Na valoia i le Tusi Paia o le a iai taua, mafuiʻe, faamaʻi, ma isi “vaaiga e matataʻu ai” i o tatou aso. (Luka 21:10, 11) Na faaauau ona faataunuu lenā valoaga a o faagasolo le tausaga faaleauaunaga 2022. a O se faataʻitaʻiga, na vevela pea le taua i Ukraine ma aafia ai le soifua o le faitau miliona o tagata. O le taimi foʻi lenā na tau atiaʻe ai olaga o tagata i le tele o atunuu ona o le faamaʻi o le KOVITI-19. E lē gata i lea, na aafia le toʻatele o tagata i mala faalenatura e pei o mafuiʻe i Haiti ma afā mataʻutia i Amerika Tutotonu, Filipaina, ma le itu i saute i sasaʻe o Aferika. Na faapefea ona fesoasoani Molimau a Ieova i ē na aafia i nei mala?

 Na saunia e la tatou faalapotopotoga le fesoasoani laveaʻi i ē na aafia i mala pe tusa ma le 200, a o faagasolo le tausaga faaleauaunaga 2022. O le aofaʻi atoa o le tupe na tatou faaaluina i le saunia o na fesoasoani, e pe tusa ma le $12 miliona. b Seʻi mātau mai auala na faaaogā ai na foaʻi tauofo e fesoasoani ai i ē na aafia i ni mala faalenatura se lua.

 E 7.2 le malosi o le mafuiʻe na lūlū i le itu i saute o Haiti iā Aokuso 14, 2021. O le mea e faanoanoa ai, e toʻatolu Molimau a Ieova na maliliu ai—e toʻalua o tatou tuafāfine ma le uso e toʻatasi. E tele mea na faaleagaina e le mafuiʻe ma na matuā mafatia ai ē na aafia. Na faapea mai se uso e igoa iā Stephane: “E toʻatele tagata na feoti i le aai, ma o vaiaso taʻitasi na faia ai le tele o maliu i le silia ma le lua masina.” Na faapea mai se isi uso e igoa iā Éliézer: “E toʻatele Molimau a Ieova na leai ni fale e nonofo ai, leai ni ofu, seevae, ma isi mea e manaʻomia e ola ai. Na umi se taimi o fefefe tagata ona o le faaauau ona lūlū o tamaʻi mafuiʻe.”

 Na vave ona saunia e la tatou faalapotopotoga le fesoasoani. Na saunia e le lālā i Haiti le silia ma le 53 tone o meaʻai, faapea foʻi faleʻie, tapoleni, faamalū, ma fagamaa faapitoa mo telefoni feaveaʻi. E lē gata i lea, e silia ma le 100 fale na toe fausia pe toe faaleleia a o faagasolo le tausaga faaleauaunaga 2022. Na matou faaaluina le silia ma le $1 miliona mo fesoasoani laveaʻi.

 Na matuā talisapaia e o tatou uso ma tuafāfine lenā fesoasoani. Na faapea mai Lorette: “Na faatamaʻia atoa e le mafuiʻe lo matou fale ma la matou pisinisi. Na leai ni a matou meaʻai. Peitaʻi, na fesoasoani mai le faalapotopotoga a Ieova, e ala i le saunia o mea uma na matou manaʻomia.” Na faapea mai Micheline: “Na faaleagaina e le mafuiʻe le fale na matou nonofo ai ma laʻu fanau tama e toʻalua. Ou te leʻi iloa le mea e fai seʻi vaganā ai le tatalo mo le fesoasoani, ma na tali mai Ieova e ala i lana faalapotopotoga. Ua mautū le fale o loo matou nonofo ai i le taimi lenei. Ua ou maumauaʻi e faia mea uma lava ina ia faaalia ai loʻu lotofaafetai iā Ieova.”

 Na mātau e le pulega o le aai a tatou galuega laveaʻi. Na faapea mai le faatonu o le maota tele o le aai o L’Asile: “Ou te faamālō atu iā te outou i le vave ona outou ō mai e fesoasoani. E ese loʻu fiafia i le vaavaai atu i le tou matuā faaaloalo i ē e iai le pule. O se mea lelei le vaavaai atu e tou te lē naunau i tupe, ae tou te fia fesoasoani i tagata. Ua outou faia nei gaoioiga ona o le alofa.”

 Na taia Mozambique e le afā o Ana iā Ianuari 24, 2022, ma agaʻi atu ai i le itu i sisifo o Malawi. Na iai timuga mamafa ma matagi na oo atu i le 100 kilomita i le itula (62 maila i le itula) le malolosi. Na paʻuʻū ai pou eletise, tafiesea auala laupapa, ma faateteleina ai lologa.

 E silia i le 30,000 Molimau a Ieova i Malawi ma Mozambique na aafia i le afā. Na faapea mai Charles o se uso na fesoasoani i galuega laveaʻi: “Ina ua vaaia le puapuagatia o uso ma le tele o mea na faaleagaina, na ou matuā faanoanoa ma ou lē iloa le mea a fai.” Na atili ona mafatia uso ona na tafiese uma a latou mea totō ma meaʻai. Na faaleagaina fale o le toʻatele o i latou. O le mea e faanoanoa ai, na maliliu le avā ma afafine e toʻalua o se tasi o uso, ona na malelemo ina ua mafuli lo latou vaa faaola.

 Na mataʻutia le afā. Na lagona e le aiga o Sengeredo le malosi o le tatafe mai o vai i le tā o le tasi i le vaveao i Nchalo i Malawi, ona e lua vaitafe na pāpā. Na filifili le uso o Sengeredo e tatau ona ō ese mai i le fale. O se filifiliga atamai ona e leʻi leva ae paʻū le fale ona o lologa. Na faaleagaina pe na tafiesea a latou meatotino. Na filifili lo latou aiga e ō i le Maota mo Sauniga lea e masani lava e 30 minute e savavali ai mai i lo latou fale. Ae ona o le malosi o lologa, na latou savavali ai mo le lua itula. Na latou taunuu ma le saogalemu e ui na matuā susū o latou ofu ma lagona le vaivai.

 Na vave ona gaoioi lālā i Malawi ma Mozambique e faamaopoopo fesoasoani laveaʻi. Na latou faatonuina ovasia matagaluega ma toeaina e iloilo manaʻoga o uso na aafia, ma saunia le fesoasoani faaleagaga ma tau faalogona. Na tofia ni Komiti mo Fesoasoani Laveaʻi ina ia vaavaaia le galuega laveaʻi, ma na vave gaoioi nei komiti e fesoasoani i o tatou uso ina ia maua meaʻai ma isi mea e manaʻomia. E silia i le $33,000 na faaalu e fesoasoani i tagata, ma e silia i le $300,000 na faaalu mo le toe faaleleia ma le toe fausia o fale.

 Na faaaogā tatau e Komiti mo Fesoasoani Laveaʻi tupe aemaise na matuā siitia le tau o mea. O se faataʻitaʻiga, na siitia i le 70 pasene le tau o le falaoamata, o se meaʻai masani i Malawi, a o leʻi atoa le fitu masina talu ona amata le galuega laveaʻi. Na siitia foʻi le tau o le penisini. Ina ia sefe tupe, na faatau mai e uso meaʻai ma meafaufale i le vaipanoa lava lenā ma i se aofaʻiga tele. O le iʻuga, na latou maua oloa i se tau paʻū ma ʻalofia ai le taugatā o le felaʻuaʻiga o oloa.

 Na matuā faagaeetia loto o tagata o Ieova ona o nei galuega laveaʻi. Na faapea mai Felisberto, o se uso i Mozambique: “Ou te lē iloa se isi lava faalapotopotoga ua latou saunia le tele o mea: o meafaufale, o le felaʻuaʻiga o oloa, o tagata faufale, meaʻai, ma le taʻitaʻiga alofa. O nei galuega laveaʻi o se faaaʻoaʻoga mataʻina lea o le alofa faaleuso na faamatala e Iesu i le Ioane 13:34, 35.” Na faapea mai Ester i Malawi, o lē na faaleagaina lona fale ma ua maliu lana tane: “Na ou lē iloa le mea a fai ona e leai saʻu tupe e toe fau ai se isi fale. Ina ua toe fau e uso se fale mo aʻu, na ou lagona e pei ua ou iai i le Parataiso.”

 E tatou te faatalitalia o le a tele mala faalenatura, a o tatou latalata atu i le lalolagi fou na folafola mai. (Mataio 24:7, 8) Ae ua matou mautinoa o le a maua e tagata o Ieova le fesoasoani manaʻomia, ona o le tele o a outou foaʻi tauofo. O loo faamatala e le donate.pr418.com auala e faia ai foaʻi tauofo. Faafetai i lo outou limafoaʻi.