E tusa ai ma se lipoti a le Faalapotopotoga o le Soifua Mālōlōina i le Lalolagi, iā Me 23, 2022, e 6.27 miliona tagata ua maliliu ona o le KOVITI-19. Ae i se lipoti muamua atu iā Me 5, 2022, na taʻua ai e le Faalapotopotoga o le Soifua Mālōlōina i le Lalolagi, o le a sili atu ona toʻatele tagata e maliliu i le Koviti. Na faamatalaina i lea lipoti, i le 2020 ma le 2021, “o le fuainumera o tagata maliliu, o ē na aafia patino i le KOVITI-19 ma ē na aafia i le faamaʻi ae e iai o latou maʻi tumau . . . e pe ā ma le 14.9 miliona.” O le ā se faamatalaga a le Tusi Paia e faatatau i na tulaga mataʻutia?

•    Na valoia e Iesu o le a iai faamaʻi po o “faamaʻi mataʻutia,” a o faagasolo le vaitaimi ua taʻua “o aso e gata ai.”—Luka 21:11, Contemporary English Version; 2 Timoteo 3:1.

 Ua faataunuuina le valoaga a Iesu i aso nei. Ina ia malamalama atili, tagaʻi i le mataupu “O le ā le Faailoga o ʻAso e Gata ai,’ po o ʻTaimi o le Iʻuga’?”

•    ʻO le Atua o faamāfanafanaga uma, o lē e na te faamāfanafanaina i tatou i o tatou puapuaga uma.’—2 Korinito 1:3, 4.

 Ua faamāfanafanaina le toʻatele o ē ua maliliu ē pele iā i latou i le feʻau mai i le Tusi Paia. Ina ia malamalama atili, tagaʻi i mataupu “Auala e Feagai ai ma Faalogona Faavauvau—Mea e Mafai Ona e Faia i le Taimi Nei” ma “Le Fesoasoani Sili mo Ē Faavauvau.”

•    ʻIa oo mai lou Malo. Ia faia lou finagalo i le lalolagi, e pei ona faia i le lagi.’—Mataio 6:10.

 Ua toeitiiti ona gaoioi lea ʻo le Malo o le Atua,’ ina ia faamautinoa e leai se tasi e toe faapea mai: “Ou te maʻi.” (Mareko 1:14, 15; Isaia 33:24) Maimoa i le vitiō O le ā le Malo o le Atua? ina ia malamalama ai e faatatau i lenei malo i le lagi, ma mea o le a faia e lea malo.

 E matou te valaaulia oe e aʻoaʻo atili e faatatau i le manatu o le Tusi Paia, ina ia outou maua faatasi ai ma lou aiga aogā mai i fautuaga atamai ma folafolaga matagofie o loo iai.