O le tauaofiaga itumalo i le 2020, o le tauaofiaga muamua lenei ua mafai ona puʻeina ma tuu i le Initaneti, ina ia mafai ai e uso i le lalolagi aoao ona matamata i ai. Peitaʻi, o le toʻatele o tatou uso ma tuafāfine i Malawi ma Mozambique na mafai ona matamata i le tauaofiaga e aunoa ma le faaaogāina o le Initaneti. Na faapefea ona tupu lenā mea?

 Na faataga e le Komiti o Sooupu ma le Komiti Tauaʻoaʻoga a le Vaega Pule, le faasalalauina o le tauaofiaga i televise ma leitiō i Malawi ma Mozambique. Aiseā? O Malawi o se tasi o atunuu i le lalolagi e sili ona taugatā ai le Initaneti, ma e toʻaitiiti Molimau a Ieova e mafai ona latou totogiina. Na faamatala e William Chumbi, o se sui o le Komiti o le Lālā i Malawi: “O le faaaogāina o leitiō ma televise, e na o le pau lenā o le auala e mafai ona maua ai e uso ma tuafāfine nei meaʻai faaleagaga.” Na faapea mai foʻi Luka Sibeko, o se isi sui o le Komiti o le Lālā i Malawi: “Pe ana lē faasalalauina i televise ma leitiō lenei tauaofiaga, semanū e na o ni nai uso i le oganuu a le lālā e maua aogā mai i le tauaofiaga.” I Mozambique, e toʻaitiiti uso e mafai ona latou maua masini faaonapōnei, ma e taugatā foʻi le Initaneti.

 Talu ai ona o le KOVITI-19, na amata faasalalau ai i nisi televise ma leitiō sauniga a le faapotopotoga. a Peitaʻi, na talosaga o tatou uso i nei fale faasalalau mo nisi taimi faaopoopo, ina ia faasalalau atu ai le tauaofiaga.

 Na feagai o tatou uso i Malawi ma se luʻi. E masani lava, e tasi le itula e mafai ai ona faasalalau se polokalame. Na popole fale faasalalau, ina neʻi uumi polokalame e faasalalau i a latou alāleo ma lē fia faalogo ai tagata. Peitaʻi, na faamatala i ai e uso, o la tatou galuega e mo le lautele. E oo lava i taimi o faasāsāaga, e tatou te faailoa atu i le lautele se tala lelei mai i le Tusi Paia e faamāfanafanaina ai. E mafai ona fesoasoani lenā tala lelei i tagata ina ia avea ma tagatānuu lelei, ma maua ai se aiga fiafia i le olaga. Ina ua malamalama fale faasalalau, na latou talia loa le talosaga a uso mo se taimi faaopoopo.

 I Malawi, e tasi le fale televise ma le alāleo e tasi na faasalalau ai le tauaofiaga. O nei fale faasalalau e aofia ai le atunuu atoa i ana faasalalauga, ma e faitau miliona tagata e mafai ona mauaina. I Mozambique, na faasalalau le tauaofiaga i se fale televise e tasi ma alāleo faasalalau e 85.

 I na atunuu, e $28,227 b le aofaʻi o le tupe na faaalu e faasalalau ai le tauaofiaga i televise, ma e toetoe $20,000 na faaaluina e faasalalau ai i leitiō. E eseese tau e totogi mo alāleo, e amata atu i le $15 mo se alāleo e na o se vaega o le atunuu e oo ai ana faasalalauga, ae e oo atu i le $2,777 e totogi mo se alāleo e aofia ai le atunuu atoa.

 E galulue mamafa o tatou uso e fai le mea sili e faaaogā lelei ai a tatou foaʻi tauofo. O se faataʻitaʻiga, i Malawi na mafai ona faia e uso ni feutagaʻiga ma fale faasalalau mo ni tau paʻū, e aofia ai se paʻū e 30 pasene. O na tau paʻū na mafai ona sefe ai le aofaʻi e $1,711. I Mozambique, o nisi fale faasalalau na lotomalilie e faapaʻū le tau, ona o lo tatou talaaga lelei i le faamaoni ma le totogiina o le tupe i le taimi faatulagaina.

 Na matuā faaalia e o tatou uso le lototalisapaia, ina ua matamata ma faalogologo i le tauaofiaga i a latou lava televise ma leitiō. Na faapea mai Patrick, o se toeaina i se faapotopotoga i Malawi: “E matou te faafetai i uso o le Vaega Pule mo mea uma ua latou faia mo i matou i le taimi o le faamaʻi.” Na faapea mai foʻi Isaac mai i Malawi: “E leai se matou masini faaonapōnei, o le mea lea e matou te lotofaafetai ai ona o lenei sauniuniga faapitoa mai i le faalapotopotoga a Ieova, ua mafai ai ona matou faalogologo i le tauaofiaga i le leitiō. O lenei sauniuniga, ua maua ai e loʻu aiga atoa aogā mai i le tauaofiaga. E matou te vaai i ai o se faamaoniga o le alofa o Ieova i ona tagata.”

 O le tauaofiaga 2020, o le tauaofiaga muamua lea na auai ai se tagata talaʻi i Mozambique. Na ia faapea mai: “O le faatulagaga e matamata le tauaofiaga i le televise, ua faamanatu mai ai iā te aʻu o Ieova o le Atua e ona le malosi uma lava. E leʻi mafai e le faamaʻi ona taofia Ieova mai i le saunia o meaʻai faaleagaga, ma le auina mai o na meaʻai i o matou fale. Na ou vaaia faamaoniga o le alofa i tagata o Ieova. Ua ou mautinoa o le lotu moni lenei.”

 Na faapea mai Wyson o se toeaina: “E momoli atu loʻu faafetai i le auala ua tausia ai i matou e le pologa faamaoni i le taimi o le faamaʻi. O lenei sauniuniga o le faasalalau o le tauaofiaga i leitiō ma televise, ua fesoasoani i le toʻatele o i matou e utiuti le seleni o loo nonofo i lenei vaega e sili ona matitiva o le lalolagi, ina ia matamata ma faalogologo i le tauaofiaga ma maua ai aogā.”

 Ua toe faataga e le Komiti o Sooupu ma le Komiti Tauaʻoaʻoga a le Vaega Pule, le faasalalauina o le tauaofiaga itumalo 2021 i televise ma leitiō i vaipanoa ua filifilia. E faapefea ona totogi le faasalalauina o le tauaofiaga? E ala i foaʻi tauofo mo le galuega i le lalolagi aoao, ma o le tele o na tauofo ua mafai ona fai i auala eseese, o loo i le donate.pr418.com. Faafetai tele lava mo lo outou aaofoaʻi.