E manaʻomia e tagata uma le suāvai mamā ina ia faatumauina ai le ola. Peitaʻi, ua lapataʻi mai le failautusi o Malo Aufaatasi o António Guterres, “o loo tatou feagai ma se faafitauli ogaoga o le matuā utiuti o le suāvai mamā i le lalolagi aoao.” E faitau piliona tagata i le lalolagi e lē o mafai ona mauaina suāvai mamā mo le fofoga taumafa.

 Po o le a iai se taimi o le a lava ma totoe ai le suāvai e maua e tagata uma? Po o le a faaauau pea ona utiuti le suāvai? O le ā le manatu o le Tusi Paia?

Folafolaga a le Tusi Paia e faatatau i le suāvai

 Ua faailoa mai i le Tusi Paia, e iai le aso o le a lē toe utiuti ai le suāvai. O le mea moni, o le a matuā tele le suāvai mamā.

 “O le a oso mai le vai i le toafa, ma vaitafe i fanua laugatasi o le toafa. O le a avea le laueleele ua mago i le vevela o le lā ma vailepa ua tutupu ai ū, ma e avea foʻi le laueleele naumati ma vaipuna.”—Isaia 35:6, 7.

 Aiseā e tatou te talitonu ai i lenā folafolaga mai i le Tusi Paia? Mātau le faamatalaga a le Tusi Paia e faatatau i se tasi o faataamilosaga na aofia i le foafoaina o lo tatou paneta.

Le manatu o le Tusi Paia i le lalolagi ma le faataamilosaga o le vai

 “Na ia [le Atua] lē foafoaina fua le lalolagi, ae na ia faia ina ia ʻainā.”—Isaia 45:18.

 “Ua ia [le Atua] ave aʻe matāua o vai; ua avea ma timu ma puao; ua māʻuluʻulu mai ao, ua totō mai i luga o tagata.”—Iopu 36:27, 28.

 “Ona ou faatotō ifo lea o le timu iā te outou i le taimi e tatau ai, e fua mai ai le laueleele, ma e fua mai foʻi laau o le fanua.”—Levitiko 26:4.

 Na folafola mai e le Atua o le a Ia faamanuiaina tagata Isaraelu anamua, o ni ē e faifaatoʻaga, e ala i le saunia mai pea o suāvai ina ia mafai ai ona fua mai a latou faatoʻaga. Na ia silafia e faalagolago le fua mai o faatoʻaga i le totō ifo o timuga i le taimi talafeagai.

 Ua toeitiiti ona faia lea e le Atua i le lalolagi aoao, o le mea na ia faia foʻi i Isaraelu anamua. (Isaia 30:23) Peitaʻi i le taimi lenei, o loo matuā utiuti pea le suāvai i le tele o vaega o le lalolagi, ma o le lē tele o timuga ua na o se tasi lea o faapogai o lenei faafitauli. O le ā se isi vaifofō o loo i le Tusi Paia mo le utiuti o le suāvai i aso nei?

Le auala o le a faaiʻuina ai le utiuti o le suāvai

 Ua faailoa mai i le Tusi Paia o le a faaiʻuina e le Atua e ala mai i lona Malo, faafitauli uma o loo aafia ai lo tatou paneta, e aofia ai ma le utiuti o le suāvai. (Mataio 6:9, 10) O le Malo o le Atua o se pulega i le lagi o le a pule mai i le lalolagi. (Tanielu 2:44; Faaaliga 11:15) E lē gata i lea, o le a faia e le Malo o le Atua mea e lē o mafai ona faia e malo faaletagata, e pei o le aveesea o mea uma o loo faapogaia ai le utiuti o le suāvai.

 Faafitauli: Ua iai aafiaga ogaoga i le faataamilosaga o le vai ona o suiga i le tau. O nisi o aafiaga e aofia ai le matuā aasa o le mugālā ma lologa mataʻutia, ona o le tetele o timuga ma le siisii o le suāsami.

 Vaifofō: O le a toe faaleleia e le Malo o le Atua mea uma ua faaleagaina i lo tatou siʻosiʻomaga, ina ia toe foʻi ai lo tatou paneta i le mea sa iai. Ua folafola mai e le Atua e faapea: “Faauta! Ou te faia ia fou mea uma lava.” (Faaaliga 21:5) O le a matuā tele le suāvai mamā i laueleele naumati, ma e oo lava i laueleele e lē ola ai ni mea totō, o le a fua tele mai. (Isaia 41:17-20) O le a pulea foʻi e le Malo o le Atua malosiaga faalenatura uma e ala i le taʻitaʻiga a Iesu Keriso.

 Faafitauli: Ua utiuti foʻi le suāvai mamā ona ua faaleagaina vaitafe, vaituloto, ma vai i le manava o le eleele, ona o faalapotopotoga matapeʻapeʻa ma tagata e lē manatu mamafa i āuga o a latou gaoioiga.

 Vaifofō: O le a faamamā e le Atua le lalolagi ma toe faaleleia vaitafe, vaituloto , sami ma le laueleele. O le a avea le lalolagi ma parataiso. Ua faapea mai le Tusi Paia i se auala faafatusolo: “O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.”—Isaia 35:1.

 Faafitauli: O le faaaogā sesē e tagata o le suāvai, ua iʻu atu ai i le tele o le suāvai e maʻimau nai i lo o suāvai e mafai ona saunia mai e le laueleele.

 Vaifofō: O le a faataunuuina e le Malo o le Atua lona “finagalo i le lalolagi” ae lē o le manaʻo o tagata manatu faapito. (Mataio 6:9, 10) O le a saunia mai e le Malo aʻoaʻoga e sili ona lelei mo ona tagatānuu, auā o loo taʻua i le Isaia 11:9, “o le a tumu le lalolagi i le poto e uiga iā Ieova e pei ona ufitia o le ilititai i le suāsami.” a O le iloaina e tagata o na aʻoaʻoga ma le alofa loloto mo le Atua ma ana foafoaga uma, o le a latou tausia lelei ai le lalolagi paneta ma mea o le natura.

•    Ina ia iloa atili e faatatau i mea o le a faia e le Malo o le Atua, tagaʻi i le mataupu “O le ā o le a Faataunuuina e le Malo o le Atua?”

•    Faitau i le Isaia mataupu 35 ina ia iloa ai pe o le a faapefea ona suia le lalolagi e avea ma parataiso.

•    Maimoa i le vitiō Aiseā na Foafoaina ai e le Atua le Lalolagi?, ina ia iloa atili ai e faatatau i le finagalo o le Atua mo le lalolagi ma tagata.