O le taua i Ukraine faapea suiga o le tau, o loo faaauau pea ona iai se aafiaga tele i le mauaina o mea taumafa i le lalolagi aoao, aemaise i atunuu tau atiaʻe lea e faigatā ai i le toʻatele ona maua ni meaʻai.

•   “Ua faaitiitia le gaosia ma le mauaina o meaʻai, ona o feeseeseaʻiga, suiga o le tau, tau o le eletise ma le suāuu ma isi mea.”—António Guterres, failautusi o Malo Aufaatasi, Iulai 17, 2023.

•   “Ua valoia e tagata atamamai e faapea, o le faamaamulu o Rusia mai le maliega o le faatauina o saito mai i Ukraine, o le a matuā faateteleina ai le utiuti o mea taumafa i lalolagi aoao. O le a taugatā ai foʻi meaʻai i atunuu e maulalo le tamaoaiga, aemaise lava i atunuu i Aferika i Mātū ma Sasaʻe Tutotonu.”—Atalayar.com, Iulai 23, 2023.

 Mātau le manatu o le Tusi Paia e faatatau i le utiuti o meaʻai ma le lumanaʻi.

•   Na valoia e Iesu: “O le a siitaua atu isi atunuu i isi atunuu, ma isi malo i isi malo, o le a iai foʻi oge.”—Mataio 24:7.

•   O loo taʻua i le tusi o Faaaliga ni tagata faafaatusa se toʻafā o loo tiʻetiʻe i solofanua. O se tasi o i latou o loo faaata mai ai taua, ma o loo mulimuli atu i ona tua lē o loo faaata mai ai oge, e iloa ai o le a tau faasoasoa meaʻai, ma o le a matuā taugatā foʻi. O loo taʻua i le Tusi Paia: “Ona ou vaai lea, faauta foi, o le solofanua uliuli; ua i le lima o lē o tietie ai le fua faatautau. Na ou faalogo foi i le leo . . . ua faapea mai, ʻO le tau o le kuata o le saito o le tenari [o le totogi o le tagata faigaluega i le aso] lea, o le tau o kuata e tolu o le karite o le tenari foi lea.’”—Faaaliga 6:5, 6, Tusi Paia Samoa, Lomiga 1969.

 O nei valoaga o le Tusi Paia e faatatau i le utiuti o meaʻai ua faataunuuina i aso nei, lea o loo taʻua i le Tusi Paia “o aso e gata ai.” (2 Timoteo 3:1) Mo nisi faamatalaga e faatatau i “aso e gata ai” ma tagata tiʻetiʻe solofanua e toʻafā i le tusi o Faaaliga, ia maimoa i le vitiō Ua Suia le Lalolagi Talu mai le 1914 ma faitau i le mataupu “Tagata Tiʻetiʻe Solofanua e Toʻafā—O Ai i Latou?”

•   Ua saunia e le Tusi Paia fautuaga aogā e fesoasoani iā i tatou e feagai ai ma tulaga faigatā, e aofia ai le siitia o tau o meaʻai po o le utiuti o mea taumafa. Mo se faaaʻoaʻoga, tagaʻi i le mataupu “Le Auala e Feagai ai ma le Utiuti o Tupe Maua.”

•   Ua folafola mai foʻi e le Tusi Paia se faamoemoe mo i tatou, o le a toe faaleleia le tulaga o mea. O loo folafola mai ai “o le a tele saito i le laueleele” ma o le a tele mea taumafa mo tagata uma. (Salamo 72:16) Mo nisi faamatalaga e faatatau i lenei faamoemoe mo le lumanaʻi, ma māfuaaga e mafai ai ona e talitonu i lenā folafolaga, ia faitau i le mataupu “O se Faamoemoe Moni mo se Lumanaʻi Manuia.”