IA FAAAUAU ONA MATAALA!
Taʻua e Saienitisi ua Toeitiiti Faaumatia le Lalolagi—O le ā le Manatu o le Tusi Paia?
Iā Ianuari 24, 2023, na tuu ai i luma e le ʻausaienitisi le vae o le uati o le Doomsday Clock a e lata i le vaeluapō, o se uati faafaatusa e faasino atu i le iʻuga o le lalolagi.
“O loo faaata mai e le ʻDoomsday Clock’ le lamatiaga o le faaumatia e tagata o i latou lava. I le pō o le Aso Lua, na tuu ai i luma e saienitisi le vae o le uati e lata i le vaeluapō, o se mea e leʻi tupu muamua, ona o tulaga mataʻutia e pei o le taua i Ukraine, o le ono tupu o se taua faaniukilia, ma le faaumatia o le paneta ona o suiga o le tau.”—Ofisa faasalalau o le AFP International Text Wire.
“Na faailoa mai e saienitisi i le pō o le Aso Lua, na tuu ai i luma le vae o le ʻDoomsday Clock’ i le 90 sekone a o leʻi oo i le vaeluapō—o le taimi pito i sili lea ua latalata ai le lalolagi iā amaketo.”—ABC News.
“Na fono le ʻausaienitisi mai i le lalolagi aoao ma latou lapataʻi mai ai ua toeitiiti lava faaumatia e tagata i latou lava, e sili atu nai lo o se isi taimi.”—The Guardian.
Po ua lata ina faaumatia tagata ma lo tatou paneta? Pe e tatau ona tatou fefefe i le mea o le a tupu i le lumanaʻi? O le ā le manatu o le Tusi Paia?
O le ā o le a tupu i le lumanaʻi?
O loo taʻua i le Tusi Paia “o le lalolagi e tumau lea e faavavau,” ma o le a iai tagata “e nonofo ai pea . . . e oo i le faavavau.” (Failauga 1:4; Salamo 37:29) O lea la, e lē mafai e tagata ona faaumatia le lalolagi, pe faia mea ina ia lē mafai ai ona ʻainā le lalolagi atoa.
Peitaʻi, o loo taʻua i le Tusi Paia le iʻuga o le lalolagi. O se faaaʻoaʻoga, o loo faapea mai ʻe mavae atu le lalolagi.’—1 Ioane 2:17.
Ina ia iloa le uiga o le faamatalaga a le Tusi Paia e faatatau i le iʻuga o le lalolagi, ia faitau i le mataupu “Po ua Lata Mai le Iʻuga o le Lalolagi? O le ā le Apokalipise?”
Ina ia iloa atili faamatalaga a le Tusi Paia i taimi o le a tutupu ai mea i le lalolagi, ia faitau i le mataupu faa-Peretania “When Will the World End?”
Ia iai pea se vaaiga saʻo
E fesoasoani le Tusi Paia iā i tatou ina ia iai pea se vaaiga saʻo, e ui i faafitauli o loo tutupu i le lalolagi. E faapefea?
Ua saunia i le Tusi Paia fautuaga e aogā i o tatou olaga. (2 Timoteo 3:16, 17) O se faaaʻoaʻoga, ia faitau i le mataupu “Auala e Pulea ai le Popole” ina ia iloa ai pe e faapefea ona fesoasoani le Tusi Paia iā te oe ina ia iai se vaaiga saʻo, e ui i faafitauli o le olaga.
O loo taʻua i le Tusi Paia se faamoemoe mautinoa mo le lumanaʻi. (Roma 15:4) O loo faamatala ai mea e mafai ona tatou faatalitalia i le taimi lenei ma i le lumanaʻi, lea e fesoasoani iā i tatou e faaauau ai ona iai se vaaiga mautinoa e ui i mea o loo tutupu i le lalolagi.
Ina ia e iloa atili aʻoaʻoga a le Tusi Paia, e matou te valaaulia ma le faaaloalo oe e faataʻitaʻi se suʻesuʻega faale-Tusi Paia e aunoa ma se totogi.
a “O le Doomsday Clock, o le auala lea e lapataʻia ai tagata lautele e faatatau i le toetoe lava ona tatou faaumatia o lo tatou lalolagi, ona o mea mataʻutia ua tatou faia ma gaosia. O se tulaga faafaatusa e faamanatu mai ai tulaga lamatia e manaʻomia ona tatou faaleleia, ina ia mafai ai pea ona tatou nonofo i le lalolagi.”—Bulletin of the Atomic Scientists.