E pe ā ma le lima piliona tagata na faatalitalia e matamata i le taamilosaga a le FIFA mo le Ipu o le Lalolagi i le soka, lea na amata iā Novema 20 seʻia oo iā Tesema 18, 2022. E manatu le toʻatele, e tele atu mea e mafai ona faataunuuina i nei taamilosaga, nai lo o le tau ina autasia ai o tagata matamata.

•   “E iai le malosiaga i taaloga e suia ai le lalolagi. E iai le malosiaga e uunaʻia ma faaosofia ai tagata. E iai foʻi le malosiaga e autasia ai tagata i se auala mataʻina.”—Nelson Mandela, o lē na avea ma peresitene o Aferika i Saute.

•   “O le soka . . . ua autasia ai i se faamoemoe, autasia ai i le olioli, autasia ai i lagona, autasia ai i le alofa, ma autasia ai e ui i le eseese o ituaiga.”—Gianni Infantino, peresitene o le FIFA. a

 Pe e mafai e le Ipu o le Lalolagi po o nisi taamilosaga ona ausia ai na sini tāua? Pe e iai se faamoemoe mo le mauaina o le filemu ma le autasi?

 O le Ipu o le Lalolagi i lenei tausaga, e manatu tagata e tele mea e aofia ai nai lo o le taaloga soka. O nei taaloga ua faapogaia ai manatu eseese o tagata i mataupu tau i le vafealoaʻi ma mataupu faapolotiki, ia e aofia ai aiā tatau a tagata, faiga faailogalanu, ma le eseese o tulaga tau tamaoaiga.

 E ui i lea, e toʻatele lava e fiafia e matamata i nei taamilosaga e pei o le Ipu o le Lalolagi. Peitaʻi, e ui ina latou mananaʻo ia autasia ai tagata, ae e lē o mafai ona maua ai se autasi e tumau. Nai lo lea, e masani ona faaalialia ai gaoioiga ma uiga fevaevaeaʻi, ia o loo taʻua i le Tusi Paia e mātaulia ai lenei vaitaimi e taʻua o “aso e gata ai.”—2 Timoteo 3:1-5.

 O loo taʻua i le Tusi Paia se faamoemoe moni e autasia ai le lalolagi atoa. Ua folafola mai ai o le a autasia tagata uma o le lalolagi, i lalo o se pulega i le lagi ua taʻua “o le Malo o le Atua.”—Luka 4:43; Mataio 6:10.

 O le a faamautinoa e Iesu Keriso le Tupu o lenā Malo, le iai o le filemu i le lalolagi atoa. Ua faapea mai le Tusi Paia:

•   “E tupu olaola ai lē e amiotonu, e tele foʻi le filemu.”—Salamo 72:7.

•   “E laveaʻi e ia le tagata mativa o loo alaga mo se fesoasoani . . . E laveaʻiina e ia i latou mai i le pule sauā ma faiga sauā.”—Salamo 72:12, 14.

 E oo lava foʻi i aso nei, e faitau miliona tagata i atunuu e 239, ua mafai ona autasia ona o aʻoaʻoga a Iesu. Ua latou aʻoaʻoina e lē tatau ona feita i tagata e ese mai iā i latou. Ina ia aʻoaʻo atili e faatatau i lenei mataupu, faitau i le faasologa o mataupu ua faaulutalaina “Aveesea Atoatoa le Feitagaʻi.”