A o amata le 2023, e tatou te faamoemoe uma ia taulau manuia o tatou olaga ma o tatou aiga. Aiseā e mafai ai ona tatou faamoemoe faapena?

 Ua faailoa mai i le Tusi Paia le tala lelei, e lē tumau faafitauli o loo tatou fesagaʻia ma e lē o toe umi ae faamutaina. O le mea moni, na tusia le Tusi Paia “e faatonu ai i tatou, ina ia tatou maua le faamoemoe e ala i . . . le faamāfanafana mai o Tusitusiga Paia.”—Roma 15:4.

•   Ina ia iloa atili e faatatau i folafolaga a le Tusi Paia, faitau i le mataupu “O se Faamoemoe Moni mo se Lumanaʻi Manuia.”

 O le faamoemoe o loo i le Tusi Paia e pei o se “taula i o tatou ola.” (Eperu 6:19) O lenā faamoemoe e faamausalīina ai i tatou. E faapefea? E fesoasoani iā i tatou e onosaia ai faafitauli i le taimi nei, iai se vaaiga saʻo, ma maua le fiafia e tumau. O se faaaʻoaʻoga:

•   Ia mātau le auala na fesoasoani ai le faamoemoe o loo i le Tusi Paia i se tamāloa na pulea e le ʻava malosi. Maimoa i le vitiō Ou te Leʻi Fiafia i Loʻu Olaga.

•   Ia mātau le auala e fesoasoani ai iā i tatou le faamoemoe o loo i le Tusi Paia, pe a maliu sē e pele iā i tatou. Maimoa i le vitiō Faamāfanafanaga mo Ē Faavauvau.

 E toʻatele e faamoemoe e tutupu ni mea lelei iā i latou, ae e latou te lē mautinoa pe e taunuu. Ae e ese mai ai folafolaga a le Tusi Paia. Aiseā? Talu ai o folafolaga a le Tusi Paia e mai iā Ieova le Atua, a ma “e lē mafai ona tala pepelo” o ia. (Tito 1:2) E na o Ieova e iai le mana e faataunuu ai ana folafolaga uma; e mafai ona ia faia “mea uma ua ia finagalo i ai.”—Salamo 135:5, 6.

 Tau ina ia e faatuatua i le faamoemoe o loo i le Tusi Paia. E mafai ona atiaʻe lou faatuatua e ala i le “matuā iloiloina [o] Tusitusiga Paia.” (Galuega 17:11) E mafai ona e faataʻitaʻia se suʻesuʻega faale-Tusi Paia e aunoa ma se totogi. Tau ina ia iā te oe se vaaiga mautinoa a o amata le 2023!