Po o faigatā ona e iloa le mea moni mai i le mea pepelo? Ua taaʻina tagata i o latou lava lagona ma talitonuga nai lo o le mea moni ma faamatalaga saʻo. I le lalolagi aoao i aso nei, e toʻatele tagata ua talitonu e lē o toe iai se mea moni.

 E lē fou lenā manatu. I le pe ā ma le 2,000 tausaga ua mavae, na fesili tofotofo atu ai le kovana Roma o Ponotio Pilato iā Iesu: “O le ā le upu moni?” (Ioane 18:38) E ui e leʻi faatali Pilato mo se tali, ae e tāua lana fesili. E maua i le Tusi Paia le tali faamalieloto, ma e fesoasoani e te iloa ai le mea moni e ui e toʻatele tagata ua talitonu e lē o toe iai se mea moni.

Pe e iai se mea moni po o se upu moni?

 Ioe. O le mea moni po o le “upu moni” i le Tusi Paia, e faasino atu i faamatalaga saʻo ma mea e tonu ma tatau. O loo aʻoaʻoina ai o Ieova a le Atua o le Puna o le upu moni, ma o loo taʻua o ia o “le Atua faamaoni.” (Salamo 31:5) E aofia i le Tusi Paia le upu moni mai i le Atua, ma o loo faatusa atu le upu moni i le malamalama, lea e taʻitaʻia ai i tatou i lenei lalolagi fenuminumiaʻi.—Salamo 43:3; Ioane 17:17.

E faapefea ona e maua le upu moni?

 E lē finagalo le Atua e tau ina tatou talia le upu moni mai i le Tusi Paia, e aunoa ma le malamalama lelei i ai. Peitaʻi, ua ia valaaulia i tatou ina ia iloilo le upu moni e ala i le mafaufau lelei nai lo o le faalagolago i o tatou lagona. (Roma 12:1) E finagalo le Atua ina ia tatou iloa o ia ma alolofa iā te ia ma o tatou “mafaufau atoa,” ma faamaonia iā i tatou lava o mea ua tatou aʻoaʻoina mai i le Tusi Paia o le upu moni lea.—Mataio 22:37, 38; Galuega 17:11.

O ai na māfua mai ai le pepelo?

 Ua taʻua i le Tusi Paia o le pepelo na amata mai i le fili o le Atua o Satani le Tiapolo, lea ua taʻua i le Tusi Paia o “le tamā o le pepelo.” (Ioane 8:44) Na ia pepelo i uluaʻi tagata e faatatau i le Atua. (Kenese 3:1-6, 13, 17-19; 5:5) Talu mai lenā taimi, o loo faaauau pea ona faasalalau atu e Satani tala pepelo ma natia le mea moni e faatatau i le Atua.—Faaaliga 12:9.

Aiseā ua taatele ai le pepelo i aso nei?

 I aso nei lea e taʻua i le Tusi Paia “o aso e gata ai,” ua matuā taʻitaʻisesēina e Satani le lalolagi nai lo o se isi lava taimi. Ua avea o se mea masani i tagata le faia o pepelo e faasesēina ma faaleagaina ai isi. (2 Timoteo 3:1, 13) Ua taatele foʻi aʻoaʻoga sesē i le tele o lotu i aso nei. E pei ona valoia e le Tusi Paia e faatatau i o tatou aso, ʻe faapotopotoina e tagata aʻoaʻo mo i latou ina ia faalogo o latou taliga i mea e logolelei iā i latou lava,’ ma e “liliuese foʻi i latou mai i le faalogo atu i le upu moni.”—2 Timoteo 4:3, 4.

Aiseā e tāua ai le upu moni?

 O le upu moni e faigofie ai i tagata ona latou maufaatuatuaina isi. Pe a leai se maufaatuatuaina, o le a malepelepe faauōga ma lē maopoopo olaga o tagata i aso taʻitasi. Ua taʻua i le Tusi Paia e finagalo le Atua ia faavae la tatou tapuaʻiga i le upu moni. Ua faapea mai le Ioane 4:24: ʻO i latou e tapuaʻi atu i le Atua, e tatau ona tapuaʻi atu e tusa ai ma le agaga ma le upu moni.’ Ina ia aʻoaʻoina pe e faapefea i le upu moni mai i le Tusi Paia ona fesoasoani e te iloa ai aʻoaʻoga sesē a lotu ma saʻoloto mai ai, faitau i le faasologa o mataupu “O Pepelo e Faapea e Lē Alofa le Atua.”

Aiseā e finagalo ai le Atua ina ia ou iloa le upu moni?

 E finagalo le Atua ina ia faaolaina oe, ma e manaʻomia ai la ona e iloa le upu moni e faatatau iā te ia. (1 Timoteo 2:4) Pe a e aʻoaʻoina ma faatatau tapulaa a le Atua i le mea e saʻo ma sesē, o le a vavalalata le lua faiā. (Salamo 15:1, 2) Na auina mai e le Atua Iesu i le lalolagi, ina ia fesoasoani i tagata e aʻoaʻoina le upu moni. E finagalo le Atua ia tatou faalogo i aʻoaʻoga a Iesu.—Mataio 17:5; Ioane 18:37.

Po o le a tafiesea e le Atua le pepelo?

 Ioe, e ʻinoʻino le Atua i ē e faaaogāsesē tagata e ala i tala pepelo. Ua ia folafola mai o le a ia tafiesea mai i le lalolagi i latou e maumauaʻi e pepelo. (Salamo 5:6) Pe a faia e le Atua lenā mea, o le a ia faataunuuina ai foʻi lana folafolaga: “E tumau e faavavau laugutu faamaoni.”—Faataoto 12:19.