Ua taʻua i Le Olomatamata o Iuni 1, 1912, “O le toʻatele o le ʻaufaitau e masani ma ē e tauaso. E mafai ona latou maua lomiga e aunoa ma se totogi . . . . Ua lomia nei lomiga i ni mataʻitusi faapitoa, ina ia mafai ai e tagata tauaso ona faitau i ai.” Ua taʻua atili i Le Olomatamata: “Ua matuā talisapaia e le toʻatele o tagata tauaso le feʻau, o le a oo mai i le lalolagi se aso mamalu o faamanuiaga.”

 I le taimi na tusia ai na upu, e tele auala eseese na faaaogā e tusia ai le gagana patupatu i le faa-Peretania. E ui i lea, na mafai e Molimau a Ieova ona faasoa atu upu moni o le Tusi Paia i “mataʻitusi faapitoa” po o le gagana patupatu, ma o loo faaauau pea i aso nei. Ua maua nei lomiga i le gagana patupatu i le silia ma le 50 gagana. E faapefea ona saunia na lomiga?

 O le auala muamua, o le suia lea o mataʻitusi i mataʻitusi o le gagana patupatu. Na taʻua e Michael Millen o lē e faigaluega i le Text Processing Services i Patterson i Niu Ioka, “I le taimi muamua, na matou faaaogāina polokalame na faia e isi e saunia ai le gagana patupatu, peitaʻi e leʻi maua uma ai gagana na matou manaʻomia. I le taimi nei, ua matou faaaogāina le Watchtower Translation System e faaliliu ai le gagana patupatu i le tele o gagana. Ou te mautinoa e leai lava se isi polokalame faapea.”

 E aofia ai foʻi i nei lomiga e lē gata o le mataupu ae o faamatalaga o ata. O se faataʻitaʻiga, ua faamatalaina le ata i le faavaa o le lomiga Se Olaga Fiafia e Faavavau! i le gagana patupatu e faapea: “O se tamāloa o loo savali atu i se auala fepiʻopiʻoaʻi e siʻomia i togālaau mananaia, o aʻega ma mauga.” Ua taʻua e Jamshed, o se auauna o le faiva ma o se paeonia e tauaso e faapea, “E matuā tautele iā te aʻu faamatalaga o ata.”

 Pe a uma ona tusia nei lomiga, ona lafo atu loa lea i ofisa o lālā mo le lomiaina i le gagana patupatu. O i inā e lomia ai le lomiga i se pepa faapitoa e lē faigofie ona faaleagaina. Ona tuufaatasia lea o le lomiga ma auina faatasi atu ma lomiga a le faapotopotoga, pe faaaogā le auaunaga faapitoa a le fale meli mo tagata tauaso, lea e leai se totogi. Pe a tulaʻi mai se manaʻoga, e faatulaga e lālā se auala e vave maua ai e uso tauaso lomiga e manaʻomia mo sauniga a le faapotopotoga.

 E tele le taimi ma tupe e faaalu e faatino ai lenei galuega. O se faataʻitaʻiga, i le tatou fale lomitusi i Wallkill i Niu Ioka, o le taimi e faaalu e lomia ai ni Tusi Paia se 2 i le gagana patupatu, e tutusa lenā ma le taimi e lomia ai ni Tusi Paia masani se 50,000. E 25 vaega o le Tusi Paia i le gagana patupatu faa-Peretania, ma e 123 taimi e taugatā atu ai mea e manaʻomia e saunia ai na vaega, nai lo o le Tusi Paia masani. E pe ā ma le 150 tālā Amerika e faaalu mo na o le faavaa o nei vaega e 25!

 O ā faalogona o i latou o loo fesoasoani i le saunia o nei lomiga e faatatau i ā latou galuega? Ua faapea mai Nadia o loo auauna i le lālā i Aferika i Saute: “E lē faigofie le olaga mo tatou uso ma tuafāfine tauaso, o lea ou te vaai ai i lenei galuega o se faamanuiaga. E faamaonia ai e alofa tele Ieova iā i latou.”

 Ae faapefea pe a lē iloa e se tagata tauaso faitau le gagana patupatu? I nai tausaga ua mavae, na tatalaina ai le lomiga e taʻua o le Learn to Read Braille lea e maua ai mataʻitusi i le gagana patupatu ma mataʻitusi masani. Na saunia lenei lomiga e faaaogā faatasi e se tagata tauaso ma se tagata e lē tauaso. O lenei lomiga o se vaega o meafaigaluega e faaaogā e le tagata tauaso, e tusitusi ai i le gagana patupatu. E fesoasoani lenā i le tagata tauaso e manatua se mataʻitusi, ma faigofie ona iloa pe a paʻi i ai.

 Ua faapefea i uso ma tuafāfine tauaso ona maua aogā mai i nei lomiga? E masani ona auai i sauniga Ernst o lē e nofo i Haiti, ae e leʻi iai ni ana lomiga i le gagana patupatu. Sa manaʻomia ai la ona ia manatua mea pe a faia ana lauga ma tali i sauniga. Ua ia faapea mai, “I le taimi nei, ua mafai ona sii i luga loʻu lima ma fai oʻu sao i so o se taimi. Ou te lagona le autasi ma oʻu uso ma tuafāfine. E tutusa uma meaʻai faaleagaga o loo tatou maua!”

 Ua faapea mai Jan o se toeaina i Oseteria e faia le Suʻesuʻega o le Olomatamata ma le Suʻesuʻega Faale-Tusi Paia a le Faapotopotoga, ma e lē lelei atoatoa lana vaai, “E sili atu ona faigofie ona ou malamalama i a tatou lomiga i le gagana patupatu i lo o isi lomiga ua ou faitau ai. O se faataʻitaʻiga, ua iai numera o itulau, faaopoopoga pito i lalo e faigofie ona suʻe ma faamatalaga o ata e saʻo aʻiaʻi.”

 O Seon-ok o se paeonia i Korea i Saute e tauaso toe logonoa. I le taimi muamua, na ia faalagolago i le gagana faataga e faia i luga o lona lima. Ae i le taimi nei, ua mafai ona ia faitau i lomiga faale-Tusi Paia i le gagana patupatu. Ua ia faapea mai, “O isi lomiga i le gagana patupatu e faigatā ona faitau i ai ona o se patupatu ua misi, e lē saʻo laina o patupatu po ua manifinifi foʻi le pepa. Ae e faaaogā e Molimau a Ieova se pepa faapitoa ma e faigofie ona iloa patupatu, lea e faigofie ai mo aʻu ona faitau i ai.” Na ia toe faapea mai: “I le taimi muamua, na faatoʻā mafai ona ou suʻesuʻeina lomiga faale-Tusi Paia pe a iai se isi e fesoasoani mai. Ae i le taimi nei, ua mafai ona ou faia aʻu lava suʻesuʻega. O se fiafiaga iā te aʻu le mafai ona sauniuni mo sauniga ma faia se sao atoatoa. Ou te faitau i a tatou lomiga uma i le gagana patupatu. E lē mafai ona taofia loʻu faitauina o nei lomiga.”

 O loo iai foʻi i a tatou lomiga i le gagana patupatu le faaupuga e masani ona iai i a tatou lomiga: “E lē faatauina lenei tusi. Ua saunia e aʻoaʻoina ai le Tusi Paia i le lalolagi aoao, ma ua lagolagoina e ala i foaʻi tauofo.” Faafetai mo le faia o na foaʻi e ala i auala ua faamatalaina i le donate.pr418.com. O la outou lima foaʻi ua fesoasoani i le mauaina e tagata uma o meaʻai faaleagaga, e aofia ai ma tagata tauaso.