A o faagasolo le 2022, na faaaluina ai e malo o le lalolagi le 2.24 tiliona tālā Amerika i a latou vaegaʻau. O se aofaʻiga aupito i telē lea ua faamauina ua alu i vaegaʻau. O le māfuaaga sili lava o lenei tulaga, ona o le osofaʻiga a Rusia iā Ukraine. Na taʻua i se lipoti a le Stockholm International Peace Research Institute (SIPRI) iā Aperila 2023 e faapea, a o faagasolo le 2022:

•   “E 13 pasene le faatelega o tupe na faaalu e faigāmalo a Europa i a latou vaegaʻau. O se aofaʻiga aupito i telē lea ua faaaluina e faigāmalo a Europa i se tausaga, talu mai le 1991.”

•   “Na faateleina ai i le pe tusa o le 9.2 pasene le aofaʻiga o tupe faaalu a Rusia i a latou vaegaʻau, ma ua suia ai lo latou tulaga mai i le malo lona lima, agaʻi i le malo lona tolu e sili ona tele a latou tupe faaalu i vaegaʻau.”

•   O loo tulaga muamua pea Amerika i le tele o tupe faaalu i vaegaʻau. I le tuufaatasiga o tupe na faaalu e malo o le lalolagi i a latou vaegaʻau, “e 39 pasene na faaaluina e Amerika.”

 Ua faapea mai se tasi o tusitala o le lipoti a le SIPRI, o Dr Nan Tian, “O le faaauau ona faateleina o tupe faaalu a malo i a latou vaegaʻau i tausaga talu ai nei, ua iloa ai o loo tatou ola i se lalolagi e matuā lē saogalemu.”

 Na valoia mai i le Tusi Paia, o le a faateteleina feteenaʻiga i le vā o malo malolosi o le lalolagi, ma ua faailoa mai ai foʻi le auala e maua ai le filemu moni.

•   Ua taʻua i le Tusi Paia taimi nei o loo tatou ola ai, o ‘taimi o le iʻuga.’—Tanielu 8:19.

•   Na valoia i le tusi o Tanielu, a o faagasolo taimi o le iʻuga, o le a tausinio malo o le lalolagi ina ia maua le pule. O nei malo malolosi o le lalolagi o le a auai i se “tautūleiga,” pe o le a tauvā po o ai e sili ona malosi. O finauga i le vā o vaegaʻau a nei malo, o le a latou faaaluina ai le tele o “ʻoa,” po o mea e manaʻomia e vaegaʻau, ia e faaalu ai tupe.—Tanielu 11:40, 42, 43.

 Mo nisi faamatalaga e faatatau i lenei valoaga mataʻina o le Tusi Paia, maimoa i le vitiō Le Valoaga ua Faataunuuina—Tanielu 11.

•   Ua faailoa mai i le Tusi Paia, o le a aveesea e le Atua malo o loo pulea e tagata. ‘O le a faatūina e le Atua o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia ia malo uma, ae e tumau lea malo e faavavau.’—Tanielu 2:44.

•   E lē o toe umi ona aumaia lea e Ieova a le Atua o le filemu moni ma tumau, lea e lē o maua i pulega a tagata. O le ā le auala o le a ia faia ai faapea? O le a tafiesea e lona Malo i le lagi so o se auupega o taua, ma faaiʻuina taua uma.—Salamo 46:8, 9.

 Mo nisi faamatalaga e faatatau i mea o le a faataunuuina e le Malo o le Atua, faitau i le mataupu “O le a ʻTele le Filemu’ i le Pulega o le Malo o le Atua.”