O le leai o se galuega o se mea e sili ona faigatā, e lē gata i le itu tautupe, ae faapea foʻi i faalogona ma le mafaufau. Iloilo nisi o fautuaga e faavae mai i mataupu silisili o le Tusi Paia, e mafai ona fesoasoani iā te oe.

•   Talanoa i isi e faatatau i ou faalogona.

   Le manatu o le Tusi Paia: “O le uō moni e alofa i taimi uma.”—Faataoto 17:17.

   Pe a leai sau galuega, atonu e te lagona le faanoanoa, ita, lē mautonu, po o le lē taulau. Pe a faailoa atu ou faalogona i se tasi o lou aiga po o sau uō vavalalata, e mafai ona ia fesoasoani iā te oe ina ia e lagona le toʻafilemu. Atonu e latou te avatu foʻi fautuaga aogā e fesoasoani iā te oe e suʻe ai se isi au galuega.

•   ʻAlofia le soona popole.

   Le manatu o le Tusi Paia: “Ia aua neʻi outou popole mo le aso a taeao, auā e iai foʻi popolega o le aso a taeao.”—Mataio 6:34.

   Ua faalaeiauina i tatou e le Tusi Paia ina ia fuafua mamao. (Faataoto 21:5) Peitaʻi, ua fautuaina foʻi i tatou e ʻalofia le soona popole i mea e tutupu i le lumanaʻi. E masani ona tatou popole i mea atonu e lē tutupu. Ae o se gaoioiga atamai, le uaʻi atu i mea e mafai ona tatou faia i le asō.

   Ua aumaia foʻi i le Tusi Paia isi fautuaga aogā i le auala e faafetaiaʻia ai ou lagona popole. Ina ia malamalama atili, faitau i le mataupu “Auala e Feagai ai ma le Popole.”

•   Ia faia suiga talafeagai i le auala e faasoasoa ai au tupe.

   Le manatu o le Tusi Paia: ʻUa ou aʻoaʻoina le auala e feagai ai ma le tele o mea ma le leai o ni mea.’—Filipi 4:12.

   Ia fetuunaʻi le auala e te ola ai ma le tulaga ua iai. E aofia ai le faia o ni suiga i le auala e te faaaogā ai tupe, ina ia aua neʻi soona faaalu i mea e lē tāua. Ia faaeteete i le faia o aitalafu e lē manaʻomia.—Faataoto 22:7.

   Mo nisi fautuaga i le auala e fetuunaʻi ai le auala e te ola ai ma tupe ua e maua, tagaʻi i le mataupu “Le Auala e Feagai ai ma le Utiuti o Tupe Maua.”

•   Ia faaaogā tatau lou taimi.

   Le manatu o le Tusi Paia: “Ia outou savavali pea ma le atamai . . . , ia outou faaaogā tatau le taimi.”—Kolose 4:5.

   E ui lava ua lē toe iai se faasologa masani e pei o le taimi a o e faigaluega, ae ia tausisi pea i se faasologa lelei i le auala e faaaogā tatau ai lou taimi. O le faia faapea, o le a fesoasoani iā te oe e faatulaga lelei ai au mea e fai i lou olaga, ma ʻalofia ai le lotovaivai.

•   Ia fetuutuunaʻi.

   Le manatu o le Tusi Paia: ʻE iai aogā o so o se ituaiga o galuega mamafa.’—Faataoto 14:23.

   Ia lotomalie e faia galuega e ese mai i galuega sa e faia muamua. Atonu e manaʻomia ona e iloilo galuega e foliga mai e lē tāua pe laʻitiiti le totogi, nai lo o lau galuega sa iai muamua.

•   Aua le fiugofie.

   Le manatu o le Tusi Paia: ʻIa e lūlū au fatu i le taeao ma aua neʻi mālōlō lou lima seʻia oo i le afiafi; auā e te lē iloa po o lē fea e taulau manuia.’—Failauga 11:6.

   Ia saʻili pea se galuega. Ia faailoa atu i isi o loo suʻe sau galuega. Talanoa i ou tauaiga, tagata tou te masani, o i latou na outou faigaluega muamua, ma tuaoi. Saʻili atu i matagaluega e gafa ma le saʻilia o galuega, o faasalalauga o avanoa faigaluega i nusipepa ma isi auala, faapea avanoa faigaluega i luga o Upega tafaʻilagi a kamupani. Ia nofosauni e alu i so o se faatalanoaga o avanoa faigaluega, ma ia tele ni au tusi apalai e ave seʻia oo ina maua sau galuega.