IA FAAAUAU ONA MATAALA!

E Faitau Miliona Tagata Ukraine ua Sulufaʻi Solo

PLAY

Iā Fepuari 24, 2022, na amata ai osofaʻiga a Rusia iā Ukraine. O lea mea ua oo ai tulaga e sili ona faigatā i tagata Ukraine. Ua matuā lamatia ola o le faitau miliona o tagata, ma ua latou taumafai ai e vave ona sosola ese mai i le atunuu. a

“E tele pomu na pāpā, ma e lē mafai ona faamatalaina lo matou fefefe tele. Ina ua matou iloa na iai nofoaafi na ave ai tagata sulufaʻi, na matou filifili loa e tuua le atunuu. E na o mea na mafai ona ofi i a matou ato faafafa na mafai ona ave, e pei o pepa tāua, fualaau, vai, ma nai meaʻai. Na matou tuua mea uma ae ō i nofoaga e faatali ai nofoaafi, a o toʻulu ifo pomu.”—Nataliia, mai i Kharkiv i Ukraine.

“Na matou manatu e lē tupu se taua. Na ou lagonaina le pāpā o pomu mai i isi vaega o le aai, lea na galulu ai faamalama. Na ou filifili ai loa e tuua le aai, ae ave na o mea na manaʻomia moni. Na ou tuua loʻu fale i le 8:00 i le taeao, ma na ou puʻeina se nofoaafi e alu i Lviv ona ou puʻeina lea o le pasi e alu i Polani.”—Nadija, mai i Kharkiv i Ukraine.

I lenei mataupu

O ā māfuaaga ua sulufaʻi solo ai tagata?

Na māfua ona sulufaʻi solo tagata mai i Ukraine, ona ua osofaʻia e Rusia lenā atunuu. Peitaʻi, o loo faaalia i le Tusi Paia māfuaaga moni e sulufaʻi solo ai tagata:

I le lalolagi aoao, ua lē taulau faigāmalo faaletagata i le puleaina o tagata. Ua faaaogā e faigāmalo le pule ua iā i latou e faileagaina ai tagata.—Failauga 4:1; 8:9.
Ua taaʻina tagata e Satani le Tiapolo “le pule o le lalolagi,” ma o le māfuaaga lea ua faapea mai ai le Tusi Paia: “O le lalolagi atoa o loo nofo toʻilalo i le pule a lē o loo leaga.”—Ioane 14:30; 1 Ioane 5:19.
E lē gata ua faitau selau senituri o pagatia tagata i le tele o faafitauli, ae o loo tatou ola foʻi i le vaitaimi o loo valoia i le Tusi Paia: “O aso e gata ai e oo mai ai aso e sili ona faigatā.” (2 Timoteo 3:1) O le faailoga o na aso: o taua, mala faalenatura, oge, ma faamaʻi, lea e māfua ai ona sulufaʻi solo tagata.—Luka 21:10, 11.

O fea o le a maua ai e tagata sulufaʻi se faamoemoe?

Ua faailoa mai i le Tusi Paia, o Ieova, b o Lē na foafoaina mea, o le Atua e alofa ma alofa mutimutivale i tagata sulufaʻi ma i latou ua tuua o latou aiga. (Teuteronome 10:18) Ua ia folafola mai o le a ia foʻia faafitauli o tagata sulufaʻi, e ala i lona malo i le lagi e taʻua o le Malo o le Atua, lea o le a suitulaga i malo faaletagata. (Tanielu 2:44; Mataio 6:10) O le a faaaogā e Ieova lona Malo, e aveesea Satani le Tiapolo. (Roma 16:20) O le a pule lenā Malo i le lalolagi aoao, ma o le a aveesea ai fevaevaeaʻiga ona o tuaoi o atunuu. O le a avea tagata uma o le lalolagi ma aiga e tasi. E leai se tasi o le a toe sulufaʻi solo, ona o loo folafola mai i le Tusi Paia: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou; auā ua faapea ona tulei mai ai le fofoga o Ieova o ʻau.”—Mika 4:4.

E na o le Malo o le Atua e mafai ona aumaia se vaifofō tumau i le sulufaʻi o tagata, lea o loo tatou vaaia i aso nei. O le a faaaogā e Ieova lona Malo e aveesea faafitauli, lea ua māfua ai ona sulufaʻi solo tagata. Seʻi mātau ni faaaʻoaʻoga:

Taua. O le a “faaiʻuina [e Ieova] taua.” (Salamo 46:9) Ina ia iloa le auala o le a faaiʻuina ai e le Atua taua, faitau i le mataupu “O le a Faapefea Ona Maua le Filemu i le Lalolagi?”
Pule sauā ma faiga sauā. “E laveaʻiina e [Ieova] i latou mai i le pule sauā ma faiga sauā.” (Salamo 72:14) Ina ia malamalama i le auala e mafai ona suia ai uiga ua mauaa i tagata, faitau i le faasologa o mataupu “Aveesea Atoatoa le Feitagaʻi.”
Mativa. “Auā e laveaʻi e [Ieova] le tagata mativa o loo tagi mai mo se fesoasoani.” (Salamo 72:12) Ina ia iloa le auala o le a aveesea ai e le Atua le pogai o le mativa, faitau i le mataupu “Pe e Mafai Ona Foʻia Faafitauli Tau Tamaoaiga?”
Oge. “O le a tele saito i le laueleele.” (Salamo 72:16) Ina ia iloa pe faapefea ona faamautinoa mai e le Atua o le a lē toe iai se tasi e matelāina i le fia ʻai, faitau i le mataupu “Se Lalolagi e Aunoa ma Sē e Matelāina.”

Pe e mafai ona fesoasoani le Tusi Paia i tagata sulufaʻi i aso nei?

Ioe. E lē gata ua aumaia i le Tusi Paia se faamoemoe mautinoa i le lumanaʻi mo tagata sulufaʻi, ae ua fesoasoani mai foʻi i le auala e latou te feagai ai ma luʻi.

Mataupu silisili o le Tusi Paia: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.”—Faataoto 14:15.

Le uiga: Ia mafaufau i ni lamatiaga e ono tulaʻi mai ma mea e te faia ina ia puipuia ai oe. Ia faaeteete i tagata solitulafono o loo taumafai e faasesē tagata sulufaʻi, ona o le fou o le siʻomaga ua latou iai ma e latou te lagona le lē malupuipuia.

Mataupu silisili o le Tusi Paia: ‘Afai ua iai ni a tatou meaʻai ma ofu e oofu ai, ia tatou lotomalilie i nei mea.’—1 Timoteo 6:8.

Le uiga: Aua le uaʻi atu i meafaitino. Pe a e lotomalie i mea ua maua, o le a e maua ai le fiafia.

Mataupu silisili o le Tusi Paia: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

Le uiga: Ia onosaʻi ma agalelei. Pe a e faaalia na uiga, o le a faigofie ai i tagata o le vaipanoa o loo e sulufaʻi atu i ai ona faaaloalogia ma taliaina oe.

Mataupu silisili o le Tusi Paia: “Aua le taui atu le leaga i le leaga i se tasi.”—Roma 12:17.

Le uiga: Aua e te faatagaina le ita e tauimasui ai i lē e faileagaina oe, auā o le a faateteleina ai le faafitauli.

Mataupu silisili o le Tusi Paia: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.

Le uiga: Ia faamuamua le Atua i lou olaga ma tatalo atu iā te ia. E mafai ona ia faamalosia oe e fesagaʻia tulaga faigatā.

Mataupu silisili o le Tusi Paia: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.”—Filipi 4:6, 7.

Le uiga: Talosaga i le Atua mo le filemu o le mafaufau ma le loto, e tusa po o ā tulaga o loo e fesagaʻia. Tagaʻi i le mataupu “Filipi 4:6, 7—‘Aua Neʻi Popole i se Mea.’ ”

a I le aso na sosoo ai talu ona amata le osofaʻiga a Rusia, na faapea mai ai le Komesina Sili o Malo Aufaatasi mo Tagata Sulufaʻi, o se tulaga pito sili lea ona mataʻutia i taimi o faalavelave faafuaseʻi. I totonu o le 12 aso, e silia ma le lua miliona tagata mai i Ukraine na sulufaʻi atu i atunuu tuaoi, ae o le isi tasi miliona, na tuua o latou aiga ae sosola i isi vaega o Ukraine.

b O Ieova, o le suafa lea o le Atua. (Salamo 83:18) Tagaʻi i le mataupu “O Ai Ieova?”