“A o oʻu laʻitiiti, na fasi aʻu e loʻu tuagane i ana upu ma gaoioiga i aso uma. O le mea foʻi lenā na fai e le tinā o loʻu toʻalua ina ua uma ona ou faaipoipo. Na pei aʻu o se pologa i mātua o laʻu tane. Na ou fia pule i loʻu ola.”—Madhu a mai i Initia.

 Ua faamautinoa mai e le Faalapotopotoga o le Soifua Mālōlōina i le Lalolagi, “Ua faateteleina sauāga i fafine i le lalolagi aoao.” I se fua faatatau, e toʻatasi mai i le toʻatolu fafine ua fasi po ua faileagaina tau feusuaʻiga i se taimi o lona olaga.

 Afai na tupu se mea faapena iā te oe, e te lagona le fefe i so o se mea e te alu i ai ina neʻi sauāina oe e se isi a lē o upu, o le fasi, po o le faia o faiga matagā taufeusuaʻiga iā te oe. Ona o le sauāina ma le faileagaina o fafine, e te ono manatu ai o le toʻatele o tagata e mafaufau e lē tāua fafine. Ae pe e tāua fafine i le silafaga a le Atua?

 Mau: ʻUa foafoaina e le Atua i laʻua o le tane ma le fafine.’—Kenese 1:27.

 Uiga: Na foafoaina e le Atua tane ma fafine. I lana silafaga, e tatau ona faaaloalo uma i tane ma fafine. E na te faatalitalia foʻi le tane e “alofa i lana lava avā e pei ona ia alofa iā te ia lava,” ma aua le pule malosi i lana avā i le faia o upu masoā pe faaoolima iā te ia. (Efeso 5:33; Kolose 3:19) E manino mai la, e tāua i le Atua le tulaga malupuipuia o fafine.

 “Na faia e nisi o oʻu tauaiga ni faiga matagā tau feusuaʻiga iā te aʻu a o oʻu laʻitiiti. Ina ua 17 oʻu tausaga, na faafefe aʻu e loʻu pule o le a tuli aʻu mai le galuega pe afai e ma te lē momoe. Ina ua ou matua, na vaai maulalo laʻu tane, o oʻu mātua, ma oʻu tuaoi iā te aʻu. Peitaʻi, na ou aʻoaʻoina mulimuli ane le poto e faatatau iā Ieova, b o Lē na foafoaina mea. E matuā faaaloalo Ieova i fafine. Ua ou mautinoa ai e alofa Ieova iā te aʻu, ma e tāua aʻu i lana silafaga.”—Maria mai i Anitenitina.

 Mau: “E iai le uō e sili ona alofa faamaoni nai lo o le uso.”—Faataoto 18:24.

 Uiga: O le a lagolagoina oe e se uō moni. Afai e te manaʻo i ai, ia faailoa atu ou faalogona i se tasi e te faatuatuaina.

 “Na faia e se tagata ni faiga matagā taufeusuaʻiga iā te aʻu, ma ou te leʻi faailoaina i se tasi mo le 20 tausaga. O le iʻuga, na ou faanoanoa, popole, ma maua i le lotomafatia. Ae ina ua ou faailoa atu le mea na tupu i sē na faalogologo lelei mai, na pei e matuu atu se avega mamafa.”—Elif mai i Take.

 Mau: “[Ia] lafo atu o outou popolega uma [i le Atua], auā o loo manatu mamafa mai o ia iā te outou.”—1 Peteru 5:7.

 Uiga: Pe a e tatalo, e faafofoga moni mai lava le Atua. (Salamo 55:22; 65:2) Talu ai e manatu mamafa mai iā te oe, e na te fesoasoani foʻi la iā te oe ina ia e iloa lou tāua.

 “Na amata ona ou maua le mapusaga i oʻu faalogona mafatia ina ua ou aʻoaʻoina mea e faatatau iā Ieova. Ua mafai nei ona sasaa atu oʻu faalogona i le Atua i le tatalo. E pei o ia o se uō e malamalama moni i oʻu faalogona.”—Ana mai i Belize.

 Mau: “E te [Ieova] faia le faamasinogatonu i tama ua leai ni tamā ma ē ua tuʻimomomoina, ina ia lē toe faamataʻu ane iā i latou se tagata na faia mai i le eleele.”—Salamo 10:​17, 18.

 Uiga: O le a tafiesea e le Atua faiga lē tonu uma e aofia ai sauāga i fafine.

 “E tai pei o se vai e faamālōlō ai loʻu iloaina ua toeitiiti ona taofia lea e Ieova o le faileagaina o fafine ma teineiti. Ua ou maua ai le filemu o le mafaufau.”—Roberta mai i Mekisikō.

 Ina ia iloa atili le faamoemoe o loo taʻua i le Tusi Paia, o māfuaaga e mafai ona e maufaatuatuaina ai folafolaga o loo iai, ma auala o loo saunia ai e Molimau a Ieova le fesoasoani mai i le Tusi Paia i aso nei, ia talosaga ina ia asiasi atu se isi e aunoa ma se totogi.

 Fai se kopi lolomi o lenei mataupu.