E pei ona tatou vaaia i le taua i Ukraine, e toʻatele taʻitaʻi lotu Kerisiano o loo faalaeiauina tagata ina ia lagolagoina le taua. Mātau auala o loo lagolagoina ai e nisi o taʻitaʻi lotu le tasi itu taua, ae lagolagoina e nisi taʻitaʻi lotu le isi itu:

•   “E matuā faamālō atu ma faafetai i o tatou toa manumanu, o loo tau e puipuia o latou tagatānuu Ukraine mai i pulega sauā . . . E matou te matuā lagolagoina ma tatalo ma o matou lotoatoa mo outou.”—Metropolitan Epiphanius I o Kyiv, e pei ona lipotia mai e le The Jerusalem Post, Mati 16, 2022.

•   “Na faia i le Aso Sa, e le faauluuluga o le lotu Orthodox a Rusia se sauniga faalelotu faapitoa mo fitafita a Rusia. Na ia faalaeiauina i latou ina ia puipuia lo latou atunuu, ona e ʻna o tagata Rusia e mafai ona faia faapea,’ a o faaauau ai osofaʻiga a le ʻautau a Moscow e faasaga iā Ukraine.”—Reuters, Aperila 3, 2022.

 Pe e tatau ona iai se vaega a Kerisiano i faigātaua? O le ā se manatu o le Tusi Paia?

 Ua faailoa mai i le Tusi Paia, e lē auai i taua i latou e usitaʻi moni iā Iesu Keriso.

•   “Ia toe sulu lau pelu i lona faamoega, auā o i latou uma e tago i le pelu, e faaumatia i le pelu.”—Mataio 26:52.

   Pe a lagolagoina e se tasi faigātaua, pe auai foʻi i taua, po o usitaʻi moni lava o ia i fetalaiga a Iesu?

•   “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”—Ioane 13:34, 35.

   Pe a lagolagoina e se tasi faigātaua, po o ia faaalia la le alofa lea na fetalai Iesu o le a iloa ai ona soo moni?

 Mo nisi faamatalaga, faitau i le mataupu “Pe e Talafeagai Taua ma le Faa-Kerisiano?”

 Pe e mafai moni lava e Kerisiano ona ʻalofia le auai i taua i aso nei? Ioe. Na valoia mai i le Tusi Paia e faapea, pe a oo mai i o tatou aso lea e taʻua o “aso e gata ai,” o le a iai tagata mai atunuu uma o le a ʻlē toe aʻoaʻo i taua,’ e pei lava ona fetalai ai Iesu.—Isaia 2:2, 4.

•   Mo nisi faamatalaga, faitau i le faasologa o mataupu “O le ā le Silafaga a le Atua i Taua?” o loo i Le Olomatamata.

 Ua toeitiiti lava gaoioi Ieova, a “le Atua o le filemu,” e faaaogā lona malo i le lagi ina ia laveaʻiina tagata “mai i le pule sauā ma faiga sauā.”—Filipi 4:9; Salamo 72:14.

•   Ina ia iloa le auala o le a faia ai faapea e Ieova, maimoa i le vitiō O le ā le Malo o le Atua?