Iā Me 24, 2022, na tupu ai se faalavelave mataʻutia i se aai laʻitiiti o Uvalde i Texas, i le Iunaite Setete o Amerika. Na lipotia mai i le nusipepa The New York Times, “e toʻa 19 ni tamaiti ma faiaʻoga e toʻalua na tafanaina e se alii talavou . . . i le Robb Elementary School.”

 O se mea e faanoanoa ai ona o le tutupu soo o nei mea mataʻutia. Na lipotia mai i le nusipepa USA Today i totonu lava o Amerika, “e 249 faalavelave na tafanaina ai tagata i aʻoga i le tausaga na teʻa nei, lea e sili atu nai lo o se isi lava tausaga talu mai le 1970.”

 Aiseā e tutupu ai nei faalavelave mataʻutia? E faapefea ona tatou fesagaʻia na gaoioiga leaga? Pe e iai ni māfuaaga e tatou te talitonu ai o le a faaiʻuina nei faiga sauā? E maua i le Tusi Paia tali o nei fesili.

•    Ua faamatalaina i le Tusi Paia le vaitaimi o loo tatou ola ai “o aso e gata ai,” ua toʻatele tagata “e lē lotoaiga” ma “sauā,” e latou te faia gaoioiga e sili ona leaga. O ē e faaalia na uiga “e faateteleina pea lo latou leaga.” (2 Timoteo 3:1-5, 13) Ina ia malamalama atili, tagaʻi i le mataupu “Po o Valoia Mai e le Tusi Paia le Auala e Mafaufau ma Gaoioi ai Tagata i Aso Nei?”

 Ua tuufesili le toʻatele o tagata, ‘Aiseā e lē taofia ai e le Atua faalavelave mataʻutia e pei o le tafanaina o tagata i aʻoga?’ Ina ia iloa le tali a le Tusi Paia, tagaʻi i le mataupu “E Tutupu Mea Leaga i Tagata Lelei—Aiseā?”

•    “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe . . . ma le [faamāfanafanaga] mai [i] Tusitusiga Paia.”—Roma 15:4.

 E mafai ona fesoasoani mataupu silisili o le Tusi Paia iā te oe e fesagaʻia ai nei faiga sauā. Mo nisi faamatalaga, tagaʻi i le lomiga o le Ala Mai! ua faaulutalaina “Po o Le a Faaiʻuina Ea Faiga Sauā?”

 Mo nisi fautuaga i le auala e fesoasoani ai mātua i a latou fanau e feagai ai ma le fefe ona o mea e latou te vaaia pe faalogo i ai i tala fou, faitau i le mataupu “Fesoasoani i Lau Fanau i le Auala e Feagai ai ma Tala lē Lelei e Lipotia Mai i Tala Fou.”

•    “E laveaʻiina e ia i latou mai i le pule sauā ma faiga sauā.”—Salamo 72:14.

•    ʻE latou te tuʻi a latou pelu e fai ma uʻamea o suōtosina, ma a latou tao e fai ma pelu e teu ai laau. E lē toe sii le pelu a le tasi atunuu i le tasi atunuu, pe latou te toe aʻoaʻo foʻi i taua.’—Mika 4:3.

 O le a faia e le Atua le mea e lē o mafai ona faia e tagata. O le a faaumatia e lona Malo i le lagi auupega uma ma faaiʻuina faiga sauā uma. Mo nisi faamatalaga e faatatau i mea o le a faataunuuina e le Malo o le Atua, faitau i le mataupu “O le a ʻTele le Filemu’ i le Pulega o le Malo o le Atua.”