E faia e Molimau a Ieova galuega tāua e fesoasoani ai i tagata i le sili atu ma le 200 atunuu. Peitaʻi, pe na o le 35 o na atunuu e mafai e foaʻi o loo latou maua ona totogi ai a latou tupe faaalu. E faapefea la ona totogi tupe faaalu i atunuu e lē o matuā tele ai se tamaoaiga?

 E iloilo e le Vaega Pule mea o loo manaʻomia e Molimau a Ieova i le lalolagi aoao ina ia mafai ai ona latou tapuaʻi atu iā Ieova ma talaʻia le tala lelei. E fuafua ma le faaeteete ma faaaogā lelei tupe e tusa ma tulaga manaʻomia. Pe afai e maua e se lālā ni tupe e sili atu nai lo le aofaʻiga e manaʻomia mo le faatupeina o galuega i o latou vaipanoa, latou te tuu ese le tupe faasili mo le faaaogāina e atunuu e itiiti ni tupe o loo latou mauaina. O lenei faatulagaga ua o latou mulimuli ai i le faaaʻoaʻoga a uluaʻi Kerisiano, sa fesoasoani le tasi i le isi e ala i ʻlo latou tamaoaiga.’ (2 Korinito 8:14) Na latou faaaogā lo latou tamaoaiga e fesoasoani ai i le lē tagolima o isi Kerisiano.

 O ā ni faalogona o o tatou uso ia na mauaina tupe faasili mai i isi lālā? Mo se faaaʻoaʻoga, i Tanzania, lea e ola ai le sili atu ma le afa o le faitau aofaʻi o ona tagata i se tupe e i lalo ifo o le lua tālā i le aso, na fesoasoani nei tupe e toe faaleleia ai le Maota mo Sauniga o loo faaaogā e le Faapotopotoga a Mafinga. Na tusi mai le faapotopotoga: “Talu mai le toe faaleleia o le Maota mo Sauniga, ua matuā telē le faatelega o i latou e auai i sauniga. E matou te matuā faafetaia le faalapotopotoga a Ieova ma le ʻauuso i le lalolagi aoao mo lo latou agalelei, ua mafai ai ona matou olioli i lenei nofoaga matagofie mo le tapuaʻiga.”

 O nisi o o tatou uso i Sri Lanka na mafatia i le lē lava o meaʻai ona o le faamaʻi o le KOVITI-19. Na aofia ai iā i latou na ia Imara Fernando ma lana tama tama laʻitiiti o Enosh. Ae e faafetai i foaʻi mai i isi atunuu, ua latou maua ai le fesoasoani na matuā manaʻomia. Na o la faia se card ma e na la tusi ai e faapea: “E ma te faafetai i uso na faaalia le alofa mo i maʻua i nei taimi faigatā. Ua ma fiafia lava i le avea ai o se vaega o lenei aiga, ma e ma te tatalo pea o le a fesoasoani Ieova i o tatou uso uma i nei aso e gata ai.”

 Po o fea lava o loo nonofo ai o tatou uso ma tuafāfine, e uunaʻia i latou e tufa atu mea ua latou maua. Mo se faataʻitaʻiga, na faia e Enosh se tamaʻi pusa e faaputu ai ana tupe, ina ia mafai ai ona ia faia se foaʻi mo aiga o loo manaʻomia le fesoasoani. Na faaalia foʻi e Guadalupe Álvarez lenā uiga agalelei. E nofo o ia i se setete i Mekisikō, lea e na o ni nai tagata e mauaina le totogi pito i maulalo po o le matuā leai lava o se tupe e maua. Peitaʻi, na ia foaʻi le mea na ia mafaia. Ua ia faapea mai: “Ou te lotofaafetai iā Ieova mo lona agalelei ma lona alofa faamaoni. Ou te iloa o laʻu foaʻi o le a faaopoopo i foaʻi a isi, ma o le a aogā mo oʻu uso o loo latou manaʻomia.”

 E fiafia ofisa o Lālā pe a latou auina atu tupe i nofoaga o loo iai le manaʻoga. Na faapea mai Anthony Carvalho, o sē e galue i le Komiti o le Lālā a Pasili: “Mo le tele o tausaga, na manaʻomia ai le fesoasoani tautupe mai i isi atunuu mo le faatinoina o le galuega i le matou atunuu. Ona o lenei fesoasoani, ua matou vaaia ai se faatelega mataʻina. O lea la ua faaleleia le matou tulaga tautupe, ua matou maua foʻi la le faaeaga e fesoasoani atu ai i isi. E vaai o tatou uso i le galuega talaʻi o se galuega mo le lalolagi atoa, ma ua iloa ai le latou vaega ua tatau nei ona fai o ni soo faataulaga o Iesu.”

 E faapefea i Molimau a Ieova ona saunia le fesoasoani sili mo o latou uso ma tuafāfine o loo iai le manaʻoga? E lē faia e ala i le auina saʻo atu o tupe i ofisa o lālā i isi atunuu, ae e ala i le faia o foaʻi mo le galuega i le lalolagi aoao. E mafai ona fai lau foaʻi i pusa o meaalofa a faapotopotoga ua faaigoaina “Galuega i le Lalolagi Aoao” po o le faia i le donate.pr418.com. O foaʻi uma faapena e matuā talisapaia.