A o faagasolo le Olimepeka o le 2024, e pe ā ma le lima piliona tagata o le a matamata i tagata taaalo mai i atunuu e 206 o loo auai i taaloga. Na taʻua e le peresitene o le Komiti Faavaomalo o le Olimepeka: “O loo faia se tatou vaega i se polokalame e autasia ai le lalolagi i le filemu. Seʻi o tatou faatāuaina le agaga o lenei Olimepeka, o le mauaina lea e tagata uma o le filemu ma le autasi, e ui e eseese uma i tatou.”

 Pe e mafai ona ausia na sini tetele i le Olimepeka? Pe e mafai ona tatou maua le filemu ma le autasi moni?

 E lē gata i taaloga, ae e iai foʻi isi mea ua aofia i le Olimepeka o lenei tausaga. Ua faaauiluma e taaloga mataupu i le vā fealoaʻi ma faiga faapolotiki lea ua fevaevaeaʻi ai tagata. O nei mataupu e aofia ai aiā tatau a tagata, faailogalanu, faiga faailoga tapuaʻiga, ma faiga lē tonu.

 O taaloga faavaomalo e pei o le Olimepeka e faafiafia ai tagata. Peitaʻi, o loo faaalia ma faaauiluma ai foʻi uiga ma gaoioiga e fevaevaeaʻi ai, nai lo o le maua ai o le filemu ma le autasi tumau.

 Na valoia mai i le Tusi Paia uiga o tagata lea e faafaigatā ai ona maua le autasi i aso nei. (2 Timoteo 3:1-5) Ina ia malamalama atili i lenei valoaga o le Tusi Paia, ia faitau i le mataupu “Po o Valoia Mai e le Tusi Paia le Auala e Mafaufau ma Gaoioi ai Tagata i Aso Nei?”

 O loo iai i le Tusi Paia se faamoemoe moni mo le mauaina o le filemu ma le autasi i le lalolagi. Ua folafola mai ai o le a autasia tagata uma o le lalolagi i le pulega a se faigāmalo i le lagi, e taʻua o “le Malo o le Atua.”—Luka 4:43; Mataio 6:10.

 O le a aumaia e Iesu Keriso le Tupu o lenā Malo, le filemu i le lalolagi aoao. Ua taʻua i le Tusi Paia:

•   “E tupu olaola ai lē e amiotonu, e tele foʻi le filemu.”—Salamo 72:7.

•   “E laveaʻi e ia le tagata mativa o loo alaga mo se fesoasoani . . . E laveaʻiina e ia i latou mai i le pule sauā ma faiga sauā.”—Salamo 72:12, 14.

 E oo lava i aso nei, ua autasia le faitau miliona o tagata i atunuu e 239 ona o aʻoaʻoga a Iesu. I le avea ai o ni Kerisiano, ua aʻoaʻoina e Molimau a Ieova i le lalolagi aoao le auala e tausia ai le filemu. Ina ia iloa atili le auala e tausia ai le filemu, ia faitau i le lomiga o le Olomatamata ua faaulutalaina “Aveesea Atoatoa le Feitagaʻi.”