Na matuā faafiafiaina Molimau a Ieova i le lalolagi aoao ina ua faalauiloa i le jw.org i le amataga o Mati 2022 le faasilasilaga lenei: “Ua filifili nei le Vaega Pule ina ia faalaeiau faapotopotoga uma e toe amata ona faia sauniga i le Maota mo Sauniga, e amata atu i le vaiaso o Aperila 1, sei vaganā ai ua iai ni faasāsāaga a le malo i lo outou vaipanoa.” Peitaʻi, e leʻi uma le KOVITI-19. a O ā sauniuniga na fai ina ia puipuia ai i latou na auai i sauniga mai i le aafia i le faamaʻi? Ua silia ma le lua tausaga e lē o toe faia sauniga i Maota mo Sauniga, po o toe lelei lava la a tatou Maota e faia ai sauniga?

 O le mea moni, ua leva ona sauniuni o tatou uso mo le tele o masina ina ia mafai ona toe faia sauniga i Maota mo Sauniga.

 E faatoʻā tasi le masina talu ona lē toe faatasitasi i Maota mo Sauniga i le 2020, ae amata loa ona iloilo e le Matagaluega mo Faugāfale i le Lalolagi Aoao (WDC) i Warwick i Niu Ioka, aafiaga pe a faaaogā le Maota mo Sauniga ona o le KOVITI-19. Na iloilo foʻi mea na tatau ona faia ina ia faamautinoa o loo saogalemu a tatou Maota mo Sauniga.

 E masani lava e eseese mea e manaʻomia i vaega eseese o le lalolagi. Na faamatala e Matthew De Sanctis o lē e galue i le WDC e faapea: “I nisi atunuu, o se tasi o luʻi o le leai o se nofoaga e fufulu ai lima. Pe a leai se vai i le Maota mo Sauniga, e manaʻomia ona faatau pe asu mai vai i se vaitafe po o se vaieli. I isi atunuu, e fetuunaʻi e nisi faigāmalo aiāiga e faatatau i ʻea mālūlū, o vaega e faaalu ai i fafo le ʻea, ma faailoilo mo le soifua mālōlōina ma le tumamā.”

 Na faapefea ona taulima e o tatou uso na luʻi? Na taʻua e Matthew, na faaaogā i le tele o Maota mo Sauniga “mea e mauagofie ma taugofie.” O se faataʻitaʻiga, i Papua Niu Kini, na faatulaga ni nofoaga e fufulu ai lima e faaaogā ai fagupaʻu lapopoʻa e taʻi 20 lita le vai e ofi ai, ma e faapipii ai gutu paipa. O lenā auala na mafai ai e o tatou uso ona saunia mea e fufulu ai lima i Maota mo Sauniga i nuu maotua, mo na o le $40 tālā Amerika. Ae mo Maota mo Sauniga i Aferika, e silia ma le 6,000 mea e fufulu ai lima o ituaiga lelei na faatau mai i Asia.

 O nisi fetuunaʻiga na fai na aofia ai le faapipiiina po o le toe faafou o ili ma vaega e faaalu ai le ʻea i fafo, ina ia fou ai pea le ʻea e mānava i le Maota mo Sauniga. O le tele o faapotopotoga na latou faatauina ʻau uumi e faapipii i ai maikorofoni feaveaʻi, ina ia ʻalofia le paʻi i ai o le aofia. Na faia taumafaiga e faaitiitia ai le pipisi o le faamaʻi e ala i le solo e lē aunoa o vaega e tele ina paʻi i ai, e pei o ʻau o faitotoʻa ma ki o paipa. E faapipii i nisi faapotopotoga paipa e otometi. I Chile, o le faia o suiga ia e manaʻomia mo Maota mo Sauniga taʻitasi, e pe ā ma le $1,400 tālā Amerika le tupe e alu ai.

 E ui e taumafai o tatou uso e faamuamua le saogalemu o Maota mo Sauniga, ae e latou te taumafai foʻi e faaaogā tatau foaʻi tauofo. O se faaaʻoaʻoga, i nisi atunuu e faaaogā e o tatou uso tupe mai i le malo e faatau ai mea e fufulu ai lima ma ʻau uumi mo maikorofoni. E galulue faatasi ofisa o lālā e faaaogā tatau tupe e ala i le faatau mai o mea e manaʻomia i ni aofaʻiga tetele. E masani ona feutagaʻi tuusaʻo ofisa o lālā ma le Matagaluega mo le Faatauina o Oloa mo le Lalolagi Aoao i falegaosimea. O le faia faapea, e lē gata e faaitiitia ai le tau ae vave ai foʻi ona maua na oloa.

 O faatulagaga ina ia saogalemu Maota mo Sauniga, ua mafai ai ona puipuia ma maua ai e i latou e auai i sauniga le mautinoa. Na taʻutino mai Dulcine o se tuafafine mai i Peru na iai “sina popole” iā te ia ina ua ia faalogo o le a toe foʻi i le Maota mo Sauniga. Na ia faapea mai, “Na ou maua i le KOVITI-19 ina ua faatoʻā amata ona pepesi le faamaʻi. Na ou lagona ai la le popole e toe foʻi i le Maota mo Sauniga neʻi oʻu toe aafia i le faamaʻi. Ae ina ua ou taunuu i le Maota, na ou vaaia le tele o taumafaiga a toeaina na fai ina ia faamautinoa le saogalemu. E tele fagu vailaau e fufulu ai lima na iai i le Maota, na faaaogā ʻau uumi mo maikorofoni, ma na faia faatulagaga e solo le Maota i se vailaau a o leʻi amata ma pe a uma foʻi le sauniga. O nei mea uma na ou lagona ai le malupuipuia.” b

 E ese foʻi le luʻi na feagai ma Sara o se tuafafine mai i Zambia. Na ia faapea mai: “Na maliu laʻu tane i le KOVITI-19 i ni nai masina ua teʻa. Na ou popole po o ā ni oʻu faalogona pe a ou auai i le sauniga i le Maota e aunoa ma laʻu tane mo le taimi muamua.” O le ā na tupu ina ua ia auai i le sauniga i le Maota? Na ia faapea mai, “O sauniga i le Maota ua faamaonia ai o loo faatasi mai pea Ieova i nei aso e gata ai. I le taimi lenei, ua sili atu faalaeiauga ua ou maua, faamāfanafanaga, ma le lagolagosua mai i toeaina ma le toʻatele o uso ma tuafāfine.”

 E matuā talisapaia e o tatou uso ma tuafāfine pele i le lalolagi aoao le toe foʻi i le Maota mo Sauniga. Faafetai tele mo lo outou aao foaʻi. O le tele o na foaʻi na faia e faaaogā ai le donate.pr418.com. Ua fesoasoani nei foaʻi iā i tatou ina ia faamautinoa e lelei ma malupuipuia nofoaga mo le tapuaʻiga mamā.