E matuā manatu mamafa Molimau a Ieova i o latou uso ma tuafāfine. (1 Peteru 2:17) E toʻatele i tatou e tai pei faalogona o le tuafafine o Tannis mai Kenya. Na ia faapea mai, “Ou te naunau lava e fia iloa mea o loo tutupu i uso ma tuafāfine pele i le lalolagi atoa.” E faapefea ona iloa e Tannis, ma le faitau miliona o Molimau mea o loo tutupu i isi uso ma tuafāfine? Talu mai le 2013, ua mafai ona tatou iloa e ala i le siaki i le vaega o Mea Tutupu i la tatou upega tafaʻilagi, o le jw.org.

 O loo i le vaega o Mea Tutupu lipoti e faatatau i Molimau a Ieova, e pei o le tatalaina o le Tusi Paia, saunia galuega laveaʻi i taimi o mala faalenatura, faugāfale ma isi mea tutupu. E tatou te maua ai tala e faatatau i o tatou uso ma tuafāfine o loo faafalepuipui ona o lo latou faatuatua. O loo iai foʻi tala faalaeiau i mea e tutupu i tauiviga i le talaʻiga ma le Faamanatuga. O ai e faia suʻesuʻega ma saunia nei tala fou?

 O le vaega o Mea Tutupu e vaavaaia e le Matagaluega mo Faamatalaga i le Lautele. O lenei matagaluega o loo i le ofisa ulu ma e galulue i lalo le taʻitaʻiga a le Komiti o Sooupu a le Vaega Pule. E silia ma le 100 uso ma tuafāfine e galulue mo le Matagaluega mo Faamatalaga i le Lautele, ma o le toʻatele e galulue mai i o latou aiga e aofia ai le ʻautusitala, ʻausuʻesuʻe, ʻautusiata ma le ʻaufaaliliu. O nisi e fesootaʻi ma tagata o le malo, polofesa, faiaʻoga ma le ʻau fai tala fou. E fesoasoani isi ofisa lāiti mo Faamatalaga i le Lautele o loo i lālā i le lalolagi aoao, i le Matagaluega mo Faamatalaga i le Lautele.

 E galulue faatasi le Matagaluega mo Faamatalaga i le Lautele ma ona ofisa lāiti e saunia se tala fou. Pe a uma ona filifilia e uso se tala fou, e faia a latou suʻesuʻega ma aoao mai faamatalaga maufaatuatuaina e faatatau i lenā tala fou. E aofia ai le faia o faatalanoaga ma talanoa atu i tagata e iai tomai faapitoa i lenā mataupu. Pe a uma ona latou aoaoina mai faamatalaga moni, ona tusia lea o le tala fou, faitau, faasaʻosaʻo ma toe siaki, tuu i ai ata ona lafo loa lea mo le faamaoniga a le Komiti o Sooupu.

 O ā ni manatu a o tatou uso ma tuafāfine e faatatau i le vaega o Mea Tutupu? Ua faapea mai Cheryl o se tuafafine mai Filipaina, “E ese loʻu fiafia e amata loʻu aso i le faitauina o tala fou e faatatau i le faalapotopotoga a Ieova ma ona tagata.”

 Ua taʻua e le toʻatele o le ʻaufaitau le eseesega i le vaega o Mea Tutupu i le jw.org ma isi tala fou. Ua faapea mai Tatiana mai i Kazakhstan: “Ou te matuā lotofaafetai ona e mafai ona ou talitonuina tala fou i le jw.org. E maufaatuatuaina ma moni.” Ua faapea mai le tuafafine o Alma mai i Mekisikō: “E ese le faalaeiau o tala fou i le vaega o Mea Tutupu, pe a faatusatusa i tala lē lelei e lipotia e isi ʻau fai tala fou.”

 E lē gata e maufaatuatuaina tala fou o loo i le vaega o Mea Tutupu i le tatou upega tafaʻilagi, ae e faamalosia ai foʻi le faatuatua. Ua faapea mai Bernard mai Kenya: “Ua fesoasoani Mea Tutupu ou te vaai ai i uso ma tuafāfine i le lalolagi aoao o soʻu aiga, po o fea lava e latou te nonofo ai. Ua mafai ai ona ou faaaofia o latou igoa ma mea o loo tutupu iā i latou i aʻu tatalo.” Ua taʻua foʻi e Bybron mai i Kenya: “Ou te fiafia lava pe a ou vaai i se tala e faatatau i le tatalaina o se faaliliuga o le Tusi Paia i se isi gagana! O na tala ua faamanatu mai ai iā te aʻu e lē faailoga tagata Ieova.”

 E oo foʻi i tala e faatatau i uso ma tuafāfine o loo sauāina e mafai ona faalaeiauina ai i tatou. Ua faapea mai Jackline mai i Kenya: “O le manatunatu i lo latou lototetele e matuā faamalosia ai loʻu faatuatua. Ou te taumafai e mātau mea na fesoasoani iā i latou e tumau ai. Ua ou aʻoaʻoina mai ai auala na fesoasoani ai mea e faigofie ona fai e pei o le tatalo, faitauina o le Tusi Paia, ma le usuina o pese, e matuā faamalosia ai o tatou uso.”

 E talisapaia e Beatriz o se tuafafine mai i Costa Rica, tala fou e faatatau i mala faalenatura. Na ia faapea mai: “O le vaega o Mea Tutupu ua mafai ai ona ou iloa le vave, maopoopo ma le alofa o le auala o loo saunia ai e le faapotopotoga manaʻoga o o tatou uso. Ua ou mautinoa ai o le faalapotopotoga lenei a Ieova.”

 Maʻeu lo tatou lotofaafetai i le mauaina o tala fou lata mai i o tatou uso i le lalolagi aoao! E lē mafai ona saunia nei tala fou e aunoa ma a outou foaʻi tauofo mo le galuega i le lalolagi aoao, ma o le tele o na foaʻi ua mafai ona faia i le donate.pr418.com. Faafetai tele mo lo outou limafoaʻi.