O le ā le Manatu o le Tusi Paia i le Utiuti o Mea Taumafa i Aso Nei?

PLAY

“E lē toe iai se fia ʻai.” O le sini lenā o taʻitaʻi o malo o le lalolagi, ina ia foʻia ai se tasi o faafitauli telē o loo iai nei, o le lē mafai ona saunia o meaʻai mo tagata uma o le lalolagi. a Pe e iai moni se taimi o le a lē toe fia ʻai ai se tasi? O le ā le manatu o le Tusi Paia?

Na valoia e le Tusi Paia o le a utiuti mea taumafa i aso nei

Na valoia i le Tusi Paia o le a utiuti mea taumafa i le vaitaimi lenei ua tatou ola ai, lea e taʻua o “aso e gata ai.” (2 Timoteo 3:1) E lē o le Atua le faapogai o le utiuti o mea taumafa, ae na ia lapataʻia i tatou o le mea lenā o le a tupu. (Iakopo 1:13) O nisi nei o valoaga e lua o loo i le Tusi Paia.

“O le a iai foʻi oge . . . i lea mea ma lea mea.” (Mataio 24:7) O loo taʻua i lenei valoaga o le a iai le oge i le tele o nofoaga. Ua faamaonia lenā manatu i se lipoti mai i tagata e suʻesuʻeina le auala e saunia ma faasoasoa ai meaʻai. Ua latou faapea mai: “E lē o taulau taumafaiga a le lalolagi e taofia le oge, ma ua faateteleina le utiuti po o le lē lava o mea taumafa e tausia ai le soifua mālōlōina.” b Ua faitau selau miliona tagata i le tele o atunuu ua lē mafai ona maua meaʻai e latou te manaʻomia, ma e faanoanoa ona o le toʻatele o i latou ua maʻimau ai o latou soifua.

“Faauta foʻi! o le solofanua uliuli, ma o lē o loo tiʻetiʻe ai ua i lona lima se fua faatautau.” (Faaaliga 6:5) I lenei valoaga, o loo faaata mai ai e le solofanua ma lē o loo tiʻetiʻe ai, oge i aso e gata ai. c O le fua faatautau o loo i le lima o lē o loo tiʻetiʻe i le solofanua, e faaaogā e fua lelei ai se vaega itiiti o meaʻai ina ia mafai ona faasoasoa mo tagata uma. A o tamoʻe le solofanua, na faalogoina ai se faalauiloaga, o le a matuā taugatā meaʻai ma ua lapataʻia ai tagata e aua le faamaʻimauina meaʻai. (Faaaliga 6:6) Ua tatou vaaia le moni o lenā faalauiloaga i le utiuti o meaʻai i le lalolagi aoao i aso nei. Ua faitau piliona tagata ua lē gafatia pe lē mafai foʻi ona maua meaʻai e manaʻomia mo le soifua mālōlōina.

Le Auala o le a Faamuta ai le Utiuti o Mea Taumafa

Ua faapea mai tagata atamamai, e lava ma totoe meaʻai e mafai ona saunia e le lalolagi e fafagaina ai tagata uma o loo iai. Pe afai o lea, o ā la faafitauli ua faapogaia ai le utiuti o mea taumafa? O le ā o loo taʻua i le Tusi Paia o le a faia e Ieova, d o Lē na foafoaina mea uma, ina ia foʻia ai na faafitauli?

Faafitauli: E lē o mafai e faigāmalo ona aveesea le tulaga mativa ma faiga lē tonu lea e iʻu ai i le fia aai o tagata.

Vaifofō: O le a suia faigāmalo lē lelei atoatoa a tagata i se faigāmalo lelei atoatoa, le Malo o le Atua. (Tanielu 2:44; Mataio 6:10) O le toʻatele o tagata matitiva i aso nei e lē o gafatia i taimi uma le tau o meaʻai, ae o le a suia lenā tulaga i le taimi o le pulega a le Malo o le Atua. Ua faapea mai le Tusi Paia e faatatau iā Iesu Keriso, le Tupu o le Malo o le Atua: “E laveaʻi e ia le tagata mativa o loo alaga mo se fesoasoani, atoa foʻi ma lē e faatauvaa ma lē ua leai sona fesoasoani. . . . O le a tele saito i le laueleele; o le a fau ma soloi i tumutumu o mauga.”—Salamo 72:12, 16.

Faafitauli: Ua faaleagaina le tele o mea ona o taua, ma ua afāina ai le tamaoaiga lea ua faigatā ai i tagata ona maua meaʻai latou te manaʻomia.

Vaifofō: “Ua ia [Ieova] faaiʻuina taua i tuluʻiga o le lalolagi. Ua ia gauia foʻi le ʻaufana ma nutililii le tao; ua ia susunuina i le afi o taavale toso o le taua.” (Salamo 46:9) O le a faaumatia e le Atua i latou e faapogaia taua ma auupega o taua. Ua folafola mai i le Tusi Paia: “E tupu olaola ai lē e amiotonu, e tele foʻi le filemu.”—Salamo 72:7.

Faafitauli: Ua faaleagaina mea totō ona o suiga ogaoga o le tau ma mala faalenatura, ma ua faatamaʻia ai lafumanu.

Vaifofō: O le a pulea e le Atua malosiaga faalenatura o le lalolagi, ma toe faafoʻisia le lalolagi i se tulaga e ola lelei ai mea taumafa. Ua faapea mai le Tusi Paia: “Ua ia [Ieova] faatoʻafilemu le afā; ua malū galu o le sami. . . . Ua ia liua le toafa e avea ma vailepa ua tutupu ai ū, ma le fanua naumati e avea ma vaipuna. Na ia faanonofo i inā o ē ua fia aai . . . Ua latou lūlū fatu i fanua ma totō togāvine, ina ia fua mai ai ni fua se tele.”—Salamo 107:29, 35-37.

Faafitauli: Ua gaosia e tagata matapeʻapeʻa ma fai mea piʻopiʻo meaʻai e lē lelei mo le soifua mālōlōina, pe taofia foʻi le avatuina o meaʻai iā i latou o loo manaʻomia.

Vaifofō: O le a tafiesea e le Atua tagata lē faamaoni uma ma ē e fai mea piʻopiʻo. (Salamo 37:10, 11; Isaia 61:8) Ua faamatalaina i le Tusi Paia Ieova le Atua, “o Lē na te faia le faamasinogatonu mo tagata ua ave faagaoi a latou mea, o Lē foʻi na te avatu meaʻai i ē ua matelāina.”—Salamo 146:7.

Faafitauli: E pe ā ma le 33 pasene o le sapalai o meaʻai i le lalolagi, e maʻimau pe e lē faaaogāina i tausaga taʻitasi.

Vaifofō: Pe a pule le Malo o le Atua i le lalolagi, o le a lelei le auala e faasoasoa ai meaʻai. A o iai Iesu i le lalolagi, e na te leʻi faamaʻimauina meaʻai. O se faataʻitaʻiga, i se tasi o taimi, na ia fafagaina faavavega ai se motu o tagata e silia ma le 5,000. Mulimuli ane, na ia faatonuina ona soo: “Ia aoao mai mea ua totoe, ina ia aua neʻi maʻimau se mea.”—Ioane 6:5-13.

Talu ai o le a aveesea e le Atua faafitauli o loo faapogaia ai le utiuti o mea taumafa, o le a olioli la tagata uma i le anoanoaʻi o meaʻai lelei e maua ai le soifua mālōlōina. (Isaia 25:6) Ina ia iloa le taimi e faataunuu ai e le Malo o le Atua lenā mea, tagaʻi i le mataupu “O Afea o le a Pule ai le Malo o le Atua i le Lalolagi?”

a O le lipoti e taʻua o le 2030 Agenda for Sustainable Development na faia i le 2015 e Atunuu o Loo Faia Aʻe ai Malo Aufaatasi.

b O se lipoti tuufaatasi mai i le Faalapotopotoga o Faatoʻaga ma Taumafa a Malo Aufaatasi, Faaputuga Tupe a le Lalolagi mo Atinaʻe Tau Faatoʻaga, Faaputuga Tupe a Malo Aufaatasi mo Tamaiti, Polokalame a Malo Aufaatasi mo Taumafa i le Lalolagi, ma le Faalapotopotoga o le Soifua Mālōlōina i le Lalolagi.

c Ina ia faitau atili e faatatau i tagata tiʻetiʻe solofanua e toʻafā o loo taʻua i le tusi o Faaaliga, tagaʻi i le mataupu “Tagata Tiʻetiʻe Solofanua e Toʻafā—O Ai i Latou?”

d O Ieova o le suafa lea o le Atua. (Salamo 83:18) Tagaʻi i le mataupu “O Ai Ieova?”