O se tasi o vala na tulimataʻia e Molimau a Ieova i lenei tausaga o le tatalaina lea o le Ata 1 O le Tala Lelei iā Iesu. E faitau miliona i latou ua uma ona maimoa i ai. Ae o le ata muamua lenā o ata e 18 o lenei ata faasolo. O ā galuega e tatou te lē o iloa atu na aofia i le faatinoina o lenei ata faasolo, ma na faapefea ona outou lagolagoina lenei galuega?

 E tele ina puʻeina le ata O le Tala Lelei iā Iesu i le ofisa o le lālā i Ausetalia. E pe ā ma le 50 i le 80 tagata e iai i le taimi e puʻe ai se vaaiga se tasi. a E iai foʻi uso ma tuafāfine e saunia taumafataga i le aoauli, afiafi ma isi meaʻai māmā i ē uma o loo iai i le puʻeina o le ata. Na taʻua e Esther o loo galue i le Matagaluega o Mea Taumafa: “E umi se taimi e fuafua ma tāpena ai mea mo taumafataga. E faatau mai mea e faaaogā mo meaʻai mai kamupani eseese ina ia maua mea lelei e fai ai meaʻai i se tau taugofie. O taimi uma e taumafai ai e faafaigofie kuka e fai ina ia faamautinoa ai e lē o faataugāina meaʻai.” E pe ā ma le fā tālā Amerika e faaalu mo le tagata e toʻatasi.

 E lē gata e manaʻomia e tagata o le ata ma le ʻaufaigaluega mea taumafa ae faapea foʻi le puipuiga. O le ā lenā puipuiga? E ui e manaia le lā ma le lagi lelei o le tele o aso i Ausetalia, ae e maualuga foʻi le lamatiaga e iai ona o le aasa o ave malolosi o le lā. Ina ia faaitiitia le aafiaga ma le tulaga vaivai ona o le vevela o le lā, ua fesoasoani mai ai uso ma tuafāfine galulue mamafa e faatutū faleʻie ma nofoaga mālū e mapu i ai, e faamautinoa foʻi o iai ni sunscreen, faamalu, ma vai mo tagata uma. Ua faamatala mai e Kevin o loo galue i le Auaunaga mo Puʻegāleo ma Vitiō e faapea, “O le toʻatele o nei uso ma tuafāfine o loo faatino ma galulue mo le ata e tausāvali mai. E latou te olioli e faatino nei galuega uma ma le lotomaulalo. E matou te lē mafai ona faataunuu lenei galuega e aunoa ma i latou.”

 O nisi o nei vaaiga e lē lelei ona puʻeina i le lālā, e pei o le nofoaga i tua ua saunia po o le potu i totonu o le Peteli mo le puʻeina o le ata (studio). O tulaga faapena, e manaʻomia ai ona ave le ata e puʻe i isi nofoaga. Ina ia puʻeina ni vaaiga faale-Tusi Paia ia e leai ni uaea eletise, auala tā ma ni fale faaonapōnei, e masani ona malaga atu tagata o le ata ma le ʻaufaigaluega i nofoaga maotua. E ao ona tapena ma ave uma laʻei e faaaogā, o mea e aofia i le faatinoina o le ata ma meafaigaluega, ma teu malu i le nofoaga o loo puʻe ai le ata. A o leʻi puʻea, e faamautinoa e i latou o faatonutonuina le galuega ua iai afi eletise, vai inu mamā, ma faleese i lea nofoaga. E api i latou uma e aofia ma galulue mo le ata i ni fale o Molimau a Ieova i le vaipanoa, o taavale e toso atu, po o ni faletalimālō.

 E lē taugofie le puʻeina o le ata i nei nofoaga, e alu ai le taimi, ma e tele galuega e aofia ai. O lea, i le 2023, na faamaonia ai e le Vaega Pule le faatauina o se mea telē e pei o se TV e faaali ai ata e 2.5 miliona tālā Amerika lona tau. O lenei screen telē faaonapōnei e matuā manino ai le ata ma maua ai le malamalama e pei lava o loo i fafo. O le iʻuga ua mafai ai ona ʻalofia le tele o le tupe e faaalu pe a malaga i isi nofoaga. Ua faapea mai Darren o se tasi o sui o le Komiti o le Lālā a Ausetalia, “O le faaaogāina o lenei screen ua faaitiitia ai le vaivai o tagata uma o loo faatino le ata, ma maua ai le avanoa o le ʻaufaigaluega e puʻe soo ai se vaaiga se tasi seʻia oo lava ina sao lelei. Mo se faaaʻoaʻoga pe afai e puʻeina i fafo, ua na o ni nai minute lava e mafai ona puʻe ai le goto o le lā a o leʻi pogisa. Ae o le iai o le screen telē ua mafai ai ona puʻe le ata o le goto o le lā i le tele e mafai ai seʻia maua lelei.”

 O loo manaʻomia le tele o tagata e faatinoina le ata ma nisi ʻaufaigaluega mo vaega taʻitasi o le ata faasolo O le Tala Lelei iā Iesu. O ā ni o latou lagona e faatatau i le auala ua tausia ai i latou?

 Na tusi e faapea Amber o lē na malaga i le silia ma le 700 kilomita (435 maila) mai lona aiga i Melepone ina ia fai sona sao i lenei poloketi, “Mai lava i loʻu taunuu i le malae vaalele, na vaaia lelei aʻu e le aiga Peteli. E toʻatele na latou valaaulia aʻu e matou te faiʻaiga faatasi. I le nofoaga na puʻe ai le ata, na tausia lelei aʻu e tagata uma. Na tele faamanuiaga na ou maua i lenei malaga. E lē o se faataulaga lenei mea na ou faia.”

 E galue Derek i le vaega o loo faia vitiō. Na ia faapea mai, “Na lagolago e le tele o matagaluega i matou mai lava i le amataga. Ou te lotofaafetai ona o le iai ma ni uso ma tuafāfine e faataulaga lo latou taimi, alāmanuia, ma lo latou malosi mo lenei poloketi. E lagolagosua, e lotomalilie, ma agalelei. E mautinoa le faamanuia e Ieova o i latou ma i matou foʻi. Ua ou mautinoa e tausia e ia i tatou e lē gata e ala i le iʻuga o le galuega ae o le auala o loo faataunuu ai le galuega.”

 Faafetai lava mo la outou lagolagosua i le puʻeina o le ata e ala i a outou meaalofa tauofo, e aofia ai ma foaʻi tauofo o loo faia i le donate.pr418.com.