O se tasi o tatalo e muamua lava aʻoaʻoina e le toʻatele, o le Tatalo a le Alii lea na aʻoaʻoina ai e Iesu ona soo. E maua lenei tatalo i le vaega lea e masani ona taʻua o le Feagaiga Fou. E amata le tatalo i le faapea mai: “Lo matou Tamā e o i le lagi, ia faapaiaina lou suafa.” (Mataio 6:9) Peitaʻi, e seāseā ona maua i faaliliuga faa-Peretania o le Feagaiga Fou, le suafa o le Atua lea ua taʻua i le faa-Peretania o “Jehovah” po o “Yahweh.” Ae o loo iai i na faaliliuga igoa o atua sesē e pei o Seu, Hereme, ma Atemisa. Pe e lē tatau foʻi la ona taʻua ai le suafa o le Atua moni, ma o le Tusitala o le Tusi Paia?—Galuega 14:12; 19:35; 2 Timoteo 3:16.

 Na talitonu Lancelot Shadwell ma Frederick Parker, o ni tagata na faaliliuina le Tusi Paia i le faa-Peretania, e tatau ona toe tuu le suafa o le Atua i le Feagaiga Fou. Aiseā na manaʻomia ai ona “toe tuu” le suafa o le Atua i le Feagaiga Fou? Talu ai na la manatu, sa iai le suafa o le Atua i uluaʻi Tusitusiga, ae na mulimuli ane toe aveesea. Aiseā na la manatu ai faapea?

 Na iloa e Shadwell ma Parker e faitau afe taimi na faaaogā ai le suafa o le Atua i manusikulipi o le vaega lea e masani ona taʻua o le Feagaiga Tuai, lea na uluaʻi tusia i le gagana Eperu. O lea na la taumānatu ai, pe aiseā ua aveesea ai le suafa atoa o le Atua a mai i manusikulipi o le Feagaiga Fou na maua i lenā taimi. Na mātauina foʻi e Shadwell, pe a faaaogā e manusikulipi o le Feagaiga Fou faaupuga ia na masani ona faaaogā i le Feagaiga Tuai, e pei “o le agelu a Ieova,” na suia e i latou na toe tusia le Feagaiga Fou i le gagana Eleni, le suafa o le Atua i taʻu e pei o le Kyʹri·os, lea e uiga atu i le “Alii.”—2 Tupu 1:3, 15; Galuega 12:23.

 E oo lava i le taimi e leʻi lomia ai e Shadwell ma Parker a la faaliliuga o le Tusi Paia i le faa-Peretania, ae e iai isi tagata faaliliu na toe tuuina le suafa o le Atua i a latou faaliliuga o le Feagaiga Fou i le faa-Peretania, ae e leʻi tele ni mau na latou faia ai faapea. b A o leʻi oo i le 1863, lea na lomia ai e Parker lana faaliliuga A Literal Translation of the New Testament, e leʻi iai lava se tagata faaliliu o le Tusi Paia i le faa-Peretania, na toe tuuina le suafa o le Atua i le tele o mau i se lomiga o le Feagaiga Fou. O ā ni mea ua tatou iloa e faatatau iā Lancelot Shadwell ma Frederick Parker?

 O Lancelot Shadwell (1808-1861) o se lōia, ma o se alo e faasino i le afioga iā Lancelot Shadwell, le faufautua fesoasoani a Egelani. Na auai lenei tauleʻaleʻa i le lotu a Egelani. E ui na talitonu i le Tolutasi, ae na ia faatāuaina le suafa o le Atua, ma faamatalaina e faapea “o le suafa mamalu o IEOVA.” I lana faaliliuga The Gospels of Matthew, and of Mark, e 28 taimi na faaaogāina ai le suafa o “Ieova” i totonu o mau, ae e 465 taimi na ia faaaogāina ai i faamatalaga faaopoopo.

 Atonu na iloa e Shadwell le suafa o le Atua mai i uluaʻi tusitusiga Eperu o le Feagaiga Tuai. Na ia faapea mai “e lē o ni tagata faaliliu faamaoni,” i latou ia na suia le suafa o le Atua i le taʻu Kyʹri·os, i a latou faaliliuga faa-Eleni o le Feagaiga Tuai.

 I le faaliliuga a Shadwell, na ia muaʻi faaaogā ai le suafa o “Ieova” i le Mataio 1:20. I lenā mau, na ia tusia ai se faamatalaga faaopoopo e faapea: “O le upu [Kyʹri·os] i inei ma le tele o isi mau o le Feagaiga Fou, e faasino atu iā IEOVA, le suafa o le Atua; ma e matuā tāua le toe tuuina o lenei upu i faaliliuga faa-Peretania.” Na ia taʻua foʻi: “E tatau ona faia faapea ina ia faamamaluina ai le Atua. Ua faailoa mai e le Atua lava ia, o lona suafa o IEOVA; ma o le mea sili e tatou te faia pe a talanoa e faatatau iā te ia, o le faaaogā lea o lona suafa.” Na ia toe faaopoopo mai: ʻI le tatou faaliliuga o le Tusi Paia [Established, Authorized, po o le King James Version], e seāseā ona faaaogā ai le suafa o IEOVA. Nai lo o le faaaogā o le suafa saʻo o le Atua, o loo faaaogā ai Le Alii.’ Na faapea mai Shadwell: “O le Alii . . . o se taʻu e matuā lē talafeagai” ona faaaogāina e suia ai le suafa o le Atua. Na ia taʻua atili, e oo lava iā te ia e taʻua e tagata o lona atunuu o “Le Alii.”

 Na lomia e Shadwell lana faaliliuga o le tusi o Mataio i le 1859, ae lomia le tuufaatasiga o le tusi o Mataio ma Mareko i le 1861. Ae na faaiʻuina lana galuega ina ua maliu iā Ianuari 11, 1861, i le 52 o ona tausaga. Peitaʻi, e leʻi iʻuvale ana taumafaiga.

 Na fiafia se tagata mauʻoa faipisinisi i Lonetona e igoa iā Frederick Parker (1804-1888) i le faaliliuga a Shadwell mo le tusi o Mataio. I le pe ā o le 20 tausaga o Parker, na amata ai ona ia faaliliuina le Feagaiga Fou. E ese mai iā Shadwell, e leʻi talitonu Parker i le aʻoaʻoga o le Tolutasi. Na ia tusi e faapea: “E ao i le Lotu a le Alo pele [o le Atua] . . . ona talia le mea moni . . . ma tapuaʻi iā Ieova, o Lē e ona le malosi uma lava.” Na manatu foʻi Parker, o manusikulipi o le Feagaiga Fou, ia o loo faaaogā ai le upu Kyʹri·os e faasino uma atu i le Alii le Atua ma le Alii o Iesu, ua faafaigatā ai ona iloa le eseesega o le Atua ma Iesu. O le māfuaaga lea na faatupu manatu ai iā te ia le mātauina o nisi o mau o le faaliliuga a Shadwell, ua faaliliuina ai le upu Kyʹri·os iā “Ieova.”

 O le ā na fesoasoani iā Parker ina ia malamalama ai i lenei mataupu? Na ia suʻesuʻeina le gagana Eleni, ma na ia tusia nisi o tusi ma lomiga e faatatau i le kalama o le gagana Eleni. Na avea foʻi o ia ma sui o le faalapotopotoga o le Anglo-Biblical Institute, lea na uunaʻia le faia o saʻiliʻiliga i manusikulipi o le Tusi Paia, ina ia saunia ai ni faaliliuga e sili ona lelei o le Tusi Paia i le gagana Peretania. I le 1842, na amata ai ona lomia e Parker lana uluaʻi faaliliuga o le Feagaiga Fou i ni vaega eseese. c

 E tele tausaga o tusi Parker e faatatau i fesili e pei o le: “O ā taimi e faasino atu ai le upu Kyʹri·os i le Alii o Iesu, a o ā taimi e faasino atu ai i le Alii le Atua?” “Aiseā e tele ai ina faaaogā le upu Kyʹri·os o se igoa, ae lē o se taʻu po o se faalupega?”

 Ina ua faitau Parker i le faaliliuga a Shadwell i le 1859 mo le tusi o Mataio, ma le faamatalaga faaopoopo o loo iai e faatatau i le upu Kyʹri·os, na ia talitonu ai e iai nisi o mau patino “e tatau ona faaliliuina ai [le upu Kyʹri·os] iā Ieova.” O lea na ia toe teuteuina ai lana faaliliuga atoa o le Feagaiga Fou, ina ia toe tuu ai le suafa o “Ieova” i mau na ia manatu e tatau ona iai, e fua i le siʻomaga o le mau ma le kalama o le gagana Eleni. O lea, i le faaliliuga a Parker i le 1863 o le A Literal Translation of the New Testament, e 187 taimi o loo faaaogā ai le suafa o le Atua i mau. E foliga mai o le uluaʻi lomiga lea i le faa-Peretania o loo faaaogā ai le suafa o le Atua i le Tusitusiga Paia Eleni atoa. d

 I le 1864, na lomia ai foʻi e Parker le tusi A Collation of an English Version of the New Testament . . . With the Authorized English Version. O le fuafuaga na ia tuufaatasia ai nei faaliliuga e lua o le Feagaiga Fou i se tusi se tasi, ina ia iloa ai vaega e ese ai lana faaliliuga mai i le isi faaliliuga. e

 Ina ia iloa le tāua o le toe tuu o le suafa o le Atua i mau sa iai, na taʻua e Parker le auala na faaliliuina ai nisi o mau e pei o le Roma 10:13 i le faaliliuga o le Authorized Version. Ua faapea mai lenā mau: “E faaolaina i latou uma o e valaau i le suafa o le Alii.” Ua faapea mai Parker: ʻPe a faitau se tasi i nei mau i le faaliliuga o le Authorized English Version, pe faamata e na te iloa o loo faasino atu nei mau iā Ieova, ae lē o Le Alo po o Iesu Keriso lo tatou Alii’?

 Na faaaluina e Parker le faitau afe o pauni, o se tupe telē i lenā taimi, e lomia ma faasalalau ai ana lomiga, o pepa, ma isi tusitusiga. O le mea moni, e na o le tasi le tausaga ae ua ia faaaluina le 800 pauni, lea e tutusa ma le silia ma le 100,000 pauni Peretania ($132,000 tālā Amerika) i aso nei. Na ia faameaalofa atu foʻi le tele o ana lomiga i tagata e masani ai ma faifeʻau maualuluga mo so latou manatu.

 E leʻi tele ni kopi na lomiaina o tusitusiga a Parker ma lana faaliliuga o le Feagaiga Fou, ma na faitioina foʻi e nisi o tagata atamamai. O nei faitioga na faalēaogāina ai taumafaiga faamaoni a Parker, o Shadwell ma isi, i le toe tuuina o le suafa o le Atua i le Feagaiga Fou i faaliliuga faa-Peretania.

 Atonu e te fia maimoa foʻi i le vitiō lenei e 10 minute, e maua ai isi faamatalaga aogā: Warwick Museum Tours: “The Bible and the Divine Name.”