Ua silia ma le 130 tausaga o faapotopoto faatasi Molimau a Ieova i tauaofiaga i tausaga taʻitasi. O tauaofiaga i le taimi lenei e aofia ai le silia ma le 40 lauga faatasi ai ma musika, faatalanoaga, ma vitiō. Ina ia maua e le aofia aogā ma faalaeiauga mai i le polokalame atoa, e tatau ona manino i le latou ʻfaalogo ma le vaai.’ (Luka 2:20) Ua faapefea ona faaaogā a outou foaʻi ina ia faamautinoa ai e sologa lelei nei tauaofiaga, po o fea lava le atunuu e tou te nonofo ai?

 E iai masini e tā ai leo ma vitiō (audio/video) i le tele o fale taalo i atunuu tamaoaiga. Aiseā la e faaaogā ai a tatou lava masini pe a tatou faaaogā na fale taalo mo se tauaofiaga? Ua faapea mai David o sē e galue i le Matagaluega o Faasalalauga i le Ofisa Ulu: “O le tele o fale e tatou te faaaogāina e leai ni a latou masini e mafai ai e le aofia ona faalogologo lelei i se polokalame e silia ma le ono itula le umi. O se faataʻitaʻiga, e tele ina faaaogā e fale taalo masini e fai ai faasilasilaga pupuu pe tā ai ni pese. E faaali i a latou TV ʻai o taaloga, faasilasilaga, ma toe faaali ai vaaiga pupuu o taaloga. Peitaʻi, e ese mai ai a tatou tauaofiaga. O lo tatou sini ina ia maimoa le aofia i ni vitiō uumi ma latou faalogo ma malamalama lelei i faamatalaga uma mai i le pulelaa.”

 E eseese uma nofoaga e faia ai tauaofiaga, ma e tatau ona talafeagai lelei masini e tā ai leo ma vitiō ma na nofoaga taʻitasi. Pe a uma ona filifilia se nofoaga, ona faatulaga lea e Matagaluega o Faasalalauga i ofisa o lālā vaega e nonofo ai le aofia, e fua i le aofaʻi o le a auai, ma le toʻatele e ofi ai. O le a fuafua foʻi e uso mea e faatutū ai sipika ma TV, o auala e koneti ai, ma lisi meafaigaluega uma e manaʻomia ina ia faamautinoa e mafai e tagata uma ona vāai ma faalogo i le polokalame.

 E tele luʻi i le faafoeina o masini e tā ai leo ma vitiō, aemaise i tauaofiaga e faia i gagana eseese. Pe afai e faaliliu le polokalame i se isi gagana, e tatau ona vāai ma faalogo le ʻaufaaliliu i le polokalame, ona faaaogā lea o se alāleo o le leitiō e faasalalau atu ai le faaliliuga i tagata e tautatala i lenā gagana. O le polokalame faapitoa e taʻua o le media player, ua mafai ai ona maimoa le aofia i se vitiō i le taimi e tasi, e ui o loo faasalalau atu le leo i ni gagana eseese se valu. Ua faapea mai David: “E toleni lelei uso o le a faafoeina nei masini, ona e ese le lavelave.”

 O le tele o ofisa o lālā e iai a latou masini e tā ai leo ma vitiō e faaaogā i tauaofiaga i tausaga taʻitasi. E faatulaga e uso le felaʻuaʻiga o masini ma meafaigaluega uma mai i lea tauaofiaga i lea tauaofiaga. E faaalu e le lālā a le Iunaite Setete i tausaga taʻitasi le silia ma le $200,000 a e felaʻuaʻi ai masini mo tauaofiaga. E ui i lea, o lenā fuafuaga e faaitiitia ai tupe faaalu e faatau ma faaleleia ai nisi masini faaopoopo. Ua faapea mai Steven o lē na fesoasoani e vaaia masini e tā ai leo ma vitiō i se tauaofiaga i Kanata: “Na galulue mamafa uso na faafoeina le audio/video e faamautinoa ua atoa uma ma teu faalelei nati, fao, uaea, ma isi meafaigaluega e sauni mo le isi tauaofiaga.”

 E matuā taugatā pe a totogi le faaaogāina o masini e tā ai leo ma vitiō, ae e masani lava e lē lelei na masini. O le māfuaaga lea e masani ona tatou faatauina ai masini e tatou te manaʻomia. O le tau o le TV e lima i le tolu mita le telē (16 i le 10 futu) e faapipii i le puipui, e pe ā ma le $24,000, a o le tau o le uaea e 15 mita le umī (50 futu) mo le maikorofoni, e pe ā ma le $20. O lea, a o leʻi faatauina se masini, e galulue faatasi le Matagaluega o Faasalalauga ma le Matagaluega mo Faatauga e “faitau tupe o le a faaalu.” (Luka 14:28) O se faataʻitaʻiga, e latou te fesili ifo: E toʻafia tagata o le a auai i le polokalame lea e faaaogā ai nei masini? Pe e manaʻomia moni ona faatau nisi masini fou? Po o lava potu e teu lelei ai masini? Pe e iai ni a tatou meafaigaluega ma tagata ua toleni lelei e tausia na masini?

 E lipea ma siaki e lē aunoa masini mo le audio/video, ina ia umi ona lelei ma sefe ai foaʻi a uso. Ina ia puipuia na masini, e tuu i totonu o pusa anagatā i taimi e felaʻuaʻi ai, ma e fai foʻi ma lipea na pusa pe a manaʻomia.

 E maofa tagata o le lalolagi ona o le lelei o masini e tā ai leo ma vitiō o loo faaaogā i a tatou tauaofiaga. O se faataʻitaʻiga, na iai se tagata faigaluega i se kamupani telē e faia faasalalauga na auai i se tasi o tauaofiaga. Na ia mātauina le manino o leo ma vitiō o le polokalame. Ua faapea mai Jonathan, o sē na fesoasoani e faatulaga ma faafoe masini e tā ai leo ma vitiō i tauaofiaga: “Na ofo lenā tagata faigaluega ina ua iloa o uso na galulue i le audio/video o ni tagata tauofo, ma e leai ni tomai faapitoa. Na ia fai mai e lima aso e faapipii ai e lana kamupani masini, ae o i tatou e na o le tasi ma le ʻafa aso.” Na faapea mai se tasi e vaaia le fale na faia ai se tauaofiaga: “E toʻatele tagata fai musika ma ē atamamai i vitiō ua ō mai i inei, ae e sili atu le tomai ma le lelei o tagata o loo faafoeina tou masini.”

 O ā aogā ua e maua mai i tauaofiaga ona o le faaaogā o masini e tā ai leo ma vitiō? Atonu e tutusa o oulua faalogona ma David, o lē e nofo i Egelani. Ua ia faapea mai: “E 88 oʻu tausaga, ma na ou auai i tauaofiaga i loʻu olaga atoa. Ae ua faigofie atu i le taimi lenei ona ou uaʻi atoatoa i le polokalame. O le mananaia o vitiō, ua vave ai le polokalame ma manino atili ai le feʻau.” Ua faapea mai Micheal o lē e nofo i Nigeria, “Ona o le manino o le faalogo ma le vaai a uso i failauga ma vitiō, ua faigofie ai ona latou uaʻi atu i le polokalame atoa, e aunoa ma le tosina ese o o latou mafaufau.”

 A o e auai i Tauaofiaga Itumalo ma Tauaofiaga Faapitoa ʻIa Folafola Atu le Tala Lelei!’ i lenei tausaga, ia manatunatu i le tele o tapenaga a uso ina ia mafai ona e faalogo ma vaai i le polokalame atoa. E matou te talisapaia a outou foaʻi, e aofia ai foaʻi na faia i le donate.pr418.com, lea ua mafai ai ona tatou maua nei polokalame. Faafetai lava.