Iā Ianuari 27, 2023, o le a faamanatu ai e le toʻatele le Aso Faamanatu Faavaomalo o le Fasiotiga Tagata na Faia e le ʻAu Nasi. E silia ma le 75 tausaga talu ona tupu lenā faiga mataʻutia. Atonu ua e taumānatu pe aiseā na faataga ai e le Atua na fasiotiga tagata mataʻutia.

•   Ina ia iloa le manatu o le Tusi Paia, faitau i le mataupu “Aiseā na Tupu ai le Fasiotiga Tagata na Faia e le ʻAu Nasi? Aiseā e Leʻi Taofia ai e le Atua?”

 Na matuā puapuagatia tagata Iutaia i lenā taimi. Na fuafua lelei e le ʻAu Nasi le fasiotiga o le faitau miliona o i latou. Na sauāina foʻi ma fasiotia tagata o isi vaega. O nisi o i latou o Molimau a Ieova o ē na sauāina ona o o latou talitonuga faale-Tusi Paia.

•   Ia faitau atili i le mea na tupu i le mataupu faa-Peretania, “What Happened to Jehovah’s Witnesses During the Time of the Holocaust?”

 E popole le toʻatele ina neʻi toe tupu se fasiotiga tagata faapea. Ae o le mea e faafetai ai, ona o loo folafola mai e le Tusi Paia se lumanaʻi e lē toe tupu ai se tulaga mataʻutia faapena.

•   “ʻAuā ua ou iloa lelei manatu ua ou manatu ai iā te outou,’ ua fetalai mai ai Ieova, ʻo manatu o le filemu ae e lē o le malaia, ina ia avatu iā te outou se lumanaʻi ma se faamoemoe.’”—Ieremia 29:11. a

 O le a faataunuuina lenā faamoemoe pe a faamutaina e Ieova le Atua faiga leaga uma, ma toe faaleleia mea na faaleagaina. Ua toeitiiti ona gaoioi lea o Ieova ina ia:

•   Faaumatia tagata e faia mea leaga i isi tagata.—Faataoto 2:22.

•   Faamālōlō tagata uma na puapuagatia.—Faaaliga 21:4.

•   Toe faatutūina ē na feoti i le lalolagi.—Ioane 5:28, 29.

 E mafai ona e maufaatuatuaina le faamoemoe faamāfanafanaloto o loo i le Tusi Paia. Ina ia iloa atili lenā faamoemoe, e matou te valaaulia ma le faaaloalo oe e faataʻitaʻi se suʻesuʻega faale-Tusi Paia e aunoa ma se totogi.