiga sauā faapolotiki? Po o le a iai se taimi e muta ai? O le ā le manatu o le Tusi Paia?

 Na valoia i le Tusi Paia e toʻatele tagata o le a faaalia uiga e faatupu ai sauāga ma fevaevaeaʻiga i “aso e gata ai,” lea ua tatou ola ai i le taimi lenei.

•   “O aso e gata ai e oo mai ai aso e sili ona faigatā. Auā e avea tagata ma . . . ē e lē lotofaafetai, o ē e lē faamaoni, . . . o ē e mumusu i maliega, . . . o ē e sauā, . . . o ē e faalata, o ē e faaulumalō, o ē ua faafefeteina i le faamaualuga.”—2 Timoteo 3:1-4.

 Na valoia foʻi i le Tusi Paia o le a taatele fouvalega e pei o solo tetee ma fevesiaʻiga faapolotiki i nei aso e gata ai. (Luka 21:9) E ui i lea, o le a lē tumau e faavavau faiga sauā ma fevaevaeaʻiga faapolotiki.

 O loo faamatala i le Tusi Paia o le a suia e le Atua faigāmalo a tagata i lona Malo i le lagi.

•   ʻO le a faatūina e le Atua o le lagi o le malo o le a tuʻimomomoina ma faaumatia isi malo uma, ae e tumau lea malo e faavavau.’—Tanielu 2:44.

 O le a autasia e le Malo o le Atua tagata o atunuu uma, ma aumaia le filemu i le lalolagi aoao.

•   O le Tupu o lenā Malo o Iesu Keriso lea, o lē ua taʻua o le “Perenise o le Filemu,” ma o le a ia faamautinoa “e leai se mea e gata mai ai le tele o . . . le filemu.”—Isaia 9:6, 7.

•   E oo lava i le taimi lenei, ua aʻoaʻoina e tagatānuu o lenā Malo auala e tausia ai le filemu. O le iʻuga, ua faapea mai le Tusi Paia: “E latou te tuʻi a latou pelu e fai ma uʻamea o suōtosina ma a latou tao e fai ma pelu e teu ai laau. E lē toe sii le pelu a le tasi atunuu i le tasi atunuu, pe latou te toe aʻoaʻo foʻi i taua.”—Isaia 2:3, 4.

 Mo nisi faamatalaga, ia faitau i le mataupu faa-Peretania “What Will God’s Kingdom Accomplish?” ma maimoa i le vitiō O le ā le Malo o le Atua?