Na maua e le Fono Tau Puipuiga a Malo Aufaatasi iā Me 19, 2022, ni lipoti mai i tagata maualuluga e silia ma le toʻa 75 mai i malo eseese. Na latou lipotia “o le utiuti o meaʻai i le lalolagi aoao, lea ua faateteleina ona o le KOVITI-19 ma le suiga o le tau, ua iʻu atu ai i se oge tele i le lalolagi aoao ona o le taua i Ukraine.” E leʻi umi ae taʻua i le nusipepa The Economist, o lenei “taua ua faasolo ai ina matuā matelāina le faitau miliona o tagata ua pagatia.” Na valoia i le Tusi Paia o le a iai oge i o tatou taimi, ae o loo taʻua ai foʻi ni manatu faalaeiau e fesoasoani iā i tatou.

•    Na valoia e Iesu: “O le a siitaua atu isi atunuu i isi atunuu, ma isi malo i isi malo, o le a iai foʻi oge.”—Mataio 24:7.

•    O loo taʻua i le tusi o Faaaliga ni tagata faafaatusa se toʻafā o loo tiʻetiʻe i solofanua. O se tasi o i latou o loo faaata mai ai taua, ma o loo mulimuli atu i ona tua lē o loo faaata mai ai oge, e iloa ai o le a tau faasoasoa meaʻai, ma o le a matuā taugatā foʻi. O loo taʻua i le Tusi Paia: “Ona ou vaai lea, faauta foi, o le solofanua uliuli; ua i le lima o lē o tietie ai le fua faatautau. Na ou faalogo foi i le leo . . . ua faapea mai, ʻO le tau o le kuata o le saito o le tenari [o le totogi o le tagata faigaluega i le aso] lea, o le tau o kuata e tolu o le karite o le tenari foi lea.’”—Faaaliga 6:5, 6, Tusi Paia Samoa, Lomiga 1969.

 O nei valoaga a le Tusi Paia e faatatau i le utiuti o meaʻai ua faataunuuina i aso nei, lea ua taʻua i le Tusi Paia “o aso e gata ai.” (2 Timoteo 3:1) Mo nisi faamatalaga e faatatau i “aso e gata ai” ma tagata tiʻetiʻe solofanua e toʻafā i le tusi o Faaaliga, ia maimoa i le vitiō Ua Suia le Lalolagi Talu mai le 1914 ma faitau i le mataupu “Tagata Tiʻetiʻe Solofanua e Toʻafā—O Ai i Latou?”

•    Ua saunia e le Tusi Paia fautuaga aogā e fesoasoani iā i tatou e feagai ai ma tulaga faigatā, e aofia ai le siitia o tau o meaʻai po o le utiuti o mea taumafa. Mo se faaaʻoaʻoga, tagaʻi i le mataupu “Le Auala e Feagai ai ma le Utiuti o Tupe Maua.”

•    Ua folafola mai foʻi e le Tusi Paia se faamoemoe mo i tatou, o le a toe faaleleia le tulaga o mea. O loo folafola mai ai “o le a tele saito i le laueleele” ma o le a tele mea taumafa mo tagata uma. (Salamo 72:16) Mo nisi faamatalaga e faatatau i le faamoemoe o loo taʻua i le Tusi Paia mo le lumanaʻi, ma māfuaaga e mafai ai ona e talitonu i na folafolaga, ia faitau i le mataupu “O se Faamoemoe Moni mo se Lumanaʻi Manuia.”