I nei aso e gata ai, e faatalitalia e tatou te “faalogo i taua ma tala o taua.” (Mataio 24:6) Peitaʻi, pe a feagai o tatou uso ma faafitauli ona o nei mea ua tutupu, e latou te mauaina le fesoasoani manaʻomia. Na maua mai i le Lipoti Mai i le Vaega Pule 2022 #3, faamatalaga faamāfanafanaloto e faatatau i galuega laveaʻi o loo faagasolo pea i Europa i Sasaʻe mo i latou ua aafia i le taua i Ukraine. Ua faapefea ona maua e o tatou uso le fesoasoani a o faia pea le taua? O ā aafiaga o nei fesoasoani laveaʻi i o tatou uso i Ukraine?

 Ina ua amata le taua i Ukraine iā Fepuari 24, 2022, na faamaonia ai e le Komiti o Sooupu se tinoitupe e fesoasoani ai i o tatou uso i Ukraine. O lea, na amata ai loa ona faatauina e le lālā i Ukraine mea e manaʻomia, ma tufatufa atu e ala i Komiti o Fesoasoani mo Mala e 27 na tofia e le lālā.

 Ina ia lagolagoina nei taumafaiga, na amata ai loa ona tilofaʻia e uso i le Ofisa Ulu a Molimau a Ieova le auala e saunia ai fesoasoani manaʻomia. Na talosagaina e le Komiti o Sooupu ma le Komiti Lomitusi a le Vaega Pule, le Matagaluega mo le Faatauina o Oloa mo le Lalolagi Aoao, ina ia galulue faatasi ma uso mai i ofisa o lālā i Ukraine ma Polani e iloilo se auala e avatu ai le fesoasoani. Ina ia faamautinoa e malilie faatasi i le fesoasoani o le a auina atu, na feiloaʻi ai i aso taʻitasi sui o le Matagaluega mo le Faatauina o Oloa mo le Lalolagi Aoao ma uso mai i matagaluega e faatauina oloa, matagaluega e gafa ma le lafoina atu o oloa, ma matagaluega e feagai ma mataupu tau tulafono.

 Na taʻua e Jay Swinney mai i le Matagaluega mo le Faatauina o Oloa mo le Lalolagi Aoao, “Muamua, na matou iloiloina po o ā mea e manaʻomia. Na matou mananaʻo e saunia meaʻai, ma mea e tausia ai le tumamā ua masani ai le ʻauuso i vaipanoa na aafia. Peitaʻi o le iloiloina po o ā mea e manaʻomia, e lē na o le pau lenā o le faafitauli. Na manaʻomia foʻi ona matou iloiloina le auala e sili ona saogalemu ma vave, e auina atu ai nei fesoasoani i Ukraine i le taimi o le taua.”

 Iā Mati 9, 2022, na iloa ai e uso mea na manaʻomia e o tatou uso ma tuafāfine i Ukraine. Na saunia pusa meaʻai ma tuu ai i totonu meaʻai tuuapa, saito, araisa, ma beans. Na saunia foʻi mea e tausia ai le tumamā e pei o fasimoli ma pepa mo falelētaʻua. I se fua faatatau, pe tusa ma le $65 (tālā Amerika) le tupe e faaalu mo mea e manaʻomia e le tagata e toʻatasi mo le fā vaiaso. Talu ai na manaʻomia e le faitau afe o o tatou uso nei mea, na faamaonia ai e le Komiti o Sooupu se tinoitupe telē e saunia ai na fesoasoani. Ae o le a faapefea ona auina atu nei fesoasoani, e aunoa ma le tuu o ola o o tatou uso i lamatiaga e lē manaʻomia?

 Iā Mati 13, na faataʻitaʻi ai e ni uso se toʻalua mai i Polani le auina atu o fesoasoani mai i le ofisa o le lālā i Polani, i se fale e teu ai oloa e lata i Lviv i Ukraine. I ni nai aso a o leʻi tuua e nei uso Polani, na fesoasoani ai le ʻauuso mai i lālā i Polani ma Ukraine i le sauniunia o mea na manaʻomia e nei uso e toʻalua. Na faamāeʻa e le lālā le faagaoioiga o pepa faaletulafono na manaʻomia, ina ia sopoʻia ai e nei uso le tuaoi ma avatu fesoasoani. Na latou faamautinoa foʻi e iai ni faailoilo i taavale na malaga ai uso e iloa ai o loo latou avatuina fesoasoani, ma galulue faatasi ma le ʻauuso i Ukraine ina ia iloa le auala e sili ona vave e ui ai pe a sopoʻia le tuaoi. O le lelei o sauniuniga na faia e uso ma le faamanuia a Ieova, i totonu o le 24 itula talu ona taunuu fesoasoani i Lviv, ae tuuina atu loa fesoasoani laveaʻi i Komiti o Fesoasoani mo Mala, ma toe foʻi ma le saogalemu o tatou uso i Polani.

 E ui sa mafai ona auina atu fesoasoani laveaʻi i le taimi muamua, ae e itiiti ifo ma le tasi le tone (1 le tone Amerika) o fesoasoani laveaʻi na mafai ona auina atu e uso. O lona uiga, sa manaʻomia lava le pe tusa ma le 200 tone (220 tone Amerika). O le a faapefea ona auina ma tufatufaina atu na fesoasoani e tele i le vave e mafai ai?

 Ina ua māeʻa ona faitauina lipoti i le jw.org e faatatau i aafiaga i o tatou uso ona o mea o loo tutupu i Ukraine, na mananaʻo ai tagata i le lalolagi aoao e fesoasoani i o tatou uso. Na faia e le toʻatele e mamao atunuu e nonofo ai foaʻi tauofo i le galuega i le lalolagi aoao a Molimau a Ieova, i le iloaina o le a faaaogā tatau na foaʻi. Na mafai e atunuu tuaoi ona faaaogā lo latou taimi, malosi, ma meafaitino e fesoasoani ai. Seʻi mātau nisi o faataʻitaʻiga.

 Na tuufaatasia e nisi o le ʻaugalulue tauofo i Polani le faitau sefulu afe o mea na manaʻomia, ma na tusia foʻi e le fanau ni cards. Na faapea mai Bartosz Kościelniak, o se sui o le Matagaluega mo le Faatauina o Oloa i le lālā i Polani, “E tele taimi na ou faitauina ai le Salamo 110:3 lea e taʻua ai, ʻe ofo atu ma le lotomalie e tagata o Ieova i latou lava.’ Ae o lea ua ou vaaitino i le lagolagosua a uso ma tuafāfine. Ua ou vaaia le faitau selau o le ʻaugalulue tauofo, o ē lotomalilie e ō mai i le taimi e manaʻomia ai ma nofosauni e galulue i so o se taimi. O i inā na ou faamaonia ai le moni o nei upu.”

 Na faapea mai se Molimau a Ieova na ofoina atu loli mai i lana kamupani ma totogi penisini o na loli: “O se avanoa lea e faaali atu ai loʻu alofa mo oʻu uso ma Ieova. Na ou matuā fiafia lava e ofo atu le fesoasoani.” E silia ma le 7,700 lita (2,034 kalone) o le penisini na foaʻiina atu, ma na faaaogā e uso lo latou taimi ma le malosi e aveina ai na loli i le toetoe 48,000 kilomita (30,000 maila) e auina atu ai fesoasoani laveaʻi.

 Iā Mati 28 (e tusa lenā ua 15 aso talu mai le taimi muamua na faataʻitaʻi ai ona auina atu fesoasoani laveaʻi) na auina atu ai i Ukraine le 100 tone (110 tone Amerika) o meaʻai, mea e tausia ai le tumamā, ma fualaau ma vailaau faafomaʻi. Na mafai ona faataunuuina na vala, ona o le lotomalilie ma le alolofa o o tatou uso ma tuafāfine. O le agalelei o le ʻauuso ma i latou na faaaogā a latou meafaitino e saunia ai fesoasoani laveaʻi, na matuā faaitiitia ai le tupe faaalu mo mea na manaʻomia. E oo mai i le taimi lenei, ua auina atu e Molimau a Ieova le silia ma le 190 tone (209 tone Amerika) o fesoasoani laveaʻi i Ukraine. O le ā le aafiaga o na fesoasoani i o tatou uso?

 Ina ua taunuu nei fesoasoani laveaʻi i Lviv, na tufatufaina atu ai loa e Komiti o Fesoasoani mo Mala i Ukraine iā i latou na manaʻomia le fesoasoani. E tele aai na mafai ona auina atu ai na fesoasoani, o isi aai e silia ma le 800 maila (1,300 kilomita) le mamao mai i Lviv. E ui na faia e uso le mea e gata ai le mafai i le auina atu o na fesoasoani laveaʻi, ae na tele le taimi na faaaluina ai. a

 Ua faapea mai Markus Reinhardt, o se sui o le Komiti o le Lālā i Ukraine: “I lenei taimi faigatā, ua vāaitino le toʻatele o uso i le alofa o Ieova ma aogā o le usitaʻia o taʻiala mai i lana faalapotopotoga, a o leʻi tupu se mala. O se faataʻitaʻiga, ua faalaeiauina tagata uma ina ia lava pea meaʻai ma vai mo ni vaiaso se tele i o latou fale. E tusa ai ma lenā taʻiala, na faapea mai ai Anton o se toeaina mai i Kyiv: ʻUa sauniunia i tatou e le faalapotopotoga a Ieova mo tulaga faigatā, ma e tatou te lotofaafetai ai ona o lenā mea. O le iai pea o meaʻai ma vai faapea se leitiō, ua faasaoina ai o matou ola.’ E matou te matuā talisapaia le usitaʻia e uso o lenā taʻiala, ona na lava ai le taimi na faamaopoopo ai e le ofisa o le lālā fesoasoani na manaʻomia.”

 O ā faalogona o uso ina ua latou maua nei fesoasoani? Na faailoa mai e Mykola ma Zinaida, e nonofo i Kharkiv o la faalogona e faapea: “Na matuā pāʻia o ma loto ona o lo outou manatu mamafa. Faafetai lava mo meaʻai ma fualaau ma vailaau faafomaʻi. O nei fesoasoani, ua ma vāaitino ai i le auala o loo tausia ai e Ieova i maʻua.” Ua faapea mai Valentyna, e nofo foʻi i lenā vaipanoa: “Ina ua amata le taua, e toʻatele tagata e faatali i se laina umī e ō i faleoloa e faatau mai mea sa latou manaʻomia. E lē o taimi uma na mafai ai ona faatau mea na manaʻomia. Ae na silafia e Ieova lenei faafitauli. Na ia tofia uso e faasoasoaina atu fesoasoani i aiga taʻitasi, ma o na fesoasoani na iai mea tonu na latou manaʻomia. I na tulaga matuā faigatā lea e foliga mai ai ua leai se faamoemoe, e lagona ma iloa ai e se tasi le tausiga a Ieova ma lana faalapotopotoga i se auala faapitoa. . . . E matuā talisapaia le fesoasoani ma le lagolagosua ua saunia e Ieova i le taimi tatau.”

 Na faapea mai Yevhen, Iryna ma Mykyta, na sosola ese mai i Mariupol: “E matou te matuā lotofaafetai i la outou tausiga ma le lagolagosua i lo matou aiga. Na matuā talafeagai lelei le taimi na maua ai. I le taimi na faatoʻā maua ai nei fesoasoani, na matou manatu e na o mea na manaʻomia o loo i totonu o pusa. Ae ina ua tatala, na matou iloa ai o loo afīfī mai ai foʻi ma lo outou alofa!”

 E lē taumatea o le agaga o Ieova ma lana taʻitaʻiga, na mafai ai ona auina atu e ona tagata le fesoasoani e ui i “taua ma tala o taua.” E telē foʻi le fesoasoani o a outou foaʻi tauofo mo le galuega i le lalolagi aoao, i le faataunuuina o lenā vala. O le tele o na foaʻi tauofo ua faia e ala i le donate.pr418.com. E matuā talisapaia lo outou agaga limafoaʻi!

Saunia o Fesoasoani Laveaʻi i se Auala e Sili Ona Vave ma Saogalemu

1. Fepuari 24, 2022: Ua faamaonia e le Komiti o Sooupu se tinoitupe e fesoasoani ai i o tatou uso i Ukraine, lea e mafai ai e le lālā ona sauniunia fesoasoani na manaʻomia

2. Fepuari 24–Mati 8, 2022: Ua faatauina e le lālā i Ukraine nisi o mea e manaʻomia, ma tufatufaina atu e ala i Komiti o Fesoasoani mo Mala. Ua nofosauni foʻi le ofisa o le lālā e talia fesoasoani mai i Polani ma tufatufaina atu

3. Mati 9, 2022: Ua faamaonia e le Komiti o Sooupu le auina atu o fesoasoani i Ukraine

4. Mati 10–12, 2022: Ua faia fuafuaga e faataʻitaʻi le auina atu o meaʻai ma isi mea e manaʻomia mai i Polani i Lviv i Ukraine

5. Mati 13, 2022: Ua faataʻitaʻi le auina atu o fesoasoani laveaʻi e pei o meaʻai ma isi mea e manaʻomia mai i Polani i Lviv i Ukraine

6. Mati 14–16, 2022: Ua faamaopoopo se vaega o tagata tauofo mai i le vaipanoa mo Faugāfale, i se Maota mo Fonotaga e lata i Poznan i Polani, ina ia latou tuufaatasia pusa o meaʻai ma mea e tausia ai le tumamā

7. Mati 17, 2022: Ina ua māeʻa aso e fā talu mai le aso muamua na faataʻitaʻi ai le auina atu o fesoasoani, ua amata ona auina atu fesoasoani laveaʻi e 13 tone (14 tone Amerika) le mamafa i le tuaoi o Ukraine

8. Mati 21–27, 2022: Ua tuufaatasia i Polani fesoasoani na totoe ma auina atu i Ukraine, ma i totonu o le 24 itula na tufatufaina atu ai i vaipanoa na manaʻomia na fesoasoani

9. Mati 28, 2022: I totonu o le 20 aso talu ona maua mai le faatagaga e auina atu ai fesoasoani, ua mafai ona auina atu i Ukraine le 100 tone (110 tone Amerika) o meaʻai, mea e tausia ai le tumamā, ma fualaau ma vailaau faafomaʻi

 E oo mai i le taimi lenei, ua auina atu e Molimau a Ieova le silia ma le 190 tone (209 tone Amerika) o fesoasoani laveaʻi i Ukraine.