O loo matuā naunau le Vaega Pule e faaaogā foaʻi tauofo, e fausia ma faaleleia ai fale ia e fesoasoani i la tatou galuega talaʻi. O se faataʻitaʻiga, i le tausaga faaleauaunaga 2023, na faaaluina ai e faalapotopotoga faaletulafono o loo faaaogā e Molimau a Ieova, le silia ma le $500 miliona i le faatauina, fausia, le toe faaleleia, ma le tausia lelei o Maota mo Sauniga ma Maota mo Fonotaga i le lalolagi aoao. a O lenei aofaʻi, e lē aofia ai tupe o loo faaalu e faapotopotoga i le lalolagi aoao, mo le tausia lelei o Maota mo Sauniga.

 E lē gata i lea, o loo faaaogā foʻi foaʻi tauofo mo le fausia ma le tausia lelei o ofisa o lālā, lea e fesoasoani e faamaopoopo ma lagolagoina ai le galuega talaʻi i le lalolagi aoao. Ua faafaigofie galuega i le lālā, ina ia mafai ai ona faaaogā nisi o na foaʻi e lagolagoina ai le fausia ma le toe faaleleia o Maota mo Sauniga, ma Maota mo Fonotaga. Peitaʻi, e taugatā le toe faafou, toe faaleleia, po o le siitia o ofisa o le lālā i se isi nofoaga. Aiseā e tāua ai nei galuega? E faapefea ona lagolagoina e ofisa o lālā le galuega talaʻi? Seʻi o tatou vaai.

 O le tele o ofisa o lālā, ua silia i le 30 po o le 40 tausaga talu ona fausia. Ua faapea mai Nicholas mai i le Matagaluega o Faugāfale i le Lalolagi Aoao: “E oo lava i se fale e lelei ona tausia, e iai lava le taimi e pala pe leaga ai. O lea, e manaʻomia galuega faaleleia ina ia toe faafoʻisia ai le fale i se tulaga lelei ma umi ai ona aogā.”

 E manaʻomia foʻi ona faaleleia fale i Peteli, ina ia piiama ai pea i manaʻoga o le faalapotopotoga. Talu ona fausia le tele o ofisa o lālā, ua matuā faatupulaʻia le aofaʻi o tagata talaʻi i le lalolagi aoao. Ina ia fesoasoani i nei tagata talaʻi, ua manaʻomia ai foʻi le toʻatele o tagata tauofo e galulue i nei ofisa. O lea, o fale sa fetaui lelei i le taimi na fausia ai, ua matuā lāiti pe a fua i le manaʻoga i lenei taimi.

 O se tasi o vala e sili ona tāua, o le saogalemu. A o faagasolo aso e gata ai, o le a tatou vaaia le faateteleina ma le mataʻutia o mala faalenatura. (Luka 21:11) Pe a faaaogā auala e sili ona lelei mo faugāfale, e faamautinoa ai ua saogalemu nei fale mo i latou o loo galulue ai. O le a faigofie ai foʻi mo uso ona faaaogā nei fale e faamaopoopo ai galuega fesoasoani, ma lagolagoina ai le galuega talaʻi pe a mavae se mala faalenatura.

 E ala i le taʻitaʻiga a le Vaega Pule, na faia ai ni galuega tetele i ofisa o lālā e 43 a o faagasolo le tausaga faaleauaunaga 2023. O lona uiga, e toetoe o le ʻafa o fale o Peteli i le lalolagi aoao, na faia ai ni galuega faufale. Mātau nisi nei o faaaʻoaʻoga e faamatilatila ai le tāua o nei galuega.

 Angola. Ua faapea mai Matt, o se sui o le Komiti o le Lālā i Angola: “O se faaeaga le vaaia o le faataunuuina o le Hakai 2:7 i se auala faapitoa. I le na o le sefulu tausaga, ae ua 60 pasene le faatelega o tagata talaʻi ua iai! Ina ia lagolagoina nei tagata talaʻi, na manaʻomia ona faatoluina le aofaʻi o tagata e galulue i le Peteli. Peitaʻi, e leʻi mafai ona valaaulia tagata uma na manaʻomia, ona o le lāiti o fale i le Peteli. O le iʻuga, e toʻatele tagata na galulue ovataimi ma faia le tele o galuega, nai lo o galuega sa tatau ona latou faia.”

 Na tofia ni uso e iloilo po o le ā se auala e mafai ona foʻia ai lenei faafitauli. I le taimi muamua, na mafaufau uso e vave atu ma faigofie ona toe faafou le ofisa o le lālā o loo iai. Ae ina ua uma ni a latou saʻiliʻiliga, na latou iloa ai e lē o le auala atamai lea e faaaogā ai foaʻi tauofo. Nai lo o lea, na latou fautuaina le faatauina mai ma le toe faafouina o se fale lata ane. Na faapea mai Matt: “Ina ua faailoa atu i le Komiti o le Lālā lenei fuafuaga, na matou popole ina neʻi lē tutusa lenei fale ma fale e masani ona tatou fausiaina. Peitaʻi, ua matou iloa nei, e fetaui lelei lenei fale. Na faamanuia Ieova i lenei faaiʻuga.”

 I le lumanaʻi, atonu e manaʻomia ona toe faatelē le ofisa o le lālā i Angola. Ae mo le taimi lenei, ua lava ma totoe le ofisa fou o le lālā ua iai, o fale e mafai ona fesiitaʻi, ma isi fale mautotogi, mo le lagolagoina o le faatelega ua iai i le fanua.

 Iapani. Na muaʻi fausia fale o le lālā i Iapani i le pe ā o le 40 tausaga talu ai, ma o le tele o na fale, e leʻi faia i ai ni suiga tetele e toe faafou ai. E ui o loo galulue mamafa uso i le tausiaina lelei, ae o le mea moni, ua umi atu ona tatou faaaogāina nei fale nai lo o le mea e tatau ona iai. O le māfuaaga lea, ua faia ai nei se galuega telē e toe faafou ai.

 A o faagasolo tausaga, ua tele foʻi suiga i le olaga i le Peteli. A o leʻi oo i le 2015, na kukaina uma ʻaiga o le aso mo le aiga Peteli. O le tele la o potu i le Peteli i Iapani, e laʻitiiti lava se avanoa e mafai ona kuka ai se meaʻai. Ae i le taimi lenei, ua tele ina kuka meaʻai a le tagata lava ia. O le mea lea na aofia ai i lenei galuega, le toe faatetelē o umukuka o potu, ina ia faigofie ai mo tagata Peteli ona kuka a latou meaʻai. Ua faapea mai le tuafafine o Kumiko lea o loo auauna i le lālā i Iapani: “Ou te matuā talisapaia lenei suiga, ma e fesoasoani iā te aʻu e lagolagoina ai lenei faatulagaga fou i le Peteli.”

 O le galuega o loo faia i Iapani, e matuā tāua i le tatou galuega o loo faia i le lalolagi aoao. (Mataio 28:19, 20) E na o le lua lālā e mafai ona lolomia atoa le Tusi Paia, ma o Iapani o se tasi o na lālā. O lea, o se tasi o vala o lenei galuega faufale o loo faaauau, o le faapipiiina lea o se masini e aoina le pefu ma fasi pepa, auā le saogalemu o i latou o loo galulue i le fale lomitusi. E toetoe tasi miliona na faaaluina i le faatauina ma le faapipiiina o lenei masini. E ui i lea, o lenei masini ua faamautinoa ai e lomia pea ma lafoina atu e le lālā lomiga faale-Tusi Paia.

 Na faamautinoa e uso e faaauau ona lolomiina le Tusi Paia, a o faaauau galuega mo le toe faafouina o le lālā. Na taʻua e Trey, o se sui o le Komiti o le Lālā i Iapani: “A o faagasolo lenei galuega faufale, ae o le taimi foʻi lenā o loo tatala e le tatou faalapotopotoga le tele o faaliliuga o le Tusi Paia, ma ua faatupulaʻia foʻi le toʻatele o tagata e manaʻomia ni Tusi Paia i le lalolagi aoao. O lea, na tatau ai ona galulue faatasi le tele o matagaluega ma tagata eseese, ina ia faatulaga le taimi e faapipii ai masini fou, ma taimi e lolomi ai tusi. E ui i nei luʻi, ae toetoe 220,000 Tusi Paia na lomia i masina taʻitasi mai iā Mati iā Aokuso 2023, i le taimi tonu lava o loo matuā pisi ai le toe faafouina o le fale lomitusi. Na faataunuuina uma nei galuega e aunoa ma le toe faaopoopo o se tau aofaʻi i nei galuega faufale.

 O le faasaoina o le malosiaga, o se tasi lea o vala autū o lenei galuega faaleleia o loo fai. O le a faapipiiina pusa e puʻe ai le malosiaga o le lā (solar panel) lea o le a faasaoina ai le pe ā o le $120,000, o tupe faaalu i tausaga taʻitasi mo le eletise. O le a faapipiiina foʻi ni faamalama e atu tolu, lea e atili faaitiitia ai le malosiaga e faaaogāina, ma o le a faasaoina ai le pe ā $10,000 i tausaga taʻitasi. E ui e taugatā nei pusa ma faamalama lea e faasaoina ai le malosiaga, ae i se fua faatatau, o le a faasaoina ai le silia i le $3.5 miliona, pe a fua i le umi o le a faaaogāina ai nei mea. O le a fesoasoani foʻi nei auala e faaitiitia ai le aafiaga o le siʻosiʻomaga.

 O galuega faufale o loo faia i nei lālā e lua, ua tatou iloa ai le tele o galuega o loo manaʻomia ona faia, ina ia faamautinoa o loo lagolagoina e ofisa o Peteli, le manaʻoga o loo iai i le faiva i le fanua. O lea, o loo faaauau pea nei galuega faaleleia. Ua taʻua e Aaron mai i le Matagaluega mo Faugāfale i le Lalolagi Aoao: “E tele galuega ua uma ona faataunuuina e uso, ae o loo tele pea isi mea o loo manaʻomia ona fai.” O le a faapefea ona faataunuuina nei galuega? Ua faapea atili mai Aaron: “E ese mai i foaʻi tauofo o loo faatupe ai nei galuega tāua, e matou te talisapaia le agaga faataulaga o i latou na tauofo mai i taimi ua mavae, faapea ē o loo faia ni fetuunaʻiga i o latou olaga ina ia fesoasoani mai i le lumanaʻi. O le fesoasoani a o tatou uso i le itu faaletino ma le itu tautupe, ua faaalia manino ai o loo faamanuia Ieova i lenei galuega.”—Salamo 110:3.

 O loo faatupeina uma a tatou galuega faufale ma galuega toe faaleleia i foaʻi tauofo, ma o le tele o na foaʻi o loo faia e ala mai i le donate.pr418.com. Faafetai tele lava mo foaʻi o loo faaauau ona outou faia.