O le ā sou manatu pe a e faalogo i le upu “apokalipise”? Atonu e te mafaufau i se mala tele i le lalolagi. E talitonu nisi ua toeitiiti ona aafia lea o le lalolagi i se mala, aemaise lava pe a latou faitau i tala o mea tutupu e pei o nei:

•   “E telē le avanoa e ono tupu ai se taua faaniukilia. Atonu e faatupu e se isi, o se mea e tupu faafuaseʻi, pe māfua ona o se mea sesē e faia e se tasi.”​—Bulletin of the Atomic Scientists.

•   “I tausaga ua teʻa na tatou molimauina ai le faateleina o afā malolosi, faatamaʻia o le vaomatua i afi, lāmala, faaleagaina o ʻamu, matuā faateteleina o le vevela o le ea, ma lologa i le lalolagi aoao.”​—National Geographic.

•   “Ua matuā sili atu ona tele ma faaleagaina e sē akerise mea i Aferika i le tele o tausaga.”​—The Associated Press.

 Po o le a faaumatia le lalolagi e se apokalipise? O le ā le manatu o le Tusi Paia?

 Leai. Ua faamautinoa mai iā i tatou e le Afioga a le Atua le Tusi Paia, o le a tumau e faavavau le lalolagi. (Failauga 1:4) E lē faaumatiaina e le Atua le lalolagi na ia foafoaina, ae o le a ia ‘faafanoina i latou o loo faaleagaina le laueleele.’​—Faaaliga 11:18.

 I le Tusi Paia, o le “lalolagi” o le a faaumatia e faasino atu i le lalolagi o tagata e lē usiusitaʻi i le Atua, ma e latou te faia o latou lava tuʻinanauga manatu faapito. O le a faaumatia e le Atua le “lalolagi o tagata faalēmataʻu,” e pei ona ia faia i aso o Noa.​—2 Peteru 2:5; 3:7.

 E pei ona taʻua i le 1 Ioane 2:17, “e mavae atu foʻi le lalolagi faapea ma ona tuʻinanauga.” Ua faaalia i lenei fuaiupu, e lē faaumatiaina e le Atua le lalolagi paneta, ae e na te faaumatiaina tagata faalēmataʻu e faaauau pea ona latou faia tuʻinanauga manatu faapito.

 E lē o taʻua i le Tusi Paia le taimi tonu e oo mai ai le iʻuga. (Mataio 24:36) Ae ua faailoa mai ai ua latalata mai le iʻuga. O loo valoia i le Tusi Paia mea nei:

•   O taua, oge, faamaʻi, mafuiʻe malolosi o le a tutupu “i lea mea ma lea mea.”​—Mataio 24:3, 7, 14; Luka 21:10, 11; Faaaliga 6:1-8.

•   E faaalia e tagata le matuā manatu faapito. Mo se faataʻitaʻiga, e avea tagata ma “ē e alolofa iā i latou lava, e mananaʻo tele i tupe,” “e lē lotofaafetai,” ma “e lē amio pulea.”​—2 Timoteo 3:1-5.

 E toʻatele tagata ua ioe, o mea ua tutupu i le lalolagi talu mai le 1914, ua talafeagai lelei ma mea ua valoia e le Tusi Paia ma ua toeitiiti oo mai le iʻuga. Mo nisi faamatalaga, tagaʻi i mataupu i le faa-Peretania “What Does Bible Chronology Indicate About the Year 1914?” ma le “What Is the Sign of ʻthe Last Days,’ or ʻEnd Times’?”

 I le uluaʻi gagana Eleni o le upu ua faaliliuina mai ai le apokalipise i le Tusi Paia, e uiga atu i le “aveese o le ufiufi” po o le “aveesea o le veli.” E masani ona faaaogā lenā upu e faamatala ai le faailoaina mai o faamatalaga sa natia. O loo taʻua foʻi i le Tusi Paia “le faaaliga [po o le apokalipise] o le Alii o Iesu,” pe a faaali mai Iesu o lē ua iai le mana, e aveesea ai amioga leaga uma i le lalolagi ma tauia i latou e tapuaʻi i le Atua.​—2 Tesalonia 1:6, 7; 1 Peteru 1:7, 13.

 Ua faaigoaina le tusi mulimuli o le Tusi Paia i le Apokalipise po o le Faaaliga, ona o loo faailoa mai ai mea o le a tutupu i le lumanaʻi. (Faaaliga 1:1) O loo aofia i lenā tusi se tala lelei ma se feʻau o le faamoemoe. (Faaaliga 1:3) O loo faaalia ai o le a aveesea e le Atua faiga lē tonu uma, ma liua le lalolagi e avea ma parataiso. I lenā taimi o le a lē toe iai se tigā, mafatiaga ma le oti.​—Faaaliga 21:3, 4.

 Pe e te fia aʻoaʻo atili e faatatau i folafolaga matagofie o loo i le Tusi Paia? E fiafia Molimau a Ieova e ofo fua atu se suʻesuʻega faale-Tusi Paia e fesoasoani ai iā te oe. Aiseā e lē faafesootaʻi ai nei loa i latou?