“E maua le filemu i le lalolagi pe a faaalia le magafagafa, e ala i le talia o manatu o isi ma mea e fiafia i ai.”—UNESCO Declaration of Principles on Tolerance, 1995.

 I le isi itu, o le lē taliaina o manatu o isi ma mea e fiafia i ai, o le a faapogaia ai le feitagaʻi ma le lē faaaloalo. O na uiga, e masani ona iʻu atu i le faia o faamatalaga faatigā, le faailoga tagata ma faiga sauā.

 Peitaʻi, e eseese uma manatu o tagata i lenei mataupu. E manatu nisi, o se tagata magafagafa e na te talia so o se amioga. Ae o nisi e ioe i le manatu lea e lagolagoina e le Tusi Paia. E latou te manatu, o se tagata e magafagafa e na te faaaloalogia aiā a isi i le auala e manatu ma amioaʻi ai. Peitaʻi, e lē faapea e na te taliaina na amioga ma mafaufauga.

 Pe e mafai ona fesoasoani le Tusi Paia i tagata i aso nei, e iloa le auala saʻo e faaalia ai le magafagafa?

Faavae faale-Tusi Paia o le magafagafa i isi

 E fautuaina i le Tusi Paia le magafagafa po o le faaaloalo i manatu o isi. O loo taʻua ai, “Ia iloa e tagata uma lo outou magafagafa.” (Filipi 4:5) Ua faalaeiauina i tatou e le Tusi Paia, ia manatu mamafa i isi ma feutagaʻi ma i latou i se auala faaaloalo ma lē faaituʻau. O i latou e faatatauina lenei fautuaga, atonu e latou te lē ioe pe lē taliaina manatu ma amioga a se tasi, ae e latou te faaaloalogia pea ana filifiliga i le auala e ola ai.

 Peitaʻi, ua faailoa mai i le Tusi Paia tapulaa a le Atua i le auala e tatau ona ola ai tagata. Ua faapea mai le Tusi Paia: ʻLe tagata e, ua fetalai mai le Atua iā te oe i le mea lelei.’ (Mika 6:8) Ua faailoa mai ai foʻi faatonuga a le Atua, e fesoasoani ai i tagata ia maua ni olaga fiafia.—Isaia 48:17, 18.

 E leʻi tuuina mai e le Atua iā i tatou le aiā e faamasinosino ai i isi. Ua faapea mai le Tusi Paia: “E toʻatasi lava le Faitulafono ma le Faamasino, . . . O ai ea oe e te faamasino ai i lou tuaoi?” (Iakopo 4:12) Ua aumaia e le Atua iā i tatou taʻitoʻatasi le saʻolotoga e faia ai a tatou lava filifiliga, ma tofo ai i iʻuga e oo i ai.—Teuteronome 30:19.

Manatu o le Tusi Paia i le faaaloalo

 Ua faapea mai le Tusi Paia, “e tatau ona tatou faaaloalo i tagata uma.” (1 Peteru 2:17, New Jerusalem Bible) O lea, o i latou e ola e tusa ai ma tapulaa o le Tusi Paia, e latou te faaaloalo i so o se tagata e tusa po o ā o latou talitonuga ma le auala e ola ai. (Luka 6:31) O lenei manatu, e lē faapea ai o le a talia e i latou o loo ola e ōgatusa ma le Tusi Paia, talitonuga ma manatu uma o isi. E lē faapea foʻi o le a latou lagolagoina filifiliga uma e faia e isi. Peitaʻi, e latou te taumafai malosi e faaaʻoaʻo i le auala na feutagaʻi ai Iesu ma isi, e ala i le feutagaʻi ma na tagata i se auala faaaloalo.

 O se faataʻitaʻiga, o le taimi na feiloaʻi ai Iesu ma se fafine e ese ona talitonuga, mai i le mea na ioe i ai Iesu. Na nonofo foʻi lenei fafine ma se tamāloa e lē o sana tane, o se ituaiga o olaga e lē taliaina e Iesu. Ae na talanoa atu pea Iesu i le fafine i se auala faaaloalo.—Ioane 4:9, 17-24.

 I le pei o Iesu, e nofosauni Kerisiano e faamatala atu māfuaaga o o latou talitonuga i ē e naunau e faalogo, ae e latou te faia faapea ma le “matuā faaaloalo.” (1 Peteru 3:15) Ua faatonuina e le Tusi Paia Kerisiano, ina ia ʻalofia le faamalosia o isi e ioe i o latou manatu. Ua taʻua foʻi i le Tusi Paia, o sē e mulimuli i le Keriso “e lē manaʻomia ona faamisa . . ., ae e tatau ona agamalu i tagata uma,” e aofia ai ma i latou e ese o latou talitonuga.—2 Timoteo 2:24.

Manatu o le Tusi Paia i le feitagaʻi

 Ua fautuaina i tatou e le Tusi Paia ina ia “tausisi i le filemu ma tagata uma.” (Eperu 12:14) O se tasi e tausia le filemu, e lē ʻinoʻino i isi ma e na te lē faia se mea e faatupu ai le feitagaʻi. E na te faia le mea sili e nonofo filemu ai faatasi ma isi, e aunoa ma le lolo atu e faia se mea e feteenaʻi ma tapulaa tauamio ma talitonuga e na te faatāuaina. (Mataio 5:9) O le mea moni, ua faalaeiauina foʻi Kerisiano e le Tusi Paia ina ia alolofa i o latou fili, e ala i le agalelei atu pea iā i latou o loo agaleaga mai.—Mataio 5:44.

 E ui lava o loo taʻua i le Faataoto 6:16-19, e “ʻinoʻino” pe e “matuā inosia” e le Atua gaoioiga e taʻufaatauvaa pe aafia ai isi tagata, ae o le upu “ʻinoʻino” i inei, o loo faamatala ai se faalogona malosi o le lē fiafia i gaoioiga leaga. Ua faailoa mai i le Tusi Paia, e nofosauni le Atua e faamagalo ma fesoasoani iā i latou o loo mananaʻo e suia o latou olaga, ae ola e tusa ma ana tapulaa.—Isaia 55:7.

Mau o le Tusi Paia e faatatau i le magafagafa ma le faaaloalo

 Tito 3:2: “Ia magafagafa, ma ia matuā agamalu i tagata uma.”

 Mataio 7:12: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”

 Iosua 24:15: “Inā outou filifili ia i le aso nei po o ai e tou te auauna i ai.”

 Galuega 10:34: “E lē faailoga tagata le Atua.”

 Sapakuka 1:12, 13: ʻE lē mafai ona silasila le Atua i le amioleaga.’

 Roma 12:19: “Ia tuu atu i le toʻasā [o le Atua]; auā ua tusia: ʻO aʻu e faia le tauimasui; ou te taui atu lava,’ ua fetalai mai ai Ieova.” a

 E leʻi tuuina e Ieova le Atua i se tasi le aiā e faia ai le tauimasui. E na te faamautinoa o le a faia le faamasinogatonu i lana taimi tatau. Mo nisi faamatalaga, faitau i le mataupu “Po o le a Iai i le Lalolagi se Faamasinogatonu?”