I tausaga taʻitasi, e faitau afe i latou e papatisoina ma ua manaʻomia ai se faatelega i maota e faaaogā mo le tapuaʻiga iā Ieova. Ina ia tali atu i lenei manaʻoga, ua fuafuaina ai e Matagaluega o le LDC i le lalolagi aoao, le fausia po o le toe faaleleia i le silia ma le 2,700 nofoaga mo tapuaʻiga, a o faagasolo le tausaga faaleauaunaga 2020. a

 Peitaʻi, na faalavelavea uma nei fuafuaga ona o le faamaʻi o le KOVITI-19. Ina ia puipuia o tatou uso ma tuafāfine faapea foʻi le mulimulitaʻia o tulafono a faigāmalo, na taofia lē tumau ai e le Komiti Lomitusi a le Vaega Pule le tele o galuega faufale i le lalolagi aoao. E ui i lea, a o faagasolo le tausaga faaleauaunaga 2020, e silia ma le 1700 nofoaga mo le tapuaʻiga na fausia ma toe faaleleia a o leʻi pepesi le faamaʻi. E faaopoopo atu i lena, e silia ma le 100 galuega faufale i lālā na faamāeʻaina. Mātau le auala na maua ai e o tatou uso aogā mai i nisi o galuega faufale se lua.

 Lālā i Cameroon. O le lālā tuai lea na tū i Douala, e lē gata ua laʻitiiti tele ae e tele foʻi galuega toe faaleleia na manaʻomia ona fai. Na fuafua le Komiti Lomitusi e toe faafou lena lālā. Peitaʻi, e taugatā atu le tau e toe faafou ai nai lo o le tau o le fale atoa o loo iai. Na latou iloiloina foʻi le fausiaina o se nofoaga fou, po o le faatauina mai ma toe faaleleia se fale o loo iai ae e leʻi taulau.

 Peitaʻi, na iloa e uso o loo fuafua le faigāmalo e fausia se auala i tala ane o la tatou Maota Fono o loo i le itu i mātū o Douala. O lena auala, e lē gata o le a faafaigofie ai ona uia le Maota Fono, ae o le a faigofie ai foʻi ona laʻuina atu i ai ni mea manaʻomia. O lena fuafuaga na talafeagai lelei ma manaʻoga o le lālā. O lea na faamaonia ai e le Vaega Pule le fausiaina o se lālā fou, i se vaega o le fanua o loo iai le Maota Fono.

 Na galulue faatasi Molimau ma kamupani mai tua i lena galuega, lea na faasaoina ai le taimi ma tupe. O le mea moni, e silia ma le lua miliona tālā (Amerika) le tupe na faasaoina mai ina ua māeʻa le galuega! E leʻi leva ona faaaogā e le aiga Peteli lena fale fou, ae pepesi loa le KOVITI-19.

 Ua maua e tagata Peteli i Cameroon aogā mai i le nonofo ma galulue ai i se siʻosiʻomaga lelei, ma o loo latou vāai i lena lālā fou o se meaalofa mai iā Ieova. Na faapea mai se ulugalii, “E ma te mananaʻo e matuā galulue mamafa, ma faaalia atu e matuā tāua iā i maʻua lenei meaalofa.”

 Ofisa Faaliliu (RTO) i Tojolabal i Mekisikō. Mo le tele o tausaga, na galulue le ʻaufaaliliu a le gagana Tojolabal i le lālā i Amerika Tutotonu, lea e latalata i le Taulaga o Mekisikō. Peitaʻi, o le toʻatele e tautatala i le gagana Tojolabal, e i taulaga o Altamirano ma Las Margaritas lea e toetoe 1,000 kilomita (620 maila) le mamao. O le iʻuga, e leʻi faigofie i le ʻaufaaliliu ona piiama atu i suiga i le gagana Tojolabal. E leʻi faigofie foʻi i le lālā ona saʻilia ni uso ma tuafāfine lata ane, e fesoasoani i galuega faaliliu ma puʻegāleo i le gagana Tojolabal.

 Ona o na māfuaaga, na filifili ai loa le Komiti o Tusitusiga a le Vaega Pule e siitia le ʻaufaaliliu i se nofoaga o loo toʻatele ai tagata e tautatala i le gagana Tojolabal. Ina ia faataunuuina lena mea, na filifili ai loa le lālā e faatau mai se fale ma toe faaleleia. E tele tupe na faasaoina i lena faiga nai lo o le fausiaina pe mautotogi foʻi i se fale.

 Ua faapea mai se tasi o tagata faaliliu i aogā na ia maua: “I le sefulu tausaga talu ona ou galue o se tagata faaliliu i le lālā, ou te leʻi feiloaʻi lava i se aiga lata mai e tautatala i laʻu gagana. O lea ua tū nei le ofisa i le ogatotonu o le vaipanoa o loo tautatala i le gagana Tojolabal, ma ua matou talanoa nei ma tagata i le gagana Tojolabal i aso uma. O lena mea ua faaleleia atili ai laʻu tautala aemaise laʻu galuega.”

 Pe a talafeagai ai, o loo i ai fuafuaga i galuega mo RTO e 75 ma nofoaga mo aʻoga faale-Tusi Paia mo le tausaga faaleauaunaga 2021. O le a faaauau galuega tetele i lālā e valu, e aofia ai ma le galuega o le ofisa ulu fou i Ramapo i Niu Ioka, faapea foʻi le toe siitia o lālā a Anitenitina ma Italia. E faaopoopo atu i lena, e silia ma le afe Maota mo Sauniga fou o loo manaʻomia. E silia ma le 6,000 nofoaga mo tapuaʻiga ua lē o toe talafeagai, ma ua manaʻomia ona suia. O loo iai foʻi le isi 4,000 Maota mo Sauniga e manaʻomia ona toe faaleleia.

 O le ā le auala o loo faatupeina ai nei galuega uma? A o talanoaina le galuega i le ofisa faaliliu i Tojolabal, na taliina ai e le uso o Lázaro González o se sui o le Komiti o le Lālā a Amerika Tutotonu lena fesili. “I le oganuu a la matou lālā, e lē tele ni mea na matou mauaina. Ae o le lagolagosua a lo tatou ʻauuso ua mafai ai ona fausia le ofisa faaliliu mo tatou uso i lena vaipanoa. O foaʻi mai i o tatou uso i le lalolagi aoao, ua mafai ai ona galulue le ʻaufaaliliu i le mea tonu o loo iai tagata e tautatala i lena gagana. E matou te momoli atu la matou faafetai i o tatou uso i le lalolagi aoao, mo la latou lagolagosua ma le agalelei.” Ioe, o nei galuega faufale ua mafai ona faatinoina ona o a outou foaʻi i le galuega i le lalolagi aoao. O le tele o na foaʻi o loo faia i luga o le donate.pr418.com.